SAWLAMUN 1
1
Daux Bang Pawie Khan Kheu
1Lai rhax piang lai rhax, mawh lai rhax cie Sawlamon pa nie blon mhawm heue. 2Kieh nawh ngheet aux ka jheeh tix, mawh kheu krax moh nie lheu mhawm khaing rawm plix siiet heue. 3Mawh kheu rawm bee kraix maix nyawm sioe bhawng, ceu kaux maix nyawm bhawng awm bee pa hieh ti lih mawh kheu nan, bunkrih khankix moh ka maix heue. 4Thong aux luan liak, Ex tak sang to ti hawt khaix maix heue. Simiang viex aux laig ka daux lawg ot nawh heue. Yix tak nie lheu doh keud krax moh maix khaing rawm plix siiet heue. Kix moh ka maix tete heue.
5Kawn bun veng Yerusaliem khankix eue, viang aux lung awm nyiex gox keda kawx kawn mhawm grang ti yaox awm man tieb cie Sawlamon heue. 6Paw vi jhak piang aux liak, grawh grawng nawh, aux mawh pa lung nex, mawh kheu hax koek lung yuh nex aux heue. Kawn simex miex aux khankix hoik song rhawm ka aux, kix kieh aux mawh cao pa pau sipeem plix siiet, viang mawh nan, aux ang lai yaox ti pau sipeem plix siiet cao tix heue. 7Rhawm moh dud aux eue, krai aux mhong liak! Mawh liang maix cub kawn yung tix dee mawx, yam jung singaix kieh maix kix laux lee tix dee mawx, grawh grawng nawh aux khex sang awm pui an pa kheem ngai tix hawt cub yung paox grawm meed maix khankix yuh ka mawx lie?
Paox Moh Dud
8Maix pa kied mhawm tai khaing daux sinax bun khankix eue, phan maix ang nyang tawng, hawt ti hu khaix glah caong cub yung maix liang kawn pex maix, hawt nyiex gox cub cao liang yung heue. 9Paox moh aux eue, aux tiag ti yaox maix, ka brung mhaing pa koe ka daux sinax cub ling lawx naing brung cie Pharaw heue. 10Sibax maix mhawm grang ti yaox ka kraung pa jawg ngawg maix mhawm plang ka tauk ti maox soi khri.
Cub Kawn Bun Veng Yerusaliem
11Ex sang jawg kraung maix ka khri mai kam ka mau. 12Yam kawn ngawm simiang hawt pheen sawm tix, rawm bee bhawng Nadu aux, ploi bhawm pa nyawm bhawng tix lih heue. 13Rawm bee bhawng Muran tix hau, mawh rhawm moh dud, ka son aux mai it sinax naok aux leeing sawm heue. 14Pruh tai Hena mawh rhawm moh dud ka son aux, ka daux sipeem plix siiet Enkedi heue.
Paox Moh Dud
15Jhak heue, paox moh aux eue maix grang ti yaox, jhak heue maix kied mhawm grang ti yaox! maix koe ngai sikaux heue.
Bun Shulamix
16Jhak heue, paox moh aux eue maix mhawm grang ti yaox! mawh heue, kied nyawm ti yaox heue. Dee it dee tum ex kawx mawh pa klai ti yaox heue. 17Lat nyiex ex mawh pa yuh ka khaox Arit mai si ox braux nyiex, mawh pa yuh tix ka khaox gix heue.
Currently Selected:
SAWLAMUN 1: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012