HABAKKUK 1
1
1Profet Habakkuk nih langhnak in
a hmuhmi bia:
Profet Biahalnak
2Maw Bawipa, zei can dah nangmah cu
kan auh lengmang lai i let loin
na ka um lai?
“A kenkip ah zaang-ennak lawng
a um ko,” tiah na sinah ka au,
Sihmanhsehlaw khamhnak zeihmanh
na tuah hlei lo.
Zei can dah ka au lengmang ko
rih lai?
3Zeicahdah ṭhat lonak hi vialte hi
na ka hmuhter i
mi nih fahnak an inmi cu
na zoh sawhsawh men ko?
Rawhralnak le zaang-ennak nih
an ka chuahhnawh,
Remlonak kha a chuak i siknak kha
a tam.
4Cucaah nawlbia cu san a tlai ti lo i
biading cu teitu a si kho ti lo;
Miṭhalo nih khan miding mi cu
an fimneh hna i cucaah biading cu
merh lengmang a si ko cang.
5Nannih mihlenhmang mi hna,
zohhmanh u:
Mah hihi nan khuaruah an hartertu
hna le nan lung an suhaitu hna cu
a si lai,
Nanmah nan chan chungah hin
thil pakhat ka tuah lai i cu thil cu
an in chimh hna hmanh ah
nan zum kho lai lo. #Lam 13.41
6Mah cucu hihi a si:
Khaldi mi cu ka thawhter hna lai,
Annih cu mipuar, mithintawi an si;
Anmah inn a si lomi lak awkah khan
vawlei cung khuazakip ah an kal. #2Sia 24.2
7Miṭihnung ngaingai an si,
anmah nawl hleiah cun
aho nawl hmanh an duh lo.
8An rangtum hna cu pawlai nakin
an khul a rang deuh,
Zan i a vakmi cenghngia nakin ṭih
an nung deuh;
An leng hnuktu rangtum hna nih khan
heh tiah vawlei kha an huah i
Langta nih sa a vun zuanhnawh
vungmang bantuk khin lamhla piin
an ra le.
9Hi mi vialte hna hi zaang-ennak tuah
awkah a rami an si,
An mui ṭihnung cu nichuahlei thli
bantuk a si,
Sal i an tlaihmi hna cu thetse zat
an si.
10Siangpahrang cu an nihsawh men
ko hna i uk bawi hna cu zeihmanh
ah an rel hna lo;
Ralhau an hmuh ah an nih a chuak
men i raltuknak chuntlung kha
an serhnawh duak hna i
an lak ko hna.
11Cun annih cu thlitu bantukin
an lan i an lo;
An ṭhawnnak an pathian i aa serhmi
hna cu vansang au in an um.
12Maw Bawipa, nangmah cu hlanlio
piin na um cang lo maw?
Ka Pathian, nangmah cu a thiang i
zungzal in a nungmi na si.
Maw Bawipa, annih kha biaceihtu
ah a sertu hna cu nangmah na si,
Maw Lungpi, annih kha biaceihnak
ah biakhiaktu i a sertu hna cu
nangmah na si.
13Ṭhat lonak kha zoh awkah na mit cu
a thiang tuk i minung nih fahnak
an in tikah na zoh sawhsawh
kho hna lo.
A si kun ahcun, zeicahdah mi cu
pakhat le pakhat an i rawi lengmang
lengmang tikah
na zoh sawhsawh ko hna i
Zeicahdah a ṭha lomi hna nih
anmah nakin a ding deuhmi kha
an thah len ko hna tikah hin
dai tein na um ziar ko?
14Nangmah nih minung cu rili chung i
a ummi nga, rili chung i a ummi
thilnung uktu a ngei lomi bantuk
ah khin na ser hna.
15Ngatlaitu hna nih khan sio in an sio
hna, sur sau in an hnuh hna i
sur in an pumh hna,
Cun an tlaihmi kha a tam caah
an i lawm i an lam.
16Cucaah an sur ngan kha raithawinak
an pekchanh hna i an sur kha
khangh thawinak an pekchanh hna;
Zeicahtiah nun nuam ngaiin
an nunnak le rawl tampi an ngeih
khawhnak cu an sur hna thawng
cun a si.
17Cu bantuk cun mi nih vainam kha
an i phawi zungzal ko i
Zaangfahnak um loin miphun kha
an sam lengmang ko hna.
Currently Selected:
HABAKKUK 1: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006