John 5
5
Tuili ah Ciidamsakna
1Tua zawkciang, Jerusalem khua Biakna poai ah Jesus pai hi. 2Jerusalem Tuu Kongpi hui ah, talaap nga taw kithua tuicing khat om hi; tua mun sia Hebrew kam in Bethzatha kici hi. 3Mittaw, peangbai, pumzaw ciina honpui khat sia, tua talaapte sungah lum uh hi. 4Amate in tui a kilok tu ngak uh hi, banghang ziam cile tu le tu in Topa ii vantunglalang khat in tua tui sungah tuaksuk a, tui sau hi. Tui kinok laitak a tuaksuk phit cina sia in, bang natna po a vei zong dam thiang hi. 5Kum sawmthum le kum liat cina sa pasal khat tuak ah om hi. 6Jesus in tua pa a lup sia mu a, khuangei mama a ciinat hunlam he hi; tua ahikom, “Na dam nuam ziam?” ci in dongh hi.
7Cinapa in, “Syapa awng, tui a kinok laitak kei hong khiasuk tu, hi sungah kuama ka nei bua hi; tuisung theng nuamin, ka hanciam hang, ngualdang veu tuaksuk masa hi,” ci in zo hi.
8Jesus in “Tho in, na lupna phah luakin a, lampai in,” ci hi. 9Thakhat thu in tua pasalpa dam hi; ama in a phah luakin, lampai tu in kipan paih hi.
Hi thu a pian ni sia Sabbath ni ahi hi. 10Tua ahikom Jew thuneite in a kidamsakpa munah, “Tuni Sabbath ni hi, na phah na puak tu sia ih thukham taw kisi ngawl hi,” ci uh hi.#Neh 13:19; Jer 17:21
11Ama in, “Hong damsakpa in ka phah ka lua tu le lampai tu in hong sawl hi,” ci in zo hi.
12“Hi bang ngamta a hong sawlpa akua ziam,” ci in dongh uh hi.
13Ahihang damsakna a ngapa in, Jesus akua cisia a he bua hi, banghang ziam cile tua munah mihon khat om ahiciang Jesus kiheam hi.
14Tuasia zawkciang Jesus in Biakinnpi sungah ama mu a, “Hong ngai ta'n, tu in dam zo ni hi; tua ahiciang, mawna vawt nawn heak in, tua ahibuale a nasia zaw thuak thei tu ni hi,” ci hi.
15Tua zawkciang pasalpa in paisan a, ama a damsak sia Jesus ahi hunlam Jew thuneite kungah son hi. 16Tua ahikom, amate in Jesus vawtsia tu kipan uh hi, banghang ziam cile ama in hi ciidamsakna Sabbath ni in seam hi. 17Jesus in amate tungah, “Ka Pa a tawntungin naseam a, kei zongh ka sep kul hi,” ci in zo hi.
18Hi bang a pauna in, Jew thuneite ii Jesus a thalup nopna khangsak seseam hi; Sabbath thukham paltan bek dom ngawlin, Pathian sia ama ii aituam Pa hi a ci ciang, ama le ama Pathian taw a za kikimsak ahi hi.
Tapa ii Thuneina
19Tua ahikom amate kungah Jesus in, “A tatakin kong ci hi: Tapa in ama thu taw bangma vawt thei ngawl hi; a Pa ii vawt a mu teng bekma vawt hi. Pa ii vawt teng Tapa zongh in vawt hi. 20Pa in Tapa it ahikom ama ii vawt teng theampo ma lak hi. Hite sangin a lian zaw lai, a vawtte ngawngawn lak tu a, note theampo in lamdang na sa tek tu uh hi. 21Pa in mithite thosak a, nuntakna a piak bangma Tapa in a piak nopte tungah nuntakna pia hi. 22Pa in kuama tungah thukhen ngawl hi. Ama in a Tapa tungah thukhen theina thu a cingin pia hi, 23tua thu sia mihing theampo in Pa a zatak bangma in, Tapa a zatak natu ahi hi. Tapa a zakta ngawl po in ama a sawl ahi Pa sia zakta ngawl hi.
