YouVersion Logo
Search Icon

2 SAMUEL 19

19
David Kha Jerusalem Ah A Kir
1Joab cu, “Zohhmanh, siangpahrang kha a ṭap lengmang i Absalom zun kha a ngai ko,” tiah an chimh. 2Cucaah cu ni i teinak cu mithi ngaihnak ah mi vialte caah a cang, zeitintiah mizapi nih cun, “Siangpahrang nih a fapa kha a ṭah lengmang ko,” tiah an theih. 3Cun raltuknak hmun in an zam tikah an ning a zak i a thli tein khua chungah an luh bantuk khin, cu ni ah cun mizapi cu a thli tein khua chungah cun an lut. 4Siangpahrang cu a hmai aa khuh i siangpahrang cu aw thang piin, “Maw ka fapa Absalom, maw Absalom, ka fapa, ka fapa!” tiah a ai. 5Khi tikah Joab cu inn chungah siangpahrang sinah khan a lut i, “Nihin ah hin nangmah nih, nihin i nangmah na nunnak le na fapa hna le an fanu hna an nunnak le na nupi hna le na nuchun hna an nunnak a khamhtu hna na sinum vialte hna hmai cu ningzahnak in na khuh cang; 6zeicahtiah nangmah nih nangmah an huatu cu na dawt hna i an dawtu cu na huat hna. Zeitintiah nihin ah hin na ralbawi hna le an sinum hna cu na caah zeihmanh an si lo ti kha fiang tein na langhter cang; zeicahtiah nihin ah hin Absalom kha nung seh law kannih vialte hi thi dih u si law, cu nih cun an lawmhter deuh hnga, tiah nihin ah hin ka hmuh. 7Cucaah atu ah tho law, na sinum hna sinah khan nem tein va chim tuah; zeitintiah Bawipa min chalh in chiat ka ser, na kal lo ahcun, mi pakhat hmanh tuzan ah hin na sinah an um lai lo; cun na tlanval ri in atu tiangah an tlunhnawhtu ṭhat lonak vialte nakkhan mah hihi na caah a ṭha lo deuh lai,” tiah a ti. 8Khi tikah siangpahrang cu a tho i kutka ah khan a ṭhu. Cun mi vialte kha an chimh hna i, “Zohhmanh, siangpahrang cu kutka ah khan a ṭhu,” tiah an ti; mi vialte cu siangpahrang hmaiah khan an ra.
Israel mi vialte kha cu, anmah le an inn cio ah an zam dih cang. 9Israel phun an dihlak chungah khan mi vialte, pakhat le pakhat i alnak a um i, “Siangpahrang nih khan kan ral hna kut chungin a rak kan chuah i, Filistin mi hna kut chungin a rak kan khamh; atu cu Absalom sinin ram chungin a zam cang. 10Sihmanhsehlaw kanmah uktu ding i chiti kan thuhmi Absalom cu raltuknak hmun ah a thi cang. Cucaah zeicahdah siangpahrang kirpi ṭhannak ding kongah hin zeihmanh nan chim lo,” tiah an i ti.
11Cun David Siangpahrang nih Zadok le Abiathar, tlangbawi hna kha, mah hi bia hi a hei cah hna i, “Judah upa hna cu, ‘Israel mi vialte an bia cu siangpahrang sin a phak cang tikah hin, zeicahdah nannih cu siangpahrang kha a inn i kirpi ṭhan awkah a hmanung bik nan si lai?” a ti tiah rak chim hna u. 12Nannih cu ka unau nan si, ka ruh le ka sa nan si; a si kun ahcun, zeicahdah siangpahrang kirpi ṭhan awkah a hmanung bik nan si lai,’ a ti, tiah rak chim hna u. 13Cun Amasa kha, ‘Nangmah cu ka ruh le ka sa na si lo maw? Nangmah cu Joab hmun ah ka ralkapbu haotu na si lo ahcun, Pathian nih cu bangin le cu nak tam zongin ka cungah tuah ko seh,’ a ti, tiah rak chim u,” tiah a ti. 14Cun Judah mi vialte kha minung pakhat lungthin bantukin an lungthin kha a lak dih hna i cucaah annih nih siangpahrang cu bia an hei cah i, “Nangmah he na sinum vialte he ra kir dih u,” tiah an ti. 15Cucaah siangpahrang cu Jordan ah khan a ra kir i siangpahrang cu va don awk le siangpahrang cu Jordan tiva tanpi awkah Judah mi cu Gilgal ah an kal.
