1 SIANGPAHRANG 4
4
1Solomon Siangpahrang cu Israel mi vialte cungah siangpahrang a si i 2mah hna hi a bawi ngan cu an si: Zadok fapa Azariah cu tlangbawi ah a si; 3Shisha fapa hna Elihoref le Ahijah kha caṭialtu an si; Ahilud fapa Jehoshafat kha cazin ṭialtu a si; 4Jehoiada fapa Benaiah kha ralkapbu haotu a si; Zadok le Abiathar kha tlangbawi an si; 5Nathan fapa Azariah kha peng uktu bawi hna cung bawi a si; Nathan fapa Zabud cu tlangbawi le siangpahrang kawi a si; 6Ahishar cu siangpahrang inn zohkhenhtu a si, Abda fapa Adoniram cu hnekmi rian zohtu a si.
7Solomon nih Israel mi vialte cungah bawi pahleihnih a ngei hna, annih nih siangpahrang le a innchungkhar kha rawl khua an khanpiak hna; kum khat chungah pakhat nih thla khat ca cio rawl khua a khan awk a si. 8Mah hihi an min cu an si: Efraim tlangram ah Ben-hur; 9Makaz, Shaalbim, Beth-shemesh le Elom-beth-hanan khua hna ah Bendeker; 10Arubboth ah Benhesed, (Soko le Hefer ram vialte cu amah ta an si); 11Nafath-dor vialte ah Ben-abinadab (Solomon fanu Tafath kha a nupi a si); 12Jezreel thlang Zarethan pawng i a ummi Beth-shean vialte le, cun Beth-shean in Abelmeholah tiang, cun Jokmeam khattelei ral tiang, cun Taanak le Megiddo ah Alihud fapa Baana; 13Ramoth-gilead ah Bengeber (amah nih Manasseh fapa Jair i a khua hna, Gilead i a ummi hna kha a ngeih hna i cun Bashan i a ummi Argob peng khua ngan sawm ruk vampang le dar kothrolh a ngeimi hna a ngeih hna); 14Iddo fapa Ahinadab kha Mahanaim ah; 15Ahimaaz kha Naftali ah (Solomon fanu Basemath kha nupi ah a ṭhit); 16Asher le Bealoth ah Hushai fapa Baana; 17Issakhar ah Paruah fapa Jehoshafat; 18Benjamin ah Ela fapa Shimei, 19Amor mi siangpahrang Sihon le Bashan siangpahrang Og hna an ram Gilead ram ah Um fapa Geber. Cun Judah ram ah bawi khat a um.
20Judah le Israel mi hna cu rilikam i thetse zat khin an tam; an ei an ding i an i lawm. 21Solomon nih Zufrates in Filistin mi hna ram le Izipt ramri tiang ram vialte cu a uk dih hna; a nun chung vialte Solomon sinah cun ngunkhuai an thawh i a rian an ṭuan. #Gen 15.18; 2Cha 9.26
22Solomon ni khat ca rawl cu changvut dip rel sawm thum le changvut rel sawm ruk, 23a thaumi cawtum pahra, ram hnonak caw pakul, tuu za khat an si, sakhi, sazuk, nengpi le cenhmi ar chim loin. 24Zeitintiah amah nih Zufrates tiva in nitlaklei ram vialte Tifsah in Gaza tiang, Zufrates tiva nitlaklei siangpahrang vialte kha a uk hna i a velchum dihlak in daihnak a um. 25Cun Solomon a nun chung vialte cu Judah mi hna le Israel mi hna kha Dan in Beersheba tiang, anmah le an mitsur ruang tang le an theipi kung tang cio ah him tein khua an sa. 26Solomon nih a rangleng hna hnuktu rangtum hna caah rang inn sang li le rangcung ralkap thong hleihnih a ngeih hna. #1Sia 10.26; 2Cha 1.14; 9.25 27Cun kha bawi hna nih khan, anmah le an thla te cio ah khan Solomon Siangpahrang le Solomon Siangpahrang cabuai i a rami vialte caah khan, rawl khua an khan i zeihmanh an bauter lo. 28Cun anmah le an rian ning cio ah, rangtum hna le tlik mumi rang hna caah a herhnak hmun paoh ah khan barli le ramro zong an rak put hna.
29Cun Pathian nih Solomon cu fimnak le hngalhthiamnak tah cawk loin le lungkauhnak rilikam thetse zat in a pek. 30Cucaah Solomon fimnak nih nichuahlei mi vialte fimnak le Izipt fimnak vialte kha a lonh dih hna. 31Zeitintiah amah cu midang vialte nakin a fim deuh, Ezrah mi Ethan le Mahol fapa hna Heman, Kalkol le Darda nakin a fim deuh; cun a min cu a pawngkam ram dihlak ah a thang. #Slm 89 (A tlangpi) 32Cun phungthlukbia zong thong thum a chim i a hla cu fung thong khat le fung nga an si. #Phut 1.1; 10.1; 25.1; Sol 1.1 33Thing kong, Lebanon i a ummi thing in i thawk in vampang chungin a hung kheumi hissop tiang a chim tawn; cun saram le vate le a lawnmi thilnung hna le nga hna kong zong kha a chim fawn hna. 34Cun miphun kip chungin le vawlei cung siangpahrang vialte hna sinin a fimnak a theimi paoh nih Solomon fimnak theih awkah cun an ra.
Currently Selected:
1 SIANGPAHRANG 4: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006