24“A tatakin kong ci hi: ka kammalte za a, kei hong sawlpa a um pawpo tawntung nuntakna nei hi. Amate tungah thu kikhen ngawl tu a, thina pan nuntakna sungah theng zo hi. 25A tatakin kong ci hi: a hun hong tung tu a — hong tutung zo hi — tua hun ciang a thisate in Pathian Tapa ii aw za tu a, tuaciangin a zate hong nungta tu uh hi. 26Pa mama in nuntakna ii naak ahi bangma ama Tapa zongh nuntakna ii naak suaksak zo hi. 27Tuaciang ama ii Tapa sia thukhen theina thupia zo hi, banghang ziam cile ama Mihing Tapa ahi hi. 28Hi thu tungtaang ah lamdang sa heak vun; a thisate theampo in ama aw za tu a, 29thaankuul sung panin hong pusua tu hun hong theng tu hi; na pha a seamsate tho in nungta tu a, siatna vawtte tho in mawsakna thuak tu hi.#Dan 12:2
Jesus atu Tetti Pannate
30“Keima aituam thuneina taw bangma ka vawt thei bua hi; Pathian hong son bang bekin thukhen ka hikom, ka thukhenna maan hi, banghang ziam cile, keima dei bangin sep tu ka hanciam bua a, hong sawl pa dei bangin ka seam hi.
31Keima le keima tetti in ka kipang le ka son sia maan tatak hi, ci in kisaang ngawl tu hi. 32Ahihang kei taangin tetti hong pang a dang khat om a, tuaciangin kei huvau ama sonte maan hi, ci in ka he hi. 33John sia na kamtaite na paisakna uh pa hi a, tuaciang ama in thumaan thutak son hi.#Jn 1:19-27; 3:27-30 34Mihing khat ii tetti panna ka nei tu kul tuan ngawl hi; hisia noma ii na suatak thei natu ka ci bekma ahi hi. 35John sia meiinn taw kibang a, kuangin taang hi, tuaciangin tawmvei sung teng ama ii khuavak sia na leaplaw nuam uh hi. 36Ahihang John ii tetti panna sangin, a lianzaw kei taang a ding tu tetti khat ka nei hi: Pa ii sep tu hong piakte ka sepna po in kei taangin a pau hi a, kei sia Pa hong sawl ahi hunlam lak hi. 37Kei hong sawlpa ahi Pa zongh in, keima taangin tetti pang hi. Note in ama aw na za ngei bua uh a, a maitang zongh na mu ngei bua uh hi, #Mt 3:17; Mk 1:11; Lk 3:22 38tuaciangin ama ii thu hong puak sia na thinsung ah na keam bua uh hi, banghang ziam cile a ma ii hong puakpa na um bua uh hi. 39Laithiangthote na entel uh hi, banghang ziam cile tuate sungah tawntung nuntakna mu tu na ki um uh hi. Tuaciangin hi Laithiangthote mama in, keima ii thu son hi! 40Tua hi napi nuntakna na nga natu in kei kungah nong pai nuam bua uh hi.
41“Keima in mihingte ii pokna a zong hi ngawl khi hi. 42Ahihang no bangbang mihing nam ci sia le na thinsung uh ah Pathian ii itna na nei ngawl uh kong he hi. 43Pa ii thuneina tengma kengin kong pai hangin nong saang bua uh hi; ahihang khat po in ama ii thuneina taw hong pai ciang na saang tu uh hi. 44No khat le khat kipok tu na thangai uh hi, ahihang khat bek ahi Pathian tung pan pokna nga tu na hanciam bua uh hi; tua ahile bangbangin kei hong um thei tu nu ziam? 45Ahihang ka Pa mai ah note maw hong pusak tu sia, kei hi tu in hong um heak vun. Na lam et uh pa Moses sia note hong mawsak tu pa ahi hi. 46Moses na um takpi uh le kei nong up tu uh hi zo hi, banghang ziam cile ama in keima thu at hi. 47Ahihang ama at thute um ngawl na hi uh nungsang, kei kampau bangbangin um thei tu nu ziam?” ci in zo hi.
Currently Selected:
John 5: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016