16Cun Benjamin phun Gera fapa Shimei, Bahurim khuami kha, David Siangpahrang don awkah cun khulrang in Judah mi hna sinah khan a ra ve; #2Sam 16.5-13 17cun amah sinah cun Benjamin mi thong khat an um. Cun Saul innchungkhar sinum Ziba kha a fapa hleinga le a sinum pakul he tiah, siangpahrang hmaiah khan Jordan tiva ah cun an rung tli, 18cun siangpahrang innchungkhar kha lak awk le a duhnak kha tuah awkah tiva kha a tannak ah khan an tan. Cun Gera fapa Shimei cu siangpahrang hmaiah khan, Jordan tiva kha a vun tan hnik lioah khin, a bawk i 19siangpahrang sinah cun, “Siangpahrang ka bawipa nih Jerusalem in na chuah ni i na cungah na sal nih zeitindah palhnak ka tuah kha ka bawipa nih ka cungah mawhnak ah ka ruahpiak hlah law a cin zong ka cinkenpiak sawh hlah; siangpahrang nih a lung chungah i chiah sawh hlah seh, 20zeitintiah ka sual cang ti kha na sal nih ka hngalh; cucaah zohhmanh, Josef innchungkhar vialte hna lakah a hmasa bik ah rat i siangpahrang ka bawipa cu don awkah nihin ah ka ra,” tiah a ti. 21Zeruiah fapa Abishai nih khan, “Bawipa chiti thuhmi kha chiat a rak serh caah, mah caah khan Shimei hi thah awk a si lo maw?” tiah a leh. 22Sihmanhsehlaw David nih, “Nannih Zeruiah fapa hna, nannih nan i thlak awk zeidah a um, nihin i keimah caah ral bantuk nan si hnga cu? Nihin ah hin Israel mi ahohmanh thah awk a si hnga maw? Zeitintiah nihin ah hin Israel mi cungah siangpahrang ka si kha hngal loin maw ka um?” tiah a ti. 23Cun siangpahrang nih Shimei cu, “Na thi lai lo,” tiah a ti. Cun siangpahrang nih a sinah chiat a ser.
24Cun Saul tupa Mefibosheth kha siangpahrang don awkah a rung; siangpahrang a kal ni thawk in him tein a kir ṭhan ni tiang, a ke zong kha a milhtlorh hna lo, a khahmul zong kha a riam hna lo i a hnipuan zong kha a su hna lo. #2Sam 9.1-13; 16.1-4 25Cun siangpahrang don awk i Jerusalem in a rat ah khan, siangpahrang nih amah cu a thawh i, “Zeicahdah ka sinah na kal ve lo, Mefibosheth?” tiah a ti. 26Cun anih nih a leh i, “Maw siangpahrang ka bawipa, ka sinum nih a rak ka hlen; zeitintiah na sal nih amah cu, ‘Laa pakhat in ka danhpiak tuah, kaa cit i siangpahrang sinah ka kal nakhnga,’ tiah ka ti. Zeitintiah na sal cu kebei ka si. 27Cun na sal cu siangpahrang sinah a ka thangchiat cang. Sihmanhsehlaw siangpahrang ka bawipa cu Pathian vancungmi bantuk a si ko; cucaah nangmah nih a ṭha na timi paoh tuah ko. 28Zeitintiah ka innchungkhar vialte cu siangpahrang ka bawipa hmaiah cun thah awk i khilmi men pei an hei si ko cu; asinain nangmah nih na salpa cu na cabuai i rawl a eimi hna lakah na ka chiah. Cucaah siangpahrang sinin thil dang a hal ngam ding ka si ti hnga maw?” tiah a ti. 29Cun siangpahrang nih amah cu a thawh i, “Na konglam cu zeicahdah na chim ṭheo rih? Bia ka khiah cang; nangmah le Ziba nih ram cu nan i cheu lai,” tiah a ti. 30Cun Mefibosheth nih siangpahrang cu a thawh i, “Siangpahrang ka bawipa cu a inn i him tein a rat cang hnu paohpaoh ahcun, amah nih a dihlak in i lak ko seh,” tiah a ti.
