YouVersion Logo
Search Icon

2 CHANRELNAK 13

13
Abijah Pennak
(1Sia 15.1-8)
1Siangpahrang Jeroboam a bawi kum hleiriat kum ah Abijah nih Judah ram kha pen hram a thawk. 2Jerusalem ah kum thum a bawi. A nu min cu Mikaiah a si, amah cu Gibeah rammi Uriel fanu a si.
3Cun Abijah le Jeroboam karlak ah khan ralnak a um. Abijah cu miralṭha ralkap thim khunmi thong za li he raldohnak hmun ah cun an kal i Jeroboam nih khan a ṭhawngmi ralkap thim khunmi thong za riat he a rak orh ve. 4Khi tikah Efraim tlang ram i a ummi Zemaraim Tlang ah khan Abijah cu a dir i, “Maw Jeroboam le Israel mi vialte hna, ka bia thei tuah u! 5Bawipa, Israel Pathian nih Israel mi cung i siangpahrang sinak cu David le a fapa hna sinah zungzal ca in cite biakamnak in a pek cang ti kha hngalh awk nan si lo maw? 6Asinain, Nebat fapa Jeroboam, David fapa Solomon i a sal cu a tho i a bawipa kha a doh; 7cun Rehoboam cu a no i lungthin fek a ngeih rih hlanah khan, mizeiruaramlo le santlailo pawl kha a sinah an i ṭom i Solomon fapa Rehoboam cu an doh i anih nih a rak celh hna lo.
8“Atu cu mi tampi nan si ca le Jeroboam nih pathian an serpiakmi hna sui cawfa kha nan sinah nan i chiah hna caah nannih nih David fapa hna kut chung i Bawipa pennak cu doh awkah nan ruah. 9Nannih nih Bawipa tlangbawi hna, Aaron fapa hna le Levi mi hna kha nan dawi hna i ramdangmi hna bantukin tlangbawi nanmahte in nan i ser hna lo mei? Ahopaoh cawtum no in siseh tuukawng pasarih in siseh aa thianhmi paoh cu pathian a si ṭung lomi hna tlangbawi ah khan an cang ko. 10Sihmanhsehlaw kannih tu cu, Bawipa cu kan Pathian a si i amah cu kan hlaw lo. Bawipa rian a ṭuantu ah tlangbawi Aaron fapa hna kha kan ngei hna i an rian a ṭuantu ah Levi mi kha kan ngei hna. 11Kannih nih cun Bawipa kan Pathian nawlbia kha kan zulh caah Bawipa sinah zinglei fate le zanlei fate khangh thawinak le rim thawmi zihmui kha an pekchanh i sui thiang cabuai cungah khan hun camcinmi changreu kha an hun i zanlei fate sui meivannak tung cu a meiinn kha an alh naklai an zohkhenh; Bawipa nih a kan fialmi kha kan tuah; sihmanhsehlaw nannih nih cun amah cu nan hlawt. 12Zohhmanh u, kan hmaisuang ah Pathian cu a um i nannih doh awk i thawng thanhtu ah tlangbawi hna cu an raldohnak muko he an um. Maw Israel fale hna, Bawipa nan pupa hna Pathian cu doh hlah u, zeitintiah nan hlawhtling lai lo,” tiah a ti.
13Jeroboam nih lamhruang ortu, an hnulei in a hun chuah hnawhtu ding hna kha a thlah hna; cucaah a ralkapbu hna cu Judah mi hna hmaiah an um i lamhruang ortu hna cu an hnulei in an um. 14Cun Judah mi nih khua an zoh tikah, zohhmanh, ral cu an hmailei he an hnulei he an um; cun Bawipa kha an auh i tlangbawi nih khan muko an tum. 15Khi tikah Judah mi hna cu raldohnak au khan an au. Cun Judah mi kha an au tikah Pathian nih Jeroboam le Israel mi vialte kha Abijah le Judah mi hna hmaiah a sunghter hna. 16Israel mi cu Judah mi hmaiah an zaam i annih cu Pathian nih an kut chungah a pek hna. 17Abijah le a mi hna nih khan tampi an thah hna; cucaah Israel mi thim ciammammi sing nga an thi. 18Cuticun Israel mi hna cu khi tan ah khan an sung i Judah mi hna nih Bawipa, an pupa hna Pathian kha an i bochan caah an tei hna. 19Cun Abijah nih Jeroboam kha a dawi i a khua kha a chuh hna: Bethel le a pawngkam khuate hna, Jeshanah le a pawngkam khuate hna le Efron le a pawngkam khuate hna. 20Abijah chan ah cun Jeroboam nih a ṭhawnnak kha a hmu ṭhan kho ti lo i Bawipa nih a tuk i a thi. 21Sihmanhsehlaw Abijah cu a ṭhawng chin lengmang. Cun nupi hleili a ṭhit hna i fapa kul le pahnih le fanu hleiruk a ngeih hna. 22Abijah tuahsernak a tang rihmi, a umtu ningcang hna le a chimmi hna cu profet Iddo ṭialmi tuanbia cauk chungah an i ṭial.

Currently Selected:

2 CHANRELNAK 13: HCL06

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy