John 19
19
1Tua zawkciangin, Pilate in Jesus pusua a, velsak hi. 2Ngalkapte in lingnguite taw kumpilukhu khat vawtin, a lu tungah khusak uh hi; tua zawkciang puantual sandup khat silhsak uh hi, 3tua zawkciang ama kungah hong pai uh a, “Jew te Kumpipa a khansau tahen!” ci hi. Tuaciang amate pai in beang uh hi.
4Pilate khatvei ma pusuak kikin mihon tung ah, “En vun, ama mawsak natu bangma ka mu ngawlna thu na mu natu in, ama hi sungah hong paipui tu khi hi,” ci hi. 5Tua ahikom Jesus sia kumpi ling lukhu khu in, puantual sandup silhin hong pusuak hi. Pilate in, “En vun! Hi sungah ama om hi!” ci hi.
6Thiampi liante le biakinn cingte in a mu uh ciang, “Thinglamtee tungah that vun! Thinglamtee tungah that vun!” ci in au uh hi.
Pilate in amate munah, “Tua ahile noma in ama la in, thinglamtee tungah that vun. Ama ka mawsak natu bangma thu mu ngawl khi hi,” ci hi.
7Mihon in zo kik a, “Ama in Pathian Tapa ka hi ci ahikom thidaan piak tu in kilawm hi a ci thukham khat nei khu hi,” ci uh hi.
8Pilate in hi thu a zaak ciangin, lau vaial hi. 9Ama kumpi inn sungah tum kik a, Jesus munah, “Nang koisung pan hong pai ni ziam,” ci in dongh hi.
Ahihang Jesus in zo ngawl hi. 10Pilate in ama tungah, “Ka kam hong zo ngawl tu ni ziam? Phawk in, na suatak natu le thinglamtee tungah hong kithalup natu thu nei khawm khi hi,” ci hi.
11Jesus in, “Pathian hong piak hu bek in, kei tungah thu na nei hi. Tua ahiciang nang tungah kei hong aap pa in, mawna nasia zaw vawt ahi hi,” ci in zo hi.
12Pilate in hi thu a zaak ciangin, Jesus a suatak natu in lam zong hi. Ahihang mihon au kik a, “Ama na suatak le Kumpilianpa ii lawm na hi bua hi! Kumpi khat ka hi a ci pawpo in, Kumpilianpa a leedo pa ahi hi,” ci uh hi.
13Pilate in hi thute a zaak ciangin ama in Jesus doipua ah paipuisak a, “Suangpheak Kiphana” a kici thukhente tona ah (Hebrew kam in Gabbatha kici hi) to hi. 14Tua hun sia Paisan Poai a thet ma ni khat sunkim dektak hun ahi hi. Pilate in, “Hi sungah na Kumpipa uh om hi,” ci hi.
15Amate in, “Ama that vun! Ama that vun! Thinglamtee tungah that vun!” ci in au uh hi.
Pilate in “Na kumpipa uh thinglamtee tungah ka thalup tu dei nu ziam,” ci in dongh hi.
Thiampi liante in, “Kumpipa khat bek ka nei uh sia Kumpilianpa sia hi!” ci in zo hi.
16Tuasia ciang Pilate in Jesus thinglamtee tungah thalup tu in, amate tungah aap hi.
Jesus Kithat
(Mt 27:32-44; Mk 15:21-32; Lk 23:26-43)
Tua ahikom amate in Jesus la uh hi. 17A thinglamtee pua in ama hong pusuak a, “Lungu Mun” a kici na hong theng hi. (Hebrew kam in Golgotha kici hi) 18Tua munah amate in thinglamtee tungah khai uh hi; pasal nii zongh Jesus lang le lang ah thinglamtee tungah khai uh hi. 19Pilate in heaksakna laino khat at in, thinglamtee tungah taak hi. “Jew te Kumpipa Nazareth khua mi Jesus,” ci in a at hi. 20Jew mite tam ma in sim uh hi, banghang ziam cile, Jesus a kikhaina mun sia khuapi taw a kikhuala bua hi. A lai taak sia Hebrew kam, Latin kam, le Greek kam in ki at hi. 21Thiampi liante in Pilate mun ah, “ ‘Jew te ii Kumpipa,’ ci in at heak in, ‘Hisia pa in, Jew te Kumpipa ka hi hi, ci hi,’ ci in at zaw in,” ci uh hi.
22Pilate in, “Ka at sa sia ka at sa bangma in kip tahen,” ci in zo hi.
