2 CHANRELNAK 21
21
Jehoram Pennak
(2Sia 8.16-24)
1Jehoshafat cu a pupa hna sinah a it i a pupa hna sinah David khua ah an vui; cun a fapa Jehoram cu amah hmun ah khan a hung bawi. 2Unau a ngei hna, Jehoshafat fapa hna kha: Azariah, Jehiel, Zekhariah, Azariah, Mikhael le Shefatiah an si; an dihlak hin Judah siangpahrang Jehoshafat fapa an si. 3An pa nih laksawng ngan pipi sui laksawng, ngun laksawng le man sungmi thilri laksawng kha Judah ram chung i kulhmi khua hna he tiah a pek hna; sihmanhsehlaw pennak cu Jehoram kha a pek zeicahtiah amah cu a fapa upa bik a si. 4Jehoram cu a pa bawi ṭhutdan cung i a kai i a feh tikah, a unau vialte cu vainam in a thah hna i Judah ram bawi a cheukhat zong kha a thah hna. 5Jehoram cu siangpahrang a can tikah kum sawm thum le kum hnih a si i Jerusalem in kum riat a uk. 6Cun Ahab innchungkhar nih an tuah bantuk khan, Israel siangpahrang hna lam kha a zul; zeitintiah a nupi cu Ahab fanu a si. Cun Bawipa mithmuh i thil ṭhalo kha a tuah. 7Asinain, David sin i biakamnak a sermi ruangah khan le amah le a fapa hna cu zungzal in meiinn kan pek lai tiah bia a kam caah Bawipa nih David innchungkhar kha hrawh a duh lo. #1Sia 11.36
8Amah chan ah cun Edom nih Judah uknak kha a doh i anmah tein siangpahrang an i chiah ve. #Gen 27.40 9Cun Jehoram le a ralbawi hna le a rangleng vialte hna cu an i chawk i amah le a rangleng ralbawi a kulhtu hna kha zan ah a tuk hna i an thah hna. 10Cucaah Edom nih Judah uknak cu nihin tiang hin a doh. Cun kha caan ah khan, Bawipa, an pupa hna Pathian cu a hlawt caah Libnah zong nih khan a uknak kha a doh.
11Cuhleiah Judah tlang ram ah khan khuahrum bo a ser hna i Jerusalem khuami kha zumhawktlak lo sinak chungah a luhpi hna i Judah mi kha lam a pialter hna. 12Cun a sinah profet Elijah sinin ca pakhat a ra i, “Hi bangin, Bawipa, na pa David i a Pathian nih, ‘Na pa Jehoshafat lam kha na zulh hna lo i Judah siangpahrang Asa lam zong kha na zulh hna lo i, 13sihmanhsehlaw Israel siangpahrang hna lam kha na zulh hna i Ahab innchungkhar nih Israel mi an pialter hna bang khan nangmah nih Judah ram mi hna le Jerusalem mi hna kha na pialter hna i nangmah nakin a ṭha deuhmi na unau hna, na pa innchungkhar mi a simi hna kha na thah hna caah, 14zohhmanh, na mi hna le na fale hna le na nupi hna le na ngeihmi vialte cungah Bawipa nih rai nganpi a tlunter lai i 15nangmah cu paw fah zawtnak a fakmi na ngei lai i ni khat hnu ni khat in na ril cu cu zawtnak ruangah cun a chuak lai,’ a ti,” tiah a ti.
16Cun Ethiopia mi hna pawng i a ummi Filistin mi hna le Arab mi hna thinhunnak cu Jehoram cungah khan Bawipa nih a thawhter i 17Judah cu an hunhnawh i an chim i siangpahrang inn chung thil a si tiah an hmuhmi vialte le a fapa hna le a nupi hna zong kha an kalpi dih hna i a fapa hniang bik Jehoahaz dah ti lo kha cu fapa pakhat hmanh an nganh ta lo.
18Cun mah hi thil vialte dih hin Bawipa nih a paw ah a dam kho lomi zawtnak a tlunter. 19Cun kum hnih hnuah cu zawtnak ruangah cun a ril cu an chuak i nganfak ngaingai in a thi. A mi hna nih, a pupa hna ca i rak tuahmi meiphu bantuk kha an tuah lo. 20Pen hram a thawk ah kum sawm thum le kum riat a si i Jerusalem in kum riat a pen; cun ahohmanh ngaihchiat loin a thi. David khua chungah khan an vui; sihmanhsehlaw siangpahrang hna thlan ah khan cun an vui lo.
Currently Selected:
2 CHANRELNAK 21: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006