ZAKHARIX 1
1
Lox Kok Yo Pa Doh Keud Ka Phimap
1Ka daux baux yam kwang simiang Darix, ra num tix num, daux khix daix, gumlox Siyiex hoik hoek ka cao jhai Zakharix #Eza 4:24—5:1, 6:14pa mawh kawn simex Berekhix, kawn simiex Idaw ah nin, 2“Siyiex hoik dawg kied song rhawm ka keeing pex khankix heue.” 3“Mawh kheu nan maix ah nin ka kix. “Siyiex cao kru naing raoma ah nin “Deeh ing hoek ka Aux awx! “Aux tak deeh hoek ka pex heue. “Siyiex cao kru naing raoma ah nan heue. 4“Paw lai yuh awm keeing pex khankix, pa hoik kok cao jhai khankix ka phao voe ah nin, Siyiex cao kru naing raoma ah nin, deeh veeh tix yam in khaing daux krax pa caox caig yuh pex khankix heue.” Viang mawh nan, kix ang nghiet mai ang lai koe krax nghiet ka Aux heue. “Siyiex ah yuh nan heue. 5“Keeing pex khankix koe dee mawx lie? Cao jhai khankix, pon im ju leeing ju lie? 6Viang mawh nan, gumlox beenli pa deuh Aux khankix, ka pa hoik tawm Aux ti deuh ka kawncau Aux pa mawh cao jhai khankix, mawh ang hoek ka keeing pex lie? “Kix hoik deeh ing hoek mai ah nin awm hoik tat Siyiex cao kru naing raoma rhawm rhi tix ti sang yuh ka piang ex, awm koe krax grawng pa yuh ex mai awm koe kaing pa yuh ex, mawh kheu nan, Nawh Cao hoik yuh ka ex heue.”
Krax Plak Jhi Brung Khankix
7Ka daux num kwang simiang Darix ra num tix num, khix kao tix pa mawh Khishebat tixnga pon ngaix, gumlox Siyiex hoik hoek ka cao jhai Zakharix, pa mawh kawn simex Berekhix, kawn simex Idaw, 8Ka daux plak ponsawm aux jhak mai yaox pui tix kaux pa brug brung raoh hoek#Jhi 6:4 mai cung ka daux sinax pang khaox kui daux ngawd tan mai ka plak khaix nawh koe brung pa raoh, pa pau mai pa paing khankix heue.#Jhi 6:2 9Yam an aux chawk ah nin “Siyiex aux eue, inkix mawh patix lie? “Mawh kheu nan, kawncau Siyiex, pa hoik sikah tau mai aux, krai ah nin ka aux, “Aux tak sang jhi maix yaox ka mawh ceu inkix patix heue. 10Pui pa hoik cung ka sinax khaox kui an, hoik deeh pawk lox ah nin “Inkix mawh pa hoik ploi Siyiex lai ling ti hu jee hu blaong ka piang haktiex heue.” 11Kix deeh pawk lox kawncau Siyiex, pa hoik cung ka sinax khaox Muratu, ah nin “Yix hoik lai ling ti hu jee hu blaong ka piang haktiex mai jhak heue, Haktiex laux lee tix ot yiien yawg khawmuik heue.”
Krax Nyawm Rhawm Zion
12Khaix an, kawncau Siyiex hoik deeh pawk lox ah nin “Siyiex kru naing raoma eue, Mawh ang Maix lai koe krax caux rhawm ka veng Yerusaliem mai ka veng Yudax khankix, ka piang hoik koe krax pa song rhawm Maix atixgliah num inkix rheung miex ding lie?” 13Siyiex hoik deeh pawk lox ka kawncau Siyiex an, pa hoik sikah tau mai aux, ka gumlox pa mhawm mai pa koe krax pa nyhawm rhawm heue. 14Kawncau Siyiex pa sikah mai aux ah nin, “Siyiex cao kru naing raoma ah nin, Aux kied koe krax pa caux rhawm ka son veng Yerusaliem mai ka son veng Zion, tau mai krax pa kied koe rhawmrhi tix heue. 15Aux kied song rhawm songrhi ka ceu pui tang ceu pa ot yiien yawg tix khankix, grawh grawng nawh, Aux song rhawm ceeix ngie ka veng Yerusaliem mai kix hoik chax nie luan yuh ceu pa kha rhawm ka veng an heue. 16Mawh kheu nan, Siyiex ah nin “Aux sang deeh ing hoek ka veng Yerusaliem tau mai krax pa caux rhawm, nyiex bwan Aux tak sang mawh pa deeh sum tix ka daux veng an mai tak sang bluh maox tiag lih ka piang veng Yerusaliem heue. “Siyiex cao kru naing raoma ah nan heue. 17Siyiex cao kru naing raoma ah nin “Veng Aux khankix, tak sang baox grum naog ka daux krax pa haok hwan heue. Siyiex tak sang baox tawm krax nyawm rhawm ka grawng Zion mai tak sang baox laug ti teei veng Yerusaliem heue.”
Krax Plak Jhi Ka Rung An Khankix
18Khaix an, aux yaog ngai tix jhak mai yaox rung khankix pon mu heue. 19Aux chawk ka kawncau Siyiex pa hoik sikah tau mai aux “Mawh inkix patix lie? “Nawh deeh pawk ka aux ah nin “Inkix mawh rung pa hoik prung prang ti tik haktiex Yudax, haktiex Isarelax mai veng Yerusaliem khankix heue. 20Khaix an, Siyiex hoik jhi aux yaox ka pui pa chix kaing khaox khankix pon kaux heue. 21Aux ah nin “Mawh hoek kix ti yuh ceu patix lie? “Nawh deeh ah nin, inkix mawh rung pa hoik prung prang ti tik pui haktiex Yudax khankix, pa kieh pui ang lai pon yaog kaing tix heue. Viang mawh nan pui chix yuh kaing khaox ankix, sang hoek ti glhat ka kix mai sonsang teei ti tik rung pui tang ceu khankix, pa hoik mawh rung pa yaog ti prung prang ka haktiex Yudax heue.
Currently Selected:
ZAKHARIX 1: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012