23Jesus thinglamtee tungah a kilh zawkciang ngalkapte in ama puansilh te suutin, ngalkap khat sim in, khen khat tek a cin tu in, khen li sua in hawm uh hi. Amate in puantual a silhsak sia zongh la uh hi, tua puantual sia a kikhuina om ngawl, a tuantung khat ahi hi. 24Ngalkapte khat le khat kikum a “Hi sia balkeak bua tawng; akua in ih nga ziam, meesawk tawng,” ci uh hi. Laithiangtho sungah hi bang a ci sia a taangtun natu ahi hi:#Ps 22:18
“Amate in ka puante hawm a,
ka Puantual atu in kikhaam uh hi,”
Hisia in ngalkapte ii ngamtatna ahi hi.
25Jesus ii thinglamtee taw a kinaina ah, a nu, a nu ii suapuinu, Clopas ii zi Mary le Mary Magdalene te ding uh hi. 26Jesus in a nu le ama ii it nungzuipa a ding khawm mu hi; tua ahikom a nu munah “Ama sia na tapa hi,” ci hi.
27Tua zawkciang a nungzuipa munah, “Ama sia na nu hi,” ci hi. Tua hun pan kipan nungzuipa in, a inn ah teang tu in, ama la in ciapui hi.
Jesus Thina
(Mt 27:45-56; Mk 15:33-41; Lk 23:44-49)
28Tu in na theampo khuangkhim siat zo hi, ci in Jesus in he hi; tuaciang laithiangtho kammal a tun natu in, Jesus in, “Ka dangko hi,” ci hi.#Ps 22:15; 69:21
29Tua munah kuang khat sungah sapittui haau om hi, tui huupna khat pap sukin, Hyssop thingbaak dawn ah a thua zawkciang, Jesus muk ah taa uh hi. 30Jesus in tua sapittui a neak zawkciang, “Kizo zo hi!” ci hi.
Tua zawkciang a lu kunsuk in thi hi.
Jesus Pangh Kisun
31Jew thuneite in, Pilate munah a kithatte ii peang a thiatan natu le, thinglamtee tung pan a luangte a laaksuk thei natu in ngen uh hi. Hi bang a nget theina uh sia banghang ziam cile tua ni sia nipi zawk Ni nga ni hi a, hong pai tu Sabbath sia a thiangtho tuam a kingaisun ahikom Sabbath ni in a luangte thinglamtee tungah a om tu a dei bua uh hi. 32Tua ahikom a ngalkapte in, Jesus taw a kikhai khawmte a masa sia pa ii peangte thiaktan a, tua zawkciang a dang khat sia ii peangte zongh thiaktan uh hi. 33Ahihang Jesus kung hong thet uh ciang, ama a thisa in mu ahikom, a peang a thiaktan bua uh hi. 34Ahizong ngalkapte khat in, a tei taw Jesus pang a sut ciangin thakhatin chi le tui hong kee hi. 35(Hi thu na up thei natu in, hi thupiang a mu pa in ama muna bangin hong son ahi hi. Ama thusonte a maan hi a, thumaan son ahi hunlam zongh a son pa in he hi.) 36Hi bangin a kivawt sia laithiangtho kammal a tun natu ahi hi: “Ama ii ngute khat zongh taltan ngawl tu hi,” ci hi.#Pu 12:46; Mi 9:12; Ps 34:20 37Laithiangtho mundang khat ah, “Mihingte in amate ii holletpa sia a en tu uh hi,” ci si hi.#Zec 12:10; Tpl 1:7
Jesus Kiphumna
(Mt 27:57-61; Mk 15:42-47; Lk 23:50-56)
38Hisia zawkciang Arimathea khua mi Joseph in Pilate munah, Jesus luang a laak thei natu in ngen hi. (Joseph sia Jesus nungzui khat hi a, ahizong Jew thuneite a kiitakna taw a thimtham in a zuipa khat ahi hi.) Pilate in a luang phaam thei natu thupia ahikom Joseph in a luang la in paipui hi. 39Zan lai in Jesus taw kimu tu in, a pai masa pa, Nicodemus sia Joseph taw ton hi, ama in thing namtui myrrh le aloe te a kihel kilogramme 30 bang hong paipui hi.#Jn 3:1-2 40Tua pasalte nii in, Jew te ii kiphum tu ciang, a luang a pua kholna ngeina om bangin, Jesus luang la in, hel namtui thau taw zutin, puanneal taw tun uh hi. 41Jesus a kithalupna munah huan khat om a, tua munah kuama a kiphum ngeingawl lai thaankuul thak khat om hi. 42Sabbath hun a tun ma ni khat ni ahi hu le, a thaankuul taw kinai si ahikom, amate in Jesus luang tualai ah sial uh hi.
Currently Selected:
John 19: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016