Zechariah 1
1
Topa kungah A Mite A cia kik natu Sapna.
1Persia kumpilianpa Darius maan zawk a kum niina, a tha liat tha sungah Topa in Iddo tupa, Berechiah tapa kamsaangpa Zechariah tungah hi thu pia hi. #Ezra 4:24—5:1; 6:14 2Vaanglianbelpa Topa in mipite tungah hi thu a son tu in Zechariah sawl a, “Na taanghpupite tungah keima, Topa ka thin uuk mama hi, 3ahihang tu in no tungah kong ci hi, ‘Kei kungah hong heakkik tavun, tuaciang keima no sangah kong kiheak tu hi. 4Na taanghpupite taw kibang nawn heak vun. Khuangeipi lai in kamsaangte in amate kungah ka thupuak sonin, ngamtat sia, mawna taw a nuntak nawn ngawl natu in thuhil uh hi. Ahihang amate in ka thu hong ngai nuam ngawlin hong mang nuam bua uh hi. 5Na taanghpupite le tua kamsaangte nungta nawn ngawl hi. 6Na taanghpupite tungah ka naseam kamsaangte tungtawnin thupiaknate le kidop natu thute ka pia hi, ahihang amate in tuate thusim ngawl a, a ngamtatna taw a kizui in ngimna thuak uh hi. Tuasia ciang amate kisiik kikin, keima, a Vaanglianbelpa Topa in amate taw a kiphu bang le ka sep tu tatak a ka khensat bangin daan ka piak hunlam hong tel uh hi,’ ” cisak hi.
Kamsaangpa ii Siphute A Mukholna
7Darius sia kumpilianpa in a maan zawk a kum niina, a tha sawm le tha khatna (Shebat tha), ni 24 ni zanin Topa in mukholna khat sungah thupuak khat nei hi. 8Siphu san khat tungah a to khat ka mu hi. Ama sia myrtle thingkung pawlkhat kawm, kuam sung khat ah tawlnga a, ama nungsangah siphu dangte — a san, a pawl tiptep le a kaangte om hi. #Tpl 6:4; Tpl 6:2 9Ama ka dongh a, “Topa awng, hi siphute in bang khiakna nei ziam?” ka ci hi.
Ama in, “Bang ci nuam ziam kong lak tu hi. 10Topa in tuate leitung a enkot tu in paisak hi,” ci in hong zo hi.
11Amate in tua vantunglalang tungah: “Leitung theampo ah pai zo ung, leitung buppi sia a cimaw, a kizo sa in om hi,” ci uh hi.
12Tua zawkciang vantunglalang in, “Vaanglianbelpa Topa awng, Jerusalem tung le Judah ngam khuapite tungah kum sawmsali sung thin uuk zo ni hi. Amate na hesuak tu bang tanvei hai lai tu ziam?” ci hi.
13 Topa in heenepna kammal taw vantunglalang tungah zo kik a, 14tuaciangin hi Vaanglianbelpa Topa pauna thangsak tu in vantunglalang in kei hong sawl hi: “Ka khuapi thiangtho Jerusalem atu in thinbotna le itna thukpi ka nei hi, 15tuaciang kilemna le ngamdaina a nga minamte tungah ka thin uuk mama hi. Banghang ziam cile ka mite tungah ka thin uukna iip kenkonin ka om laitak tua minamte in ka mite thuakna nasiasak seseam hi. 16Tua ahikom Jerusalem khuapi tungah ka hesuakna lak tu in kong pai kik zo hi. Ka Biakinnpi kipua pha kik tu a, khuapi kisa kik tu hi,” ci hi.
17Vantunglalang in Topa kammal hi teng zongh thangsak tu in hong sawl hi: “Vaanglianbelpa Topa in a khuapite nuamsa kik tu a, ama in Jerusalem khatvei hu kikin, ama khuapi in nei kik tu hi, ci hi.”
Sakiite Mukholna
18Mukholna dang sungah khuital kii li ka mu hi. 19Keima hong paupui vantunglalang tungah, “Hi sakiite a khiakna bang ziam,” ci in ka dongh hi.
Ama in, “Tuate in Judah, Israel le Jerusalem mite a kithethaangsak simlei vaangliante a cinopna ahi hi,” ci in hong zo hi.
20Tuaciang Topa in sek veu a toai naseam pasal li hong lak hi. 21Keima in, “Hi mite bang vawt tu in hong pai ziam?” ci in ka dongh hi.
Topa in, “Amate in Judah ngam suthamin a mite a thethaangsak minamte a lausak tu le a lawnthal tu in hong pai hi,” ci in hong zo hi.
Currently Selected:
Zechariah 1: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016