2 SAMUEL 15
15
Absalom Nih David Kha A Doh
1Hi hnuah hin Absalom nih rangleng pakhat le rang hna le a hmai i a tlitu dingmi sawm nga aa chiah hna. 2Cun Absalom cu zing tein a tho tawn i hauka lam pawngah a dir tawn; cun siangpahrang hmai i chuahpi awk bia a ngeimi paoh cu Absalom nih a rak auh hna i, “Khuazei khuami dah na si?” tiah a rak ti hna. Cun annih nih, “Na sal hi Israel mi lak i cu phun kha phun cu ka si,” tiah a leh tikah, 3Absalom nih annih cu a thawh tawn hna i, “Zohhmanh, na bia cu a ṭha i a dik ko; sihmanhsehlaw nangmah bia ngaihpiak awkah siangpahrang nih a thiahmi ahohmanh an um lo,” tiah a ti tawn hna. 4Cuhleiah Absalom nih cun, “Hi ram chungah hin keimah hi biaceihtu hei si ning law ka hei duh dah! Bia ngeimi le tazacuai duhmi vialte kha ka sinah an ra hnga i ding tein bia ka ceihpiak hna hnga,” tiah a ti. 5Cun amah cu upatnak pek awk i mi nih an hei fuh tikah khan, a kut a rak i chuah i a rak hnamh lengmang hna. 6Cuticun Absalom nih siangpahrang sin i biaceih awk i a rami Israel mi vialte hna cungah khan a tuah. Cucaah Absalom nih Israel mi kha an lung a fir hna.
7Cun kum li donghnak ah khan Absalom nih siangpahrang cu a thawh i, “Hebron khua i Bawipa sinah biahrennak ka rak tuahmi kha va tlinter awkah, zaangfahnak tein ka kalter tuah. 8Zeitintiah na sal nih Aram ram Geshur i ka um lioah biahrennak pakhat ka rak tuah i, ‘Bawipa nih Jerusalem ah a ka kirpi taktak ahcun, Bawipa sinah biaknak ka pekchanh lai,’ tiah ka rak ti,” tiah a ti. 9Siangpahrang nih cun, “Dai tein va kal tuah,” tiah a ti. Cucaah a tho i Hebron ah a kal. 10Sihmanhsehlaw Absalom nih Israel mi phun vialte hna sinah khan a thli tein lamkal a thlah hna i, “Muko thawng kha nan theih cangka, ‘Absalom cu Hebron ah siangpahrang a si!’ tiah nan ti lai,” tiah a ti hna. 11Absalom sinah khan sawmmi mi za hnih Jerusalem khua khan an kal ve, zei thuanghna loin an va kal ve ko i zeihmanh an hngal lo. 12Cun Absalom nih raithawinak kha a pekchanh lioah David tlangchuak, Gilon mi Ahithophel kha amah khua Giloh khan a hei cah. Cun ralthli khua an khan ṭinak cu a ṭhawng chin lengmang i Absalom mi cu an karh chin lengmang.
13Cun lamkaltu pakhat David sinah khan a ra i, “Israel mi cu Absalom leiah an lungthin a tlu cang,” tiah a ti. 14Cun David nih Jerusalem ah a sin i a ummi vialte hna kha, “Tho u law, zam u si; Absalom sin hin kan caah luatnak um loin a um sual lai; khulrang in kal u, cu ti a si lo ahcun a kan phanh sual lai i kan cungah ṭhat lonak a tlunter sual lai i khuapi hi vainam in a sam dih sual lai,” tiah a ti. 15Cun siangpahrang sinum hna nih khan siangpahrang cu, “Zohhmanh, na sal hna hi siangpahrang kan bawipa nih tuah awk tiin bia a khiahmi paoh tuah dingah kan i manh ko,” tiah an ti. 16Cucaah siangpahrang cu aa thawh i a innchungkhar vialte nih an zulh. Cun siangpahrang nih nuchun pahra inn zohkhenhtu ah a chiahtak hna. 17Cun siangpahrang cu a kal i mi vialte nih khan an zulh; cun inn hriang bik ah khan an i din. 18Cun a sinum vialte kha a pawng cun an lan; cun Khereth mi vialte le Peleth mi vialte le Gath khua in amah a zulmi Git mi za ruk vialte kha siangpahrang hmaiah cun an lan.
