1 Kumpite 1
1
Kumpipa David a Huai a teak Hun
1Kumpipa David sia tu in pasal huai mama khat hi a, a naseamte in puanvante thuapin silhsak hikale a khualum thei ngawl hi. 2Tua ahikom a uliante in ama munah, “Kumpipa awng, nang taw om in hong ou tu numei khangmoi khat hong zonsak tu khu hi. Ama in nangma kungah lum tu a, na khua hong lumsak tu hi,” ci uh hi. 3Israel ngam bup ah ngaknu mealpha khat kizong a, tuabang a mealpha Abishag a kici khat Shunem ah mu a, kumpipa kungah kipaipui hi. 4Ama sia a mealpha mama a, kumpipa zongh ou hi, ahihang ama in nupa vai a nei pui bua hi.
Adonijah in Kumpi tokhum Lua nuam
5-6Tu in Absalom a thi tak ciang David ii Haggith taw a tapa Adonijah sia a nungta lai te sung pan a tapa lianbel ahi hi. Ama sia a mealhoi mama mihing khat ahi hi. David in ama sia bangma hunin teih ngeingawl a, tuaciang ama zongh kumpipa suak nuam mama hi. Ama atu in siphu ngalleangte, siphu te le ama a cing mihing 50 koi hi.#2 Sa 3:4 7Ama in Joab (A nu Zeruiah) le thiampi Abiathar taw thu kikum uh hi, tuaciang amate in ama panpui tu in lungkim uh hi. 8Ahihang thiampi Zadok, Jehoiada ii tapa Benaiah, kamsaangpa Nathan, Shimei, Rei le David a cing te sia Adonijah sangah a pang bua uh hi.
9Ni khat ni in Adonijah in Enrogel cik hui Ngul Suangpi a kicina munah tuute, khuitalte, khuino thaute taw sangaw biakpiakna khat nei hi. Ama in David kumpipa ii tapa dangte le Judah pan kumpipa ii uliante tua sangaw biakpiakna anneakpoai sungah sam hi, 10ahihang ama in a suapui sealh Solomon, kamsaangpa Nathan, Benaiah le kumpipa a cingpa sam ngawl hi.
Solomon Kumpipa in Kikoi
11Tua zawkciang Nathan in Solomon ii nu Bathsheba kungah pai in ama munah, “Haggith ii tapa Adonijah in ama le ama kumpipa a kisuasak hunlam za ngawl ni ziam? Tuaciang Kumpipa David in hi thu bangma he ngawl hi! #2 Sa 12:24 12Nangma le na tapa Solomon ii nuntakna na hu nuam le, ngaisutna hong pia khi hi, 13tu mama in Kumpipa David kungah pai in a, ‘Kumpipa awng, ciliap huai takin kei tungah kamciam nong piakna ah ka tapa Solomon in na kumpi za hong laih tu ci ka na ngawl ni ziam? Tua ahile Adonijah sia bangbangin kumpi suak thei ziam?’ ci in va dongh ta'n,” ci hi. 14Tuaciang Nathan in, “Tuasia ciang Kumpipa David taw na papau laitakin kei kong tum tu a, na thuson teng maan hi kong ci tu hi,” ci lai hi.
15Tua ahikom Bathsheba in kumpipa lupna inndoi sungah ama taw kimu tu in pai hi. Ama huai mama zo a, Shunem panin Abishag in ou hi. 16Bathsheba sia kumpipa mai ah a niamin hong kun a, tuaciang ama in, “Bang uuk ni ziam?” ci in dongh hi.
17Ama in, “Kumpipa awng, Topa na Pathian ii min taw kei tungah ciliap huai takin kamciam nong piakna ah, nang zawkciang kumpi a suak tu sia ka tapa Solomon hi tu hi ci ni hi. 18Ahihang Adonijah sia kumpipa suak zo a, tuaciang hi thu huvau nang bangma he ngawl ni hi. 19Ama in khuital tam ma, tuute, khuino thaute sangaw biakpiakna in pia a, ama in biakpiakna poai ah na tapate, thiampipa Abiathar, na ngalkaphonpi ukpa Joab sam hi, ahihang ama in na tapa Solomon sam ngawl hi. 20Kumpipa awng, Israel mite theampo in na kumpi za hong laih tu sia na son tu hong ngak tek hi. 21Tuabang na hi buale na thi pawpo ciang ka tapa Solomon le kei sia thumaan ngawlte a vawt bangin hong kivawt tu hi,” ci in zo hi.
22Bathsheba a papau laitakin, kumpipa inn sungah Nathan tum hi. 23Nathan a om hunlam kumpipa tungah kison a, kamsaangpa Nathan sungtangin kumpipa mai ah kun hi. 24Tua zawkciang ama in, “Kumpipa awng, Adonijah sia nang hong laih tu kumpipa ci in taangko zo ni ziam? 25Tu ni mama in ama pai a, khuital tam ma, tuu le khuino thaute sangaw biakpiakna in pia hi. Ama in na tapate theampo, na ngalkaphonpi ukpa Joab, tuaciang thiampipa Abiathar te sam a, tu in amate poai khaam in, ‘Kumpipa Adonijah a khansau tahen!” ci in au uh hi. 26Ahihang ama in kei hong sam ngawl hi, topa awng, thiampipa Zadok ahizong, Benaiah ahizong, Solomon ahizong sam ngawl hi. 27Hiteng sia kumpipa ii na thukim ma ziam, nang hong laih tu sia na uliante ngawngawn zongh na son ngawl ma ahi ziam?” ci hi.
