John 6
6
Jesus in Pasal Tulnga Anvaak
(Mt 14:13-21; Mk 6:30-44; Lk 9:10-17)
1Tua zawkciang, Galilee tuili (Tiberias Tuili zongh kici) kaantanin Jesus pai hi. 2Mi honpi khat in a nungzui hi, banghang ziam cile ciina damsakna taw ama ii nalamdang laknate mu uh hi. 3Jesus sia mual khat tungah kaato a, a nungzuite taw tokhawm hi. 4Paisan Poai hun hong nai hi. 5Jesus in a kiimkot a et ciangin, mi honpi khat ama kungah hong zuan mu a, tua ahikom Philip munah, “Koisung pan hi mihingte theampo ih vaak khom natu an lei thei tu hi ziam,” ci hi. 6(Hi bangin a ci sia Philip a ze etna hi; ama in a vawt tu tatak sia a heakkhol sa hi.)
7Philip in, “Mihing sim ii tawmno tek a neak khom tu bek zongh ngun dangka zanii vaal taw anluum lei kul tu hi,” ci in zo hi.
8A nungzuite sung pan a dang khat Simon Peter ii suapuipa Andrew in, 9“Hi sungah om patangno khat in, mangtaang anluum nga le ngasa nii nei hi. Ahihang tua teng sia hi mi theampo atu in, kicing ngawl het tu hi,” ci hi.
10Jesus in amate tungah “Mihingte tosak vun,” ci hi. (Tua munah lopa tam om hi.) Tua ahikom mihing theampo to siat uh hi; pasal 5,000 bang pha uh hi. 11Jesus in anluumte la a, Pathian tungah lungdamko in, tua munah a to mihing teng hawmsak hi. Ama in tuabang ma in ngasate zongh hawm a, amate a vekpi in a du zaza ne uh hi. 12Amate a kham siat zawk uh ciang, a nungzuite munah ama in, “A kham vaal teng kaikhawm vun; bangma pakvawt bua tawng,” ci hi. 13Tua ahikom amate in a khop siat uh ciangin, mihonte neak mangtaang anluum nga panin, a kham vaal uh khum sawm le khum nii nga uh hi.
14Hi nalamdang lakna Jesus ii vawt a mu uh ciangin, tua munah a om mihingte in, “Hi sia leitung a hong pai tu Kamsaangpa hi takpi hi!” ci uh hi. 15Amate hong pai in kumpi suaksak tu in zawthawk thu taw ama man tu kipan ahi sia Jesus in he hi; tua ahikom ama nguakin, mual tungah pai san kik hi.
Jesus Tui tungah Lampai
(Mt 14:22-33; Lk 6:45-52)
16Nitak sang ciangin, Jesus ii nungzuite tua tuili ah paisuk uh a, 17ngunkuang sungah to in, Capernaum ah tuili kaantan in pai kik uh hi. Khua hong zan zo a, Jesus amate kung hong zuan ngawl lai hi. 18Tua hun laitak, nasia takin vuiva a, tui kilok hi. 19Nungzuite in kilometre 5 bang 6 bang ngunkuang a haw zawkciang, Jesus tui tungah lampai in, ngunkuang nai ah hong pai a mu uh ciang, amate lau uh hi. 20Jesus in, “Lau heak vun, keima khi hi!” ci hi. 21Tuasia ciangin amate tha lawp takin, Jesus ngunkuang tungah kaasak uh a, amate zot nopna mun ah thakhat thu in theng uh hi.
Mihingte in Jesus Zong
22A zing ciangin, tuili langkhat ah a taam mihonpite in, tua mun ah ngunkuang khat bek a om hunlam phawk kik uh hi. Tua ngunkuang sungah, ama ii nungzuite taw Jesus paikhawm ngawlin amate nguak a pai hunlam phawk uh hi. 23Topa ii lungdam a ko zawkciang mihon ii anluum neakna mun taw a kinaina tuili vaal ah, Tiberias pan hong pai ngunkuang dangte hong theng hi. 24Mihonte in Jesus ahizong, ama ii nungzuite ahizong tua munah a mu ngawl uh ciang, ngunkuangte tungah kaa in, ama zong tu in Capernaum khua ah pai uh hi.
