PHILIPPIX 1
1
Lox Nawb Bwan
1Pawlux mai Timose, pa mawh siliex Yesux Khrit tawx lai hu ka pui singax singeh ka daux Yesux Khrit, pa ot ka veng Philippix khawmuik#Cau 16:12 mai ka cao giex kaing ceu cao mai ka pui bung kaing ceu cao khankix. 2Kieh pex koe bwanson mai pa nhim pa kaoh khaing Keeing ex Siyiex mai Simiang Yesux Khrit heue.
Lox Yaogyaw Mai Lox Rawg Bwan
3Yam doh keud aux ka pex ku bawg aux yaogyaw ka Siyiex aux, 4yam rawg mhaing aux son pex khawmuik ku bawg, aux rawg bwan daux krax gaux rhawm, 5kheu yuh pex paox pie ka daux pa tah hu lox bwan gaux rhawm, jah ka singaix pa mhong pex lox bwan an, tom yam in heue. 6Aux hoik yum rhawm mhawm mhawm, grawh grawng kaw pa hoik jah ti yuh kaing pa mhawm ka daux pex, tak kawn sang yuh tom grum hoik, tom hoek singaix Yesux Khrit heue. 7Pa keud aux yuh nin son pex khawmuik hoik khaw, mawh kheu ca koe pex ka daux rhawm aux, ka daux pa phyawk aux in mai khawm ka daux pa kham mhai rug tix tiebtie mai kieh lox bwan gaux rhawm kaux cong kawx, pex khawmuik hoik mawh pa neuex pa rom ti pon bwanson tau mai aux heue. 8Grawh grawng nawh, Siyiex mawh cao pa kham mhai rug aux, grawng pa byaong aux ka pex khawmuik, ka daux ceu pa moh rhawm Yesux Khrit heue. 9Aux rawg bwan sonsang ting krax moh pex sinyek sinyek, ka daux pa chix tawng ku ceu khawmuik, 10sonsang chix tawng ti cheu ceu pa tang pa siyox khankix mai sonsang singax singeh pex mai ang koe dee cha tom hoek singaix Yesux Khrit, 11kheu hoik naog pex ka plix ceu pa rahsee, pa hoik mawh kheu Yesux Khrit, sonsang kieh Siyiex koe min pakngai mai pa yaogyaw heue.
Ka Aux Pa Im Mawh Cao Khrit
12Puxaik khankix eue, aux simie ti kieh pex tawng grawh grawng ceu pa hoik mawh ka aux, hoik mawh ceu pa teem ti kieh lox bwan gaux rhawm tah hu heue. Khaing pa kieh pa raw kah heue. 13Kheu grawng in, grawng pa ot aux#Cau 28:30 mai maox ceng son Cao Khrit hoik lih mawh pa sidawng ka pui kru naing pa pau ka nyiex haw khawmuik mai ka pui ku kaux heue. 14Kheu grawng pa ot aux mai maox ceng, puxaik pa ot ka daux Simiang Siyiex plak nie, hoik nie lheu koe rhawm kwa ti sang sidiex gum lox Siyiex ka daux pa kaux cong rhawm heue. 15Pui tix blah sidiex grawng Cao Khrit mai pa boh rhawm rhi mai krax simah simiang, tix blah sidiex mai rhawm pa mhawm heue. 16Pui pa ghoik ti krai khankix sidiex kheu koe krax moh krax rhawm mai kheu kix tawng grawng hoik deuh ka aux tin sonsang tiebtie ti priex ka lox bwan gaux rhawm heue. 17Viang mawh kawx nan, pui pa sidiex phao ka khankix, sidiex grawng Cao Khrit kheu krax pa ang khaw paox tix, ang tie viex khawm rhawm tix mai nieb yuh mai keud ti sang nie baox lux ka pa kha rhawm pa ot aux mai maox ceng heue. 18Pa sivix mawh pa tix lie? Nieb lak pie ti sidiex ang ah, sidiex ka daux pa mawh meh ang ah, sidiex yuh ka mawx ang ah, mawh pa sidiex grawh grawng Cao Khrit heue. Mawh kheu grawng in aux gaux rhawm kah heue. Mawh heue, aux tak sang baox deeh gaux rhawm kah heue. 19Grawh grawng nawh, aux hoik tawng grawng in tak sang tieh ti mawh pa taoh ka aux kheu bwan pa rawg pex mai kheu pa teem Khuan Yesux Khrit heue. 20Aux keud pot jun pot yuh nin, aux ang lai kaig twa ka daux tix ceu kawx, viang mawh nan tak sang koe rhawm pa grum kwa, sonsang yaog min Cao Khrit ka daux tokaux aux, ka daux pa im ju aux ang ah, ka daux pa yum aux ang ah heue. 21Ka son aux, pa im mawh Cao Khrit mai pa yum mawh bwan son heue. 22Viang mawh kawx nan phan aux ca im ka daux nex nham, mawh plix pa plix ka kaing jhaw ka son aux heue. Aux sang laug ti cie pa yuh ka mawx? Aux ang tawng. 23Aux keud ang lai doh ka sinax an ra ceu, kheu simie aux ti lih hu ot tau mai Cao Khrit, mawh kheu an mawh pa kied nie lheu lang teung mhawm, 24viang mawh nan pa ot ka daux nex nham mawh pa nie lheu lo son pex heue. 25Mawh kheu hoik tawng aux ka grawng in, aux tawng grawng tak sang ot aux tau mai pex khawmuik, sonsang ting sang lhaong pex mai gaux rhawm ka daux krax yum rhawm in heue. 26Kheu khaing ka daux pa ot aux tau mai pex baox tix bawg, pa gaux rhawm pex ka daux Yesux Khrit tak nie lheu ting kheu aux heue. 27Kieh ngie pa yuh pex keung mai been lox bwan gaux rhawm gaux rhi Cao Khrit, yuh ka mawx phan aux hoek ka pex ang ah, siyang ot ang ah, aux tak pon ti mhong grawng kaux cong pex mai viex khuan tix mu mai rhawm tix mu khaing, mai niet ti yuh son krax yum rhawm pa dex dawt mai lox bwan gaux rhawm gauxrhi, 28mai grawng ang lhat graung ka pa koeng khankix heue.Grawh grawng nawh pa ang pex lhat mawh mhai mawh kheu ngha sang laux kix, viang mawh nan sang mawh mhai grawng pa taoh pex, an mawh khaing Siyiex heue. 29Mawh kheu hoik tawx ka pex, ka son Cao Khrit, pa ang joeng mawh ngie pa yum rhawm ka Nawh Cao, viang mawh nan khawm pa sang kham geu son Nawh, 30kheu pex ngah paox tix ka ceu pa awm pa hoik yaox pex aux ngah kah,#Cau 16:19-40 mai pa pon pex tix mhong yam in heue.
Currently Selected:
PHILIPPIX 1: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012