Kaa late 1
1
Jerusalem Khua Mite ii Khuangaina
1Khatvei lai in mihing taw a kidim Jerusalem khuapi
bangza in ngamkhing ziam!
Leitung ii khatvei a zatak ngei sia tu in meingongnu khat taw kibang hi;
khuapi teng po pan a tuanngenbel sia sila dinmun ah taak zo hi.
2Zankhuateakin ama kap a; a biangkho ah thitui luang suk vahii hi.
A lawm a ngual masa te khat zongh ama heeneam tu taang ngawl hi,
A kipawlpuite in ama leeheak zo a, tu in langpan tek ta uh hi.
3Judah ii mite sia inn pan zawthawk thu taw a kihawlkeak a cimaw silate ahi uh hi.
Ngamdang ah amate sila in om a, a mun, a ngam ci tu nei ngawl uh hi —
Ngalte in kiim uum a, a suatak natu lam bing hi.
4Ni thiangtho nite ah biakna vawt tu in, Biakinnpi ah kuama hong pai ngawl hi.
Tua munah lasa ngaknute in ngim thuak a, a thiampite mau vangui thei bek hi.
Khuapi kongpite hawm a, Zion in ngim thuak hi.
5A ngalte in ama zo a; amate khutnuai ah koi hi.
A khialna tam mamate hangin
Topa in ngim thuaksak hi;
A tate kipummat in kipaipui hi.
6Jerusalem phatna sia bo zo hi.
A lampuite sia sangai ngilkial a thazawm,
savaite mai ah a tai ciang a tha bo dedek te bang ahi hi.
7Tu in a ngamkhing, a siacip sa
Jerusalem khua in nidang a
phatna nung phaw kik hi.
A ngalte khut sung a thet ciang a hu tu kuama om ngawl hi;
A ngallelna sia ama a zote in nuisan uh hi.
8A minphatna teng bo a; a pumnguak in om a ngual zawnsak thuak hi.
Ama tau a maizum in a mai seal hi.
Jerusalem in lipkhaphuai mawna taw ama le ama kininsak hi.
9A thiantho ngawlna ol tak kimu a, ahizong a thuak tu sia awlmawk ngawl hi.
Ama lelna sia nasia leilam a kuama in heeneam zo ngawl hi.
A ngalte in zothal ahiciang, Topa tungah hesuak ngen in kap hi.
10A ngalte in ama ii a nei a lamh theampo suttol hi.
Topa ii Gentile te pai tu a khaamna mun Biakinnpi sung mama ah a ngalte a tum sia ama in mu hi.
11A mite in bang khat po
neak tu a zon uh ciang mau vangui uh hi;
Amate in a nuntak thei natu in
a nei a lamhte an taw theak uh hi.
“Kei hong en ka ven, Topa awng;
ka ngim nga zia hong mu ta'n,” ci in a khuapi bup in ko hi.
12“Kei hong en ka ven!” ci in ama kaantan in a pai theampo tungah ko hi.
“Kei nat bangin kuama in a na thuak ngeingawl hi. Topa in a thin uuk laitak hong thuaksak natna a hi hi.
13“Ama in tungsang pan mei hong khiaksuk a, tua mei in ka sung hong kaangh hi.
Ama in kei thaang hong sia a, lei ah hong sial hi.
Tua zawkciang ama in hong taisan a,
a na thuak tan tu in hong nusia hi.
14“Ama in ka mawna theampo ciamtee a, a vekpi in sawm khawm hi;
Tuate ka ngawng kiim ah hong awsak a, a ngitna thuak la in ka thazawm hi.
Topa in ka ngalte khut sungah hong aap a, ka cimaw hi.
15“Topa in ka ngalkap thahatbelte theampo nuisan lel a;
Ama in ka tangvalte a lalsak tu in ngalkaphonpi khat puak hi.
Sapit ngoaina sungah sapitngate kingoai thap bangin ka mite ama in sucip hi.
16“Tua hu in ka mittangte thitui taw kidim leet hi.
Kuama in hong heeneam thei ngawl a; kuama in hong hanthawn thei ngawl hi.
Ngalte in hong zothal a; ka mite in bangma nei nawn ngawl uh hi.
17“Ka khutte zan kaleng kuama in hong hu ngawl hi.
Mun theampo pan kei hong langpan tu ngalte Topa in sam zo hi.
Amate in a kiihuai nate bangin kei hong vawt hi.
18“Ahihang Topa sia a maan hi a, keima in a thu ka nit ngawl hang hi zaw hi.
Hong ngai tavun, mun theampo a om mite awng; a na ka thuak hong en tavun.
Ka ngaknute le ka tangvalte sia ngalmat in kipaipui siat zo hi.
19“Ka pawlpuite ka sam a, ahihang amate in hong hu nuam ngawl hi.
Thiampite le lampuite sia nuntak natu an a zon laitak ma in khuapi lampite tungah thi uh hi.
20“Topa awng, na ka sak nate, ka thinbot vangui nate hong en ta'n!
Ka mawnate hangin khuangai in ka thin tamhtham hi.
Lampite ah kithalupna om a; innsuum sungsang ngawngawn ah thina theng hi.
21“Ka tau nate hong ngai ta'n; hong heeneam tu kuama om ngawl hi.
Tuasiatna nong thuaksak manin ka ngalte lungdam uh hi.
Nong kamciam ni hong thengsak ta'n a; keima thuak bangin ka ngalte thuaksak in.
22“Amate seksolnate theampo hu in amate ningkhiin in;
Ka mawnate hu in daan nong piak bangma in amate daan pia in.
Thasiatna taw ka tau a, ka thin na hi.”
Currently Selected:
Kaa late 1: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016