28Kumpipa David in, “Bathsheba hong tumsak kik tavun,” a ci ciang ama hong pai a, ama mai ah ding hi. 29Tuaciang ama munah, “Ka ngim nga na theampo pan hong suatakpa, a nungta Topa min taw nang tungah kamciam hong pia khi hi, 30tu ni in Topa Israel te ii Pathian min taw kamciam kong piak sia kholet tu khi hi, na tapa Solomon in keima kumpi za hong laih tu hi,” ci hi.
31Bathsheba kunsuk in, “Ka topa kumpipa nungta tawntung tahen!” ci hi.
32Tua zawkciang David kumpipa in Zadok, Nathan le Benaiah samsak hi. Amate hong pai ciangin, 33ama in, “Ka zum uliante keng vun a; ka tapa Solomon sia ka laa tungah tosak in, Gihon cik ah tha suk tavun, 34tua munah Zadok le Nathan in Israel kumpipa tu in sathau noai tahen. Tua zawkciang lemle tum vun a, ‘Solomon kumpipa a khansau tahen!’ ci in au vun. 35Ka kumpi tokhum tungah to tu in hi munah hong heak kik ciangin, a nung zui vun. Ama in ka kumpi za hong laih tu hi banghang ziam cile ama sia Israel le Judah uk tu in ka tealsa ahi hi,” ci hi.
36Benaiah in, “Na dei bangin ka seam tu hi, tuaciangin Topa in hong kipsak tahen. 37Topa in nang kumpipa hong ompui bangin Solomon taw zong hong omkhawm tahen, tuaciang ama ii kumpi maanna zongh nang sangin mainawt zaw lai tahen,” ci in zo hi.
38Tua ahikom Zadok, Nathan, Benaiah le kumpipa a cingte in Solomon sia Kumpipa David ii laa tungah suan in, Gihon cik ah tha uh hi. 39Zadok in Topa ompuina puanbuk pan a paipui olive thau bung la in, Solomon sathau noai hi. Amate in lemle tum a, mipite theampo au in, “Kumpipa Solomon a khansau tahen!” ci uh hi. 40Tua zawkciang amate theampo in ama nungzui kik a, lungdam in a auna le tamngai a tumna hu in, lei liing khop dongin a aw uh nging hi.
41Adonijah le a leangnate theampo a poai a man kuan ciang, tua awnging za uh hi. Tuaciang Joab in lemle aw a zaak ciang, “Khuapi sungah awnging sia bang khiakna nei ziam?” ci in dongh hi. 42A pau a man ma in thiampi Abiathar ii tapa Jonathan hong theng hi. Adonijah in, “Hong pai ta'n, nang pasal pha khat ni hi, thupha khat hong puak hi nanak tu ni hi,” ci hi.
43Jonathan in, “Thupha hong puak ngawl khi hi,” ci in zo hi. “Kumpi ahi David kumpipa in Solomon sia kumpipa suaksak hi. 44Ama in Zadok, Nathan, Benaiah le kumpipa cingte in thasak hi. Amate in kumpipa laa tungah Solomon tosak uh hi, 45tuaciang Zadok le Nathan in Gihon cik ah sathau noai in kumpi suaksak hi. Tua zawkciang amate lungdamna taw au kawmin khuapi sungah tum uh a, tuasia ciang tu in mipite ngamlum lialua uh hi. Tuasia, tu a na zaak uh awnging sia ahi hi. 46Solomon sia tu in kumpipa suak zo hi. 47Tua teng bek dom ngawlin kumpipa ii uliante pai a, Kumpipa David zatakna pia in, ‘Na Pathian in Solomon sia nang sang zongh in minthangsak zaw lai tahen, tuaciang Solomon kumpi maanna sia nang aa sangin nopci zaw lai tahen,’ ci uh hi. Tua zawkciang Kumpipa David in a lupna tungah kun in biakpiakna vawt a, 48tuaciang in thungen hi, ‘Ka suan ka paalte khat tuni in kei hong laih in kumpi a suasak sia a mu tu in hong nungtasak Israel ii Pathian Topa pok tek tawng,’ ” ci hi.
49Tuasia ciang Adonijah ii leangnate lau in, a vekpi ding a, amate a sansak tek ah pai uh hi. 50Adonijah in Solomon kiita mama ahikom Topa ii ompuina puanbuk sungah pai a, biaknatau kiil lenin om hi. 51Adonijah in ama kiita ahikom biaknatau king lenin om a, ama in, “A masa phitbel in Kumpi Solomon in kei hong thalup ngawl natu kamciam hong pia le dei khi hi,” a ci teng Solomon tungah kison hi.
52Solomon in, “Ama kei tungah hong thumaan po le a luzang samzam khat zongh kithutha ngawl tu hi; ahihang hong thumaan bua ahile thi tu hi,” ci in zo kik hi. 53Tua zawkciang, Solomon kumpipa in Adonijah sia biaknatau panin samsak hi. Adonijah hong pai in kumpipa ii mai ah kun suk a, tuaciang kumpipa in ama munah, “Nang cia thei ni hi,” ci hi.
Currently Selected:
1 Kumpite 1: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016