Jesus Nuntakna Anluum
25Mihingte in tuili langkhat ah Jesus a mu uh ciangin, ama munah, “Syapa awng, hi sung bang hunin theng ni ziam,” ci uh hi.
26Jesus in, “A tatakin kong ci ciang, kei nong zon uh sia, nalamdang ka laknate na tel uh hang hi ngawlin, anluum na du uh za a na neak uh hang ahi hi. 27A sia thei an atu in, naseam heak vun; tua sangin a kikhomsuan tawntung nuntakna an atu in seam zaw vun. Hisia in Mihing Tapa ii no hong piak tu an ahi hi, banghang ziam cile Pa Pathian in ama tungah lungkimin tepteena koi zo hi,” ci in zo hi.
28Tua ahikom, amate in, “Pathian in kote seam le hong oai te ka sep thei natu in bang vawt thei tu khu ziam,” ci in dongh uh hi.
29Jesus in, “Pathian ii no sep tu a dei nasep sia, ama ii a sawlpa na up tu uh ahi hi,” ci in zo hi.
30Amate in “Ko ii mu thei tu uh le nang kong up thei natu in, bang nalamdang lakna vawt tu ni ziam? Bang vawt tu ni ziam? 31laithiangtho in ‘Ama in vantung panin amate neak tu anluum pia hi,’ a ci bangma in, ka taanghpupite in sennealngam sungah manna ne uh hi,” ci in zo kik uh hi.#Pu 16:4; 15; Ps 78:24
32Jesus in “A tatakin ka ci hi: Moses ii no hong piak anluum sia vantung pan hi ngawl hi. Vantung pan no atu anluum tatak hong pia pa sia ka Pa ahi hi. 33Banghang ziam cile, Pathian hong piak anluum sia in, hi leitung ah nuntakna a pia tu in, vantung pan hong paisuk pa ahi hi,” ci hi.
34Amate in, “Topa awng, hi anluum hong pia tawntung ta'n,” ci in ngen uh hi.
35Jesus in, “Keima in, nuntakna anluum ka hi hi. Kei kungah hong paite in, a ngilkial ngei nawn ngawl tu hi; kei hong umte in, a dangko ngei nawn ngawl tu hi. 36Tu in note in kei hong mu zo napi nong um buatu uh hi, kong ci sa ahi hi. 37Ka pa hong piak mihing theampo kei kungah hong pai tu hi. Kei kung hong zuan peuma ka nial ngei buatu hi, 38banghang ziam cile keima aituam deina a seam tu in vantung pan hong pai ka hi bua a, hong sawlpa deina a seam tu in, hong pai ka hi hi. 39Tuaciang kei hong sawlpa ii deina sia, hong piaksa theampo sung pan khat zongh bosua ngawl het in, ni tawpkhak ni in, amate teng nuntakna sungah, ka thawsak siat tu sia ahi hi. 40Banghang ziam cile ka Pa ii deina sia, Tapa mu a, ama a umte theampo in tawntung nuntakna a nga natu ahi hi. Tuaciang ni tawpkhakbel ni in, amate nuntakna sungah ka thosak tu hi,” ci hi.
41“Keima in vantung pan hong paisuk anluum ka hi hi,” a ci hu in, mihingte in ama phunsan siasua uh hi. 42Tua ahikom, amate in “Hisia pa sia Joseph ii tapa Jesus hi kana ngawl ziam? A pa le a nu ih heak hi. Tua ahile bangbang, tu in vantung pan kong paisuk hi, ci thei ziam?” ci uh hi.
43Jesus in, “Noma sung tengah phun teaptuup nawn heak vun. 44Kei hong sawl Pa in kei kungah hong puak buale, kuama kei kungah hong pai thei ngawl hi; tuaciang ni tawpkhak ni ciang nuntakna sungah ama ka thosak tu hi. 45Kamsaangte in, ‘Pathian in mihing sim hil tu hi,’ ci in at zo hi. A kuama po Pa ii hilna za a, ama kung pan heakna a ngate bek kei kungah hong pai hi.#Is 54:13 46Hisia ka ci ciang, khat po in, Pa mu ngei hi, cinopna hi ngawl hi; Pathian kung panin, hong pai sia bek in Pa mu ngei hi. 47A maan takin kong ci hi: a um sia in tawntung nuntakna nga hi. 48Keima in nuntakna anluum ka hi hi. 49Na taanghpupite in sennealngam sungah manna ne uh hi, ahihang amate thi hi. 50Ahihang vantung pan hong paisuk anluum sia nam tuam khat hi a, a ne peuma thi ngawl tu hi. 51Keima in vantung pan hong pai a nungta anluum ka hi hi. Khat po in hi anluum a ne le nungta tawntung tu hi. Ama ka piak tu anluum in, leitung mite nuntak thei natu a, ka piak ka taksa ahi hi,” ci in zo hi.