31Cun Gilead mi Barzillai kha Rogelim in a rung i Jordan tiva ral tiang hei thlah awkah khan siangpahrang sinah cun Jordan tiva tiang a va kal. #2Sam 17.27-29 32Barzillai cu upa ngaingai a si, kum sawm riat a si; cun siangpahrang cu Mahanaim i a um lioah khan rawl a rak pek; zeitintiah amah cu mirum ngaingai a si. 33Cun siangpahrang nih Barzillai cu a thawh i, “Keimah sinah ra law, Jerusalem khua ah kan cawm lai,” tiah a ti. 34Sihmanhsehlaw Barzillai nih siangpahrang cu, “Kum zeizat hen dah nun awk kaa bat rih i siangpahrang sinah Jerusalem ah ka hei kal hnga cu? 35Keimah cu nihin ah hin kum sawm riat ka si; zei hi dah a nuam i zei hi dah a nuam lo ti kha ka thleidan khawh ti maw? Na sal nih hin ka eimi siseh, ka dinmi siseh, a thawtnam hmanh ka theih khawh ti maw? Hlasami pa hna le hlasami nu hna an aw hoi hna kha ka ngaih khawh ti maw? Cu a si caah cun zeicahdah na sal cu siangpahrang ka bawipa caah aa chapmi thilrit ka si lai? 36Na sal nih hin siangpahrang cu Jordan tiva ral ah khin tlawm tein ka hei in kalpi rih lai. Zeicahdah siangpahrang nih cu bantuk laksawng cun a ka lehrulh hnga? 37Keimah ka khuate ah ka pa le ka nu hna thlan pawngah ka thih nakhnga, na sal hi ka kirter ko. Sihmanhsehlaw hika ah na sal Khimham a um hih; amah nih hin siangpahrang ka bawipa cu in zul seh law, nangmah nih a ṭha na timi paoh tuahpiak ko,” tiah a ti. 38Cun siangpahrang nih a leh i, “Khimham cu keimah sinah a kal lai i nangmah nih a ṭha na timi paoh ka tuahpiak lai; cun keimah sinin hmuh na duhmi vialte kan tuahpiak lai,” tiah a ti. 39Cun mi vialte nih khan Jordan cu an tan i siangpahrang nih khan a tan; cun siangpahrang nih Barzillai kha a hnamh i thluachuah a pek i amah a inn ah khan a kir. 40Siangpahrang cu Gilgal tiang a lan i Khimham cu amah sinah cun a kal; Judah mi vialte le Israel mi hnarcheu nih siangpahrang cu an kalpi.
41Cun Israel mi vialte cu siangpahrang sinah khan an ra i siangpahrang cu an thawh i, “Zeicahdah kan unau Judah mi hna nih a fir in an in fir i siangpahrang le a innchungkhar hna le David mi vialte hna cu Jordan va ral ah an in chuahpi hna?” tiah an ti. 42Judah mi vialte nih Israel mi cu an leh hna i, “Zeicah ti ahcun, siangpahrang cu aa naihmi kan rualchan a si caah a si. Zeicahdah nannih cu hi kong ah nan thin a hun? Siangpahrang nih maw rawl a kan rin? Asiloah, laksawng zeital a kan pe maw?” tiah an ti. 43Cun Israel mi nih Judah mi cu an leh hna i, “Siangpahrang chungah hin vo hra pei kan ngeih tiah, cun David chung zongah hin nanmah nakin tam deuh kan ngei. A si kun ahcun, zeicahdah nan kan zawmhtaih? Kan siangpahrang cu tlunpi ṭhan u si tiah a ti hmasa biktu cu kanmah kan si lo maw?” tiah an ti. Sihmanhsehlaw Judah mi hna bia cu Israel mi hna bia nakin a hrang deuh.

Currently Selected:

2 SAMUEL 19: HCL06

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy