2 SAMUEL 23
23
David Rovuih Bia
1Cun mah hihi David bia hmanung bik cu an si:
Jesse fapa David bia, sangpi ah cawimipa,
Jakob Pathian chiti thuhmi,
Israel mi hla dawh phuah thiamtu
bia cu:
2“Bawipa thlarau nih keimah kha
hmang in a chim,
Amah bia cu ka lei cungah a um.
3Israel Pathian nih a chim cang,
Israel lungpi nih a ka chimh cang:
Uktu nih mi kha dinnak in a uk hna i
Pathian ṭih buin a uk hna tikah,
4Khuadawm a thiangmi zing i a hung ceumi ni bantuk,
Zinglei ceunak bantuk khin annih cungah a rung ceu,
Vawlei in ram a khohtertu ruah bantuk a si.
5A si, ka innchungkhar cu cu bantukin
Pathian hmaiah a dir lo maw?
Zeitintiah keimah he zungzal hmunmi biakamnak kha a ser,
Zeizong vialte kha ningcangte le fek tein a tuah.
Zeitintiah keimah bawmhnak vialte le duhnak cu
Tlinter loin maw a um hnga?
6Sihmanhsehlaw Pathian zei i a rel lomi hna cu,
Hlonhmi hling bantuk an si;
Zeitintiah annih cu kut in lak khawh an si lo;
7anmah a tonghnak ahcun,
Thirfung feihlung hman a hau,
Annih cu mei in khangh dih an si.”
David Miṭhawng Hna
(1Cha 11.10-47)
8Mah hna hi David nih a ngeihmi miṭhawng hna min cu an si: Takhemon mi Josheb-basshebeth amah cu pathum hna lak i haotu bik a si; amah nih ṭum khat ah minung za riat kha a fei in a thah hna. 9Cun miṭhawng pathum hna lak i amah a hun changtu cu Ahohi fapa Dodo i fapa Eleazar kha a si. Raldoh awkah aa pummi Filistin mi kha annih nih an zuamkhawn hna i Israel mi nih hnulei ah an i tawn ṭhan ṭung tikah khan, amah cu David sinah khan a um. 10A tho i Filistin mi kha a kut a bat i a kut cu vainam ah aa khimh chih tiangin a thah hna; cun Bawipa nih cu ni ah cun teinak nganpi a ser; cun a hnu i a sinah an ra kir ṭhan tikah ral thahmi hna thilthuam phoih awk lawngah khan a si cang.
11Cun amah a hun changtu cu Harar mi Agi fapa Shammah a si. Filistin mi cu Lehi i hmun pakhat, phiang kung a khahnak hmun ah khan an i pum; cun mi hna cu Filistin mi hna sin khan an zam. 12Sihmanhsehlaw cu hmun laifang ah cun dirhmun aa serh i cu hmun cu a runven i Filistin mi cu a thah hna; cun Bawipa nih teinak nganpi a ser.
13Cun an haotu ngan bikbik sawm thum hna lak i pathum cu an vung kal i rawl ṭuan caan hrawngah khan Adullam lungkua ah David sin an phan, cu lioah cun Filistin mi bu khat Refaim nelrawn ah khan an riak. 14Cu lioah cun David cu ralhruang chungah a um i Filistin ralvengtu ralkapbu cu Bethlehem khua ah an rak um. 15Cun David nih ti kha a ngai ruangmang i, “Bethlehem tikhor, hauka pawng i a ummi ti kha din awkah a ka petu hei um hna seh law, ka hei duh hnga dah,” tiah a ti. 16Khi tikah miṭhawng pathum hna nih khan Filistin mi hna riahhmun chung cun an va lan i Bethlehem tikhor, hauka pawng i a ummi chung khan ti cu an va than i an va lak i David sinah an ratpi. Sihmanhsehlaw a ding duh lo; Bawipa hmaiah khan a bungh i, 17“Maw Bawipa, mah hi cu ka tuah hrimhrim hnga lo. Thih le thih tiin a kalmi hna thi cu ka din ko hnga maw?” tiah a ti. Cucaah cun a ding duh lo. Mah thil hna cu miṭhawng pathum nih khan an tuah.
18Cun Joab unau Abishai (an nu cu Zeruiah a si) kha sawm thum hna lak i an haotu bik cu a si. Cun mi za thum kha fei in a thah hna i pathum hna sinah khan a thang aa chuah ve. 19Amah cu sawm thum hna lakah khan min thang bik a si i an haotu ah a cang, sihmanhsehlaw pathum hna kha cu a khingkhang hna lo.
20Jehoiada fapa Benaiah cu Kabzeel khuami mi ralṭha, thil lianngan a tuahtu a si; amah nih Moab ariel#23.20 Ariel hi a sullam hngalh lo a si. pahnih a thah hna. Cun hawhra a tlak ni ah khan a vung kal i chiandeih pakhat zong khor chungah a thah fawn. 21Cun Izipt mi pakhat, aa dawh ngaimipa, a thah. Izipt mipa cu fei aa put, sihmanhsehlaw Benaiah nih cun thing thluan he a vun fuh i Izipt mipa cu a kut chungin fei kha a chuh i amah fei lila cun a thah. 22Mah thil hna hi Jehoiada fapa Benaiah nih khan a tuah hna i miṭhawng pathum hna sinah khan a thang aa chuah ve. 23Sawm thum hna lakah khan a min a thang ve, sihmanhsehlaw pathum hna kha cu a khingkhang hna lo. Cun David nih a pum ralveng haotu ah a chiah.
24Joab unau Asahel kha sawm thum hna lak i aa telmi a si ve; Bethlehem khuami Dodo fapa Elhanan, 25Harod khuami Shammah, Harod khuami Elika, 26Palti mi Helez, Tekoa khuami Ikkesh fapa Ira, 27Anathoth khuami Abeizer, Hushath mi Mebunnai, 28Ahohi mi Zalmon, Netofah mi Maharai, 29Netofah mi Baanah fapa Heled, Benjamin mi hna khua Gibeah mi Ribai fapa Ittai, 30Pirathon mi Benaiah, Gaash i tivarek hna mi Hiddai, 31Arbath mi Abialbon, Bahurim mi Azmaveth, 32Shaalbon mi Eliahba, Jashen fapa hna, Jonathan, 33Hara mi Shammah, Hara mi Sharar fapa Ahiam, 34Maakah mi Ahasbai fapa Elifelet, Gilon mi Ahithophel fapa Eliam, 35Karmel mi Hezro, Arbi mi Paarai, 36Zobah mi Nathan fapa Igal, Gad mi Bani, 37Ammon mi Zalek, Zeruiah fapa Joab i a hriamnam putu Beeroth khuami Naharai, 38Ithra mi Ira, Ithra mi Gareb, 39Hit mi Uriah: an dihlak in sawm thum le pasarih.
Currently Selected:
2 SAMUEL 23: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006