Jude 1
1
1Jesus Christ ii naseam, James ii suapuipa Jude kung pan — #Mt 13:55; Mk 6:3
Pa Pathian ii itna sung le Jesus Christ ii kepcingna sung a nungta Pathian ii sapsate tungah laithak ahi hi:
2Hesuakna, thinnopna, ki itna a kicingin note aa hi tahen.
Thuhilsya Maan ngawlte
3Ka it lawmte awng, ih nei khop tek ngupna huvau hong at nuam ing, ka ci laitakin, Pathian ii mihingte tungah a tawntung atu in khatvei a piak upna huvau ngal ih sim kul lai hi, ci in hanthot nopna ka thinsung ah thakhatin hong suak hi. 4Pathian a nei ngawl mihing pawlkhatte ei sungah hong tum ku ahikom, amate ii pheangtatnate a kam zonna in, Pathian ii thuthiamna thute ahi ngawl lamin zeak a, eima bek ii To le Topa ahi Jesus Christ sia nial uh hi. Ngeitawng lai in Laithiangtho in amate puavawkna a thuakna thute sonkhol zo hi.
5Na heaksa uh ahitazong, Topa in Israel te sia Egypt ngam pan suatak napi, a thu um ngawlte sia a khak sang ciangin, susiacip hi ci in kong phawksak nuam hi. #Pu 12:51; Mi 14:29-30 6Amate thuneina ciaciang sungah a om po ngawl, a teenna a nusia vantunglalangte phawk tavun: amate sia leinuai khuazingna ah tawntung thikkol kibul a, amate tungah thu a kitan tu Pathian ii Ni lianpi ni dong atu in Pathian in koi hi. 7Sodom, Gomorrah le a kiim khuapite zongh phawk tavun, tua vantunglalangte bangin ngamta a, numei le pa paktatna le ngeina ngawl bangin mawna vawt uh hi: amate sia mihing theampo ii a kidop thei natu in, tawntung meikuang sungah daan a thuak uh hi. #Pian 19:1-24
8Tuasia bangma in hi mihingte in amate ii pumpi mama a khialsak tu mukholnate nei a; amate in Pathian ii thuneina zawngsakin, tung sangah a minthangte nunau uh hi. 9Vantunglalangte sung pan a lianbel Michael zongh in hi bangin ngamta ngawl hi. Moses luanghawm sia Doaimangpa taw a kituu laitakin, Michael in Doaimangpa sia kamsia taw na lang ngawl a, “Topa in nang hong teih tahen,” na ci bek hi. #Dan 10:13,21; 12:1; Thkna 34:6; Zec 3:2 10Ahihang hi mite in a tel ngawl nate sia nunau in, selno uh hi; tuaciang nganhing bangin, amate ii a pianpui thinsung uh taw a heak thei nate in amate lalsak uh hi. 11Amate atu in bangza in lauhuai ziam! Amate in Cain ii lampi tawn uh hi. Balaam khial bangma in, amate sia sum huvau in puk uh hi. Korah ii a langpan bangin, amate zongh in langpan uh a, ama bangma in kilalsak hi. #Pian 4:3-8; Mi 22:1-35; 16:1-35 12Amate sia a maizumhuai neakna dawnna taw ngualnuamin om uh a, noma ii kipawlkhop anneakpoai uh hong nokkhaksakte ahi hi. Amate in a kaangsung atu bek kin hi. Amate sia vui ii seam nguatui a paai ngawl meeikaaite taw kibang hi: tangngam hun dongin a nga mama a nga ngawl thingkungte le a kizunglok a thicip sa thingkungte taw kibang hi. 13Amate sia tuipi sung a, tui kihualte taw kibang a, amate ii a maizumhuai ngamtatnate sia, tuiphuante bangin kilangh hi. Amate sia khuazing belna sung, a tawntung a om natu mun Pathian ii a koi kholsak, a vakthap aksite taw kibang hi.
14Adam suan a khang salina, Enoch in hi bangin, amate huvau sonkhol hi. “Topa sia a vantunglalang thiangtho tul tam mama te taw hong pai tu a, #Pian 5:18,21-24 15mihingte theampo tungah thutanna vawt tu le, Pathian awlmawk ngawl ngamtatnate le Pathian sel mawneite ii Pathian langpanna a lauhuai kam paunate tungah puavawkna vawt tu hi!” ci hi.
16Hi mihingte in a tawntungin, phunin ngual veu mawsiat uh hi; amate in a ngitlo nopna thinpuakte zui uh hi; amate le amate kisuangtaakin, a dei uh sia a nga thei natu in, ngualdangte sialpok uh hi.
Kidop natu Hilna le Thupiakna
17Ahihang lawmte awng, a bosa hun sungah ih Topa Jesus Christ sawltakte ii hong son thute na phawk tavun. 18Amate in “Ni tawpkhak hun hong thet ciangin, note hong selno tu mihing hong piang tu a, tua mihingte in pathian sel amate ii deinate zui tu uh hi,” hong ci hi. #2 Pe 3:3 19Hi mihingte in kikhenna a piangsakte hi a, cii le sa deina in amate uk in, Thaa a nei bua uh hi. 20Ahihang no, ka lawmte awng, a thiangthobel na upna tungah kikipsak seseam vun. Thaa Thiangtho vaangletna sungah thungen tavun, 21tuaciang, ih Topa Jesus Christ ii hesuakna taw tawntung nuntakna hong piak tu ngakin na om uh laitakin, noma le noma sia Pathian ii itna sungah kikeamcing tavun.
22A um tatak zo ngawlte tungah hesuakna na lak tavun; 23midangte sia meikuang sung pan dokin, hun tavun; a dangte tungah hesuakna le kiitakna kithua in, na lak tavun a, ahihang amate paktat mawna taw nin a baang sa puante mama na ensan tavun.
Pokna Thunget
24Tu in na puk ngawl natu in, hong keam thei a, ama ii minthanna mai ah a sitbaang ngawl le lungdamna lianpi taw hong then thei — 25ama bek Pathian ahi ih Ngumpa tungah ih Topa Jesus Christ tungtawnin, minthanna, vaangletna, thahatna le thuneina sia, a bosa hun theampo sung, tu le a tawntungin om top tahen! Amen.
Currently Selected:
Jude 1: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016