19Cun Git mi Ittai kha siangpahrang nih a thawh i, “Zeicahdah nang zong ka sin i na kal ve? Va kir law siangpahrang sinah cun va um tuah; zeitintiah nang cu ramdangmi na si i na inn in a zammi na si fawn. 20Nizan lawng i a rami na si i ka vahvaihnak kip ah maw kan vahpi hnga, khuazei ah ka kal lai ti awk hmanh ka hngalh ṭung lo? Va kir ṭhan law na unaule hna hi nangmah sinah kirpi hna; Bawipa nih a fekmi dawtnak le zumhawktlak a sinak cu in hmuhsak ko seh,” tiah a ti. 21Sihmanhsehlaw Ittai nih siangpahrang cu a leh i, “Bawipa nih a nun bangin le siangpahrang ka bawipa nih a nun bangin, siangpahrang ka bawipa a umnak hmun paoh ah, thih siseh nun siseh, khika ah na salpa cu ka um ve lai,” tiah a ti. 22Cun David nih Ittai cu, “A si ahcun, kal law lan ko kun,” tiah a ti. Cucaah Git mi Ittai cu a mi vialte le amah sin i a ummi ngakchia vialte hna he khan an lan. 23Cun mi vialte an lanh cuahmah caah ram vialte cu fak piin a ṭap, siangpahrang nih Kidron tivarek kha a tan i mi vialte cu ramlak leiah khan an lan.
24Cun Abiathar kha a hung i, zohhmanh, Zadok zong kha Levi mi vialte he Pathian biakamnak kuang kha i zawn in an ra ve; cun mi kha khua chungin an chuah dih hlantiang Pathian kuang kha vawlei ah khan an chiah ko. 25Cun siangpahrang nih Zadok cu a thawh i, “Pathian kuang kha khua chungah va kirpi ṭhan tuah. Bawipa hmaiah mithmai ṭha ka hmuh ahcun, a ka kirpi ṭhan lai i mah hi he, a umnak he a ka hmuhter ṭhan lai; 26sihmanhsehlaw, ‘Nangmah chungah lawmhnak ka ngei lo,’ a ka ti ahcun, zohhmanh, hika ah ka um ko, amah nih a ṭha a timi paoh cu ka cungah tuah ko seh,” tiah a ti. 27Siangpahrang nih tlangbawi Zadok sinah cun, “Zohhmanh, dai tein khua chungah cun, nangmah le Abiathar cu, nan fapa pahnih hna, Ahimaaz, nangmah fapa le Jonathan, Abiathar fapa he tiah, va kir tuah u. 28Zohhmanh, ramlak i tiva tannak ah khan keimah thanh awkah nan sinin bia ka hmuh hlantiang ka rak um lai,” tiah a ti. 29Cucaah Zadok le Abiathar nih Pathian kuang kha Jerusalem ah an hei kalpi ṭhan i khika ah khan an um.
30Sihmanhsehlaw David cu Oliv Tlang cho ah khan ṭappah lengmang le kelawng le a lu i khuh in a kai; cun a sin i a ummi vialte nih khan an lu an i khuh i an kai, an kalpah cun an ṭap lengmang. 31Cun David cu, “Ahithophel kha ralthli khua a khangtu hna lakah Absalom sinah aa tel ve,” tiah an chimh. Cun David nih, “Maw Bawipa, Ahithophel khuaruah thiamnak cu hruhnak ah canter ko sawh, tiah kan nawl,” tiah a ti.
32Cun David cu tlangpar i Pathian biaknak hmun kha a phak tikah, zohhmanh, Arki mi Hushai kha a angkileng tlek le a lu ah vawlei i phulh in amah ton awkah khan a ra. 33David nih amah cu a thawh i, “Ka sinah na kal lengmang ve a si ahcun, keimah caah thilrit na si lai. 34Sihmanhsehlaw khua chungah na va kir i Absalom cu, ‘Maw siangpahrang, na sal ka si ko lai; kan hnulei caan ah na pa sal ka si bantuk khan atu cu nangmah sal ka si lai,’ na va ti ahcun, Ahithophel khuakhannak kha na ka teipiak lai. 35Tlangbawi Zadok le Abiathar hna kha khika ah na sinah an um a si lo mei? Cucaah siangpahrang inn ah na theihmi vialte cu tlangbawi Zadok le Abiathar hna kha chim hna. 36Zohhmanh, an fapa pahnih hna kha an sinah khika ah an um, Zadok fapa Ahimaaz le Abiathar fapa Jonathan hna kha; cun na theihmi vialte cu anmah sinin na hun ka thanh lai,” tiah a ti. 37Cucaah Absalom kha Jerusalem a luh liote ah cun David hawi Hushai cu khua chungah cun a lut.
Currently Selected:
2 SAMUEL 15: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006