James 1
1
1Pathian le Topa Jesus Christ ii naseampa James in:
leitung bup ah a kithethaang Pathian mite kong paupui hi.#Mt 13:55; Mk 6:3; Sawl 15:13; Gal 1:19
Upna le Ciimna
2Ka suapuite awng, ze etna namcin na thuak uh ciangin hampha in na kingaisun tavun, 3banghang ziam cile, na upna in tuabang ze etnate na zaw zawkciang, thuak zawkna piang hi ci in na he uh hi. 4Note sia a kicing, a cialcing, bangma a kitaangsamh ngawlte na hi natu in na thuak zawknate in note, puk ngawlin lam tawntung hong khosak tahen. 5Ahihang note khat po in, ciimna na nei buale, a pia tu pa Pathian tungah thu ngen tahen; banghang ziam cile Pathian in ngo tatak le thuthiam takin, a kuama theampo tungah pia hi. 6Ahihang thu na nget uh ciangin, na up tu kul a, up laakna na nei ngawl het tu uh kisamh hi. Up laakna a nei khat pawpo sia, tuipi tungah vui ii seam kawkoai tuihual taw kibang hi. 7-8Tuabang mihing khat, a sepna theampo ah a thin a khensat thei ngawl khat sia in, Topa tung pan bangma nga tu in ngaisun heak hen.
Zawnna le Hauna
9A zawng Tapidawte a zawnna pan Pathian in a lapto ciangin a lungdam tu uh a, 10tuaciangin a hau Tapidawte sia Pathian in a khiasuk le a lungdam tu uh ahi hi. Banghang ziam cile a hau khat sia ngam lopa paak bangin bo tu hi.#Is 40:6-7 11Ni hong suak a, nisa in a kung hal a; a paak pulin a hoina teng siacipsak hi. Tuasia bangma in mihaupa sia a nasepna ah, a sep laitakin kisusia tu hi.
Hong Sitna le Ze etna
12Ze etna haksa a thuak zote in a lungdam mihing ahi hi, banghang ziam cile tuabang hong sit nate a zaw ciangin, Pathian a itte tungah a kamciamsa nuntakna sia tel in saang tu hi. 13Mihing khat sia tuabang haksatnate taw ze etna a thuak le, “Hi ze etna sia, Pathian kung panin hong pai hi,” ci heak hen. Banghang ziam cile Pathian sia siatna in ze et zo ngawl hi, tuaciang ama mama in kuama a ze et bua hi. 14Ahihang mihingte sia, amate ii a pha ngawl deinate in kai a, a awk ciang, ze etna thuak ahi hi. 15Tuasia ciangin amate ii deina pha ngawlte a sung uh ah paai in mawna piangsak hi; tuaciang, mawna hong khanthin tak ciangin thina piangsak hi.
16Ka it suapuite awng, theamna um heak vun! 17A pha tel le ziakte le a cingtaak letsong theampo vantung panin hong pai hi; tua teng sia vantung khuavakte a bitphua, kikheal ngeingawl a, kihei in khua a zingsak ngawl Pathian kung pan hong paisuk hi. 18Ama ii piansaknate theampo sung pan a thupibel ih sua thei natu in, thumaan kammal tungtawnin, ama ii deina om babangin eite hong piangsak hi.
Zaakna le Sepna
19Ka it suapuite awng, hi thu ciamtee tavun! Mihing khat simin thu ngaina thu zaakna ah manlang tu a, ahizong pau papaih ngawl tu a thin uuk papaih ngawl tu kul hi. 20Mihingte thin uukna in, Pathian ii thutang tupna taangtung ngawlsak hi. 21Tua ahikom a kiihuai zongsang nate le seksolnate theampo vawk siat vun. Pathian tungah ki aap vun a, na thinsung ah hong khum a kammal na saang vun, tua in note hong ngum thei hi.
22Ama ii kammal ngaina bek taw noma le noma kitheam heak vun a; ngamtatna taw zui paih zaw vun. 23A kuama po kammal ngai a, a zui ngawlte sia limlangh sung ki en a, ama le ama a pian babangin a kimu mihing khat taw kibang hi. 24Ama le ama pha tak a ki et zawkciangin pusuak a, ama meal bangbang hi ziam cisia mangil paih hi. 25Ahihang mihingte a suaktasak a kicing thukham sia pha takin a et zawkciang thupi ngaisut tawntung a, a zaak sia a mangil kik paih sia hi ngawlin, a zui — a nuntak puite peuma sia Pathian in a sepna ah thupha pia tu hi.
26Khat po in ama sia biakna kin mihing khat hi ing ci in a kingaisun ziam? Ama in a leei a uk zo buale ama ii a biakna sia a luithawthong suak a, ama le ama kitheam ahi hi. 27Pa Pathian ii a thiangtho le biakna tatak hi ci in, a ngaisut sia hi teng hi: tangate le meingongte ii thuakna sung pan khoi natu le leitung siatna panin eima le eima kikep natu ahi hi.
Currently Selected:
James 1: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016