52Hi thu in, amate sungah thin uuk in, kinialna kipansak hi. “Bangbangin hisia pa in, a taksa neak tu in, ei hong pia thei tu ziam?” ci uh hi.
53Jesus in amate munah, “A maan takin kong ci hi: Mihing Tapa ii taksa na ne bua uh a, a chi na dawn bua uh le, note sungah nuntakna na nei buatu uh hi. 54A kuama po ka taksa ne a, ka chi a dawnte in, tawntung nuntakna nga a, ni tawp khakbel ni ciangin nuntakna sungah ka thosak tu hi. 55Banghang ziam cile ka taksa sia an tatak hi a, ka chi sia dawn tu tatak ahi hi. 56Ka taksa ne a, ka chi a dawn pawpo in kei sungah teang a, kei amate sungah ka teang hi. 57A nungta Pa in kei hong sawl a, ama hangin, kei zongh ka nungta hi. Tuasia bangma in, kei hong ne peuma kei hangin nungta tu hi. 58Tua hi a, hisia in vantung pan hong paisuk anluum ahi hi; na taanghpupite neak anluum taw kibang ngawl hi. Amate in ne in thi veve hi, ahihang hi anluum a nete in, a tawntungin nungta tu uh hi,” ci hi.
59Jesus in Capernaum khua synagogue ah hi teng hil hi.
Tawntung Nuntakna Kammalte
60A nungzuite tam mama in hi thu za uh a, “Hi kihilcianna sia haksa leih hi. Akua in hi thu ngai zo thong tu ziam,” ci uh hi.
61Kuama ii son ngawl bulin, Jesus in amate ii phunna thu he ahikom, amate munah, “Hisia in, na thin uh hong kiamsak tu ziam?” 62“Tua le, sonteena, Mihing Tapa sia ama om maksakna munah a paito kik mu le uhte bang na ci tu uh ziam? 63Nuntakna a pia sia Pathian ii Thaa ahi hi; mihing thahatna in mannung mama ngawl hi. No tungah ka pau sa kammalte in nuntakna a pia Pathian ii Thaa hong tut ahi hi. 64Ahihang no pawlkhat in um ngawl nu hi,” ci hi. (Jesus in a kipatciil pan ma, akua teng in um ngawl tu a, akua in ama leeheak tu cisia a heaksa ahi hi.) 65Tuaciangin ama in “Ama ii tuabang ahithei natu in, Pa in vawt buale, kuama kei kungah hong pai thei ngawl tu hi, kong cisia, hisia hang mama ahi hi,” ci thua lai hi.
66Hisia hangin, Jesus ii nung a zuite tam mama heak kik uh a, ama taw tonkhawm nawn ngawl hi. 67Tua ahiciang, nungzui sawm le niite munah ama in “No zongh, nong nusia nuam tu uh ziam?” ci in dongh hi.
68Simon Peter in, “Topa awng, akua kung pai tu khu ziam? Tawntung nuntakna a pia kammalte nangma in na nei hi. 69Tuaciangin nang sia Pathian kung pan hong pai, a Thiangtho Pa na hi hunlam tu in kong he uh a, kong um uh hi,” ci in zo hi.#Mt 16:16; Mk 8:29; Lk 9:20
70Jesus in, “No sawm le nii teng, keima kong teal hi kana ngawl nu ziam? Tua hi napi, no sungah khat sia doai ahi hi,” ci hi. 71Ama in Simon Iscariot ii tapa Judas huvau son ahi hi. Banghang ziam cile Judas sia nungzui sawm le nii sungah khat hi napi ama a leeheak tu pa ahi hi.
Currently Selected:
John 6: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016