YouVersion Logo
Search Icon

John 21

21
Jesus Nungzui Salite kungah Kilangh
1Hisia zawkciang Jesus khatvei ma Tiberias Tuili ah nungzuite kungah kilaak hi. A kilaakzia hi bang ahi hi. 2Simon Peter, Thomas (apeang a kici), Nathanael (Galilee ngam Cana khua mi) Zebedee ii tapate, Jesus ii nungzui dangte nii sia kikhawmtua uh hi. 3Simon Peter in, “Kei ngasa paai in ka pai tu hi,” a dangte tungah ci hi.#Lk 5:6
“Ko zong kong zui tu uh hi,” ci in a dangte in son uh hi. Tua ahikom amate in ngunkuang khat taw pai uh hi, ahihang tua zan bup bangma a man bua uh hi. 4Ni hong sua ciangin, Jesus tui hui ah ding hi, ahihang nungzuite in Jesus ahi hunlam a he bua uh hi. 5“Tangvalte awng, bangma man ngawl nu ziam?” ci in Jesus in dongh hi.
“Bangma man ngawl khu hi,” ci in zo uh hi.
6Ama in, “Na ngeen uh ngun kuang ziatsang ah paai le uhte pawlkhat man tu nu hi,” ci hi. Tua ahikom amate in ngeen a paai uh ciang, a dawk kik zo nawn bua hi, banghang ziam cile amate in ngasa tam mama man uh hi.#Lk 5:6
7Jesus ii it nungzuipa in, Peter munah, “Tu a sia Topa hi!” ci hi. Peter in Topa hi ci in a zaak ciang, a puantungsilh taw kituun hi, (Banghang ziam cile ama in a puante suut hi) tuaciangin tui sungah leangsuk hi. 8Nungzui dangte in ngasa a dim ngeen sia kai kawm a, ngunkuang taw vaalbo ah hong pai uh hi. Amate omna sia lei taw a kikhuala lei ngawl, metre za khat na bang ahi hi. 9Amate in vaalbo ah hong kaa uh ciangin, meihol kithut khat mu uh a, a tungah ngasa le anluum pawlkhat om hi. 10Jesus in, “Na mat tawm uh ngasa pawlkhat zongh hong paipui tavun,” ci hi.
11Simon Peter ngunkuang sungah tuakin, ngasa lian a dim ngeen sia vaalbo ah kai hi, a vekpi in 153 pha hi; tuaza in tam ahihang a ngeen ektham ngawl hi. 12Jesus in, “Hong pai tavun a ne vun,” ci hi. A nungzuite kuama in, “Nang kua ni ziam?” ci in a dongh ngam bua uh hi, banghang ziam cile amate in Topa ahi sia he uh hi. 13Tua ahikom amate kung zuan in, anluum la in amate pia hi, ngasa zongh tuabang ma in pia hi.
14Hisia in Jesus ii thina pan a kithaw kiksak zawk, a nungzuite mun a kilaak a thum veina ahi hi.
Jesus le Peter
15An a neak zawk uh ciang Jesus in Peter mun ah, “John ii tapa Simon awng, hi ngualdangte ii hong it sangin, kei nong itzaw ziam,” ci hi.
“Hi hi, Topa awng, nang kong it sia nangma in na he hi,” ci in ama in zo hi.
Jesus in, “Ka tuunote na keam in,” ci hi. 16A nii veina Jesus in, “John ii tapa Simon awng, kei nong it ziam?” ci hi.
Ama in, “Hi hi, Topa awng, nang kong it sia nangma in na he hi,” ci in zo hi.
“Ka tuute na keam in,” Jesus in ci hi. 17A thum veina Jesus in, “John ii tapa Simon awng, kei nong it ziam?” ci hi.
Peter sia Jesus ii, “Kei nong it ziam,” ci in thumvei dong a dok hu in, hee hi, tua ahikom ama munah, “Topa awng na theampo na he hi; nang kong it hunlam na he hi,” ci hi.
Jesus in, ama munah “Ka tuute na keam in. 18A maan takin kong ci hi: na khanmoi lai in, a kinging sa in na om bul a, na uukna theampo ah na pai bul hi, ahihang na khanhaam ciangin, na khutte na vaan tu a, tuaciang khat in khau hong khii in, na uuk ngawlna ah hong paipui tu hi,” ci hi. 19(Hi bang a Jesus ii a ci sia Pathian minthan natu in Peter ii a thi natu teng a sonna hi.) Tua zawkciang Jesus in, “Kei hong zui ta'n,” ci hi.
Jesus le Nungzui Dangkhat
20Peter in, a kiheak ciang a nungah Jesus ii it nungzui dang khat sia mu hi — An a neak uh lai Topa kung to a, neal kawm in, “Topa awng nang akua in hong leeheak tu ziam?” ci in a dongh sia pa ahi hi.#Jn 13:25 21Peter in a mu ciang, Jesus mun ah, “Topa awng, hisia pa bangbangin om tu ziam?” ci in dongh hi.
22Jesus in zo kik a, “Kong pai kik dong ama nungta in ka oai le zong nang bang nuam maw ni ziam, kei hong zui ta'n!” ci hi.
23Tua ahikom tua nungzuipa thi ngawl tu hi, ci in Jesus nungzuite sungah thu kizel hi. Ahihang Jesus in ama a thi buatu hi, a ci hi ngawl hi; ama in “Kong pai kik dong nungta in ka oai le zong bang nuam maw ni ziam?” a ci ahi hi.
24Ama sia hi thute a son nungzuipa hi a, lai taw zongh a atpa ahi hi; tuaciang ama ii sonte sia thumaan hi, ci in ih he hi.
Thukhupna
25Tu in Jesus ii a sep nadang tam mama om hi. Tuate theampo khat zawkciang khat ki atsak siat le leitung bup ah tua laibute ta zo ngawl tu hi ci in ka um hi.

Currently Selected:

John 21: SCB2

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy