LUKAX 1
1
Lox Jah
(Cau 11)
1Mawh kheu pui tom nie hoik tiiem ti yaox grawng ceu pa hoik naog grum mawh sinax ex, 2Awm kix pa mawh pa kham mhai ruk grawng ceu pa hoik yaox ka ngai tix mai cao pa viex ti tawx lox bwan ka ex tom yam jah. 3Phan keud ti yaox, aux kawx, hoik sawg ti yaox grawng kuceu mhawm mhawm tom yam jah, khaw ti tiiem lai ka maix, Thawphilux pa mhawm eue, 4yuh ka mawx maix tak sang grum tawng grawng ceu pa hoik gau ka maix, mawh pa mawh meh heue.
Grawng Keh Yohan
5Bawg yam mawh Herut, simiang meung Yudax, koe cao giex kaing li tix kaux, pa kaux Zakharix, pa dex dawd mai cub Abiyax#1Been 24:10. Moeng nawh mawh kawn bun ru Arun mai ceu kaux nawh mawh Elizabiet heue. 6Kiex khawm ra mawh pa rahsee sivoe Siyiex mai hawt lox tawm pinyap cie Siyiex khawmuik ang lai koe dee lud loe heue. 7Kiex ang koe kawn, kheu Elizabiet mawh pui neh mai kiex hoik kuad. 8Yam yuh Zakharix kaing cao giex kaing li sivoe Siyiex, ceu pa yuh cub pa neuex nawh, 9awm pa koe been cao giex kaing li khankix, caw bawg yam laig nawh ti tok nyawng bhawng ka daux nyiex bwan Siyiex. 10Cub pui hun khawmuik, ot ti rawg bwan ka plak praix, bawg yam nari tok nyawng bhawng heue. 11Yam an kawncau Siyiex tix kaux hoek ti cung plak dawm khu dee tan nyawng bhawng. 12Yam yaox Zakharix nawh sung sang rhawm kah mai lhat heue. 13Viang mawh nan kawncau Siyiex ah nin ka nawh, “Zakharix eue, paw lhat graung, mawh kheu hoik nghiet lox pa rawg pa mhaing maix mai moeng maix Elizabiet tak keh kawn simex son maix tix kaux mai maix tak kok ceu kaux nawh mawh Yohan heue. 14Maix tak sang gaux rhawm mai pui tom nie tak sang koe krax gaux rhawm kheu keh nawh. 15Mawh kheu nawh tak ting lhaong sivoe ngai Siyiex, nawh tak ang nyaux plai rawm plix siiet,#Si 6:3 mai ceu pa chix kieh yoek, nawh tak naog mai Khuan Singax Singeh, tom yam ot nawh ka daux vaig miex tix heue. 16Nawh tak kieh kawn praix Isarelax tom nie deeh tieh ti hoek ka Simiang mai Siyiex kix. 17Nawh tak sang hu sivoe Nawh Cao ka daux khuan mai siawp sibrawm Eliyax, sonsang kieh keeing khankix mai kawn praix tix,#Ma 4:5-6 deeh khaw paox tix mai sonsang kieh pa lheu lox khankix deeh hu ka daux pingnya pa rahsee khankix, sonsang cox pui tix ceu mawh pa hoik rien son Siyiex heue. 18Zakharix ah nin ka kawncau Siyiex an, “Grawh grawng tak sang mawh, ceu in aux chix tawng yuh ka mawx? Mawh kheu aux uik mawh tax kuad mai moeng aux ka hoik riex ju uik kuad heue.” 19Kawncau Siyiex an deeh pawk lox ah nin ka nawh, “Aux mawh Gabrelax,#Dan 8:16, 9:21 pa cung sivoe Siyiex mai hoik ploi aux hoek sonsang sikah ka maix mai kieh aux viex lox gaux rhawm ceu in khankix ka maix heue. 20Jhak heue, kheu ang maix yum rhawm ka lox aux in maix tak aw khawm ang chix sikah, tom hoek singaix hoik mawh ceu in khankix, pa tak sang naog ka daux bawg yam kix heue.” 21Pui pa krox Zakharix khankix, daox deng kheu ot nawh ka daux nyiex bwan kied rheung heue. 22Yam lih hoek nawh, nawh ang chix sikah mai kix, kix tom tawng hoik yaox nawh riang susai ka daux nyiex bwan. Viang mawh nan Zakharix jhi kix yaox mhai mai aw tix heue. 23Yam hoik naog singaix yuh nawh kaing, nawh deeh ing ka nyiex tix heue. 24Khaix singaix an khankix moeng nawh Elizabiet, koe kaux mai nawh mox tokaux tix son phwan khix, ah nin, 25“Simiang hoik yuh ceu in son aux, daux singaix yam kia Nawh aux, sonsang teei kieh aux luan khaing pa salao kawn pui heue.”
Krai Grawng Keh Yesux
26Khaix an ka daux liah khix, Siyiex ploi kawncau Nawh Gabrelax hu ka daux veng meung Galilie tix veng, pa kok mawh Nazariet, 27ka bunkrih tix kaux, pa hoik chawk pui tix kaux pa kaux Yosiep, pa mawh ru Davit mai ceu kaux bunkrih an mawh Marix heue.#Mat 1:18 28Kawncau Siyiex an laig mai ah nin ka nawh, “Bun pa koe bwanson eue, kieh maix gaux rhawm heue. Siyiex ot tau mai maix, ka daux ceu bun maix kied ting bwanson heue.” 29Viang mawh nan, nawh kied sung sang rhawm ka lox in mai keud jee keud blaong daux rhawm tix, grawh grawng dee bleeh ceu an. 30Kawncau Siyiex an ah nin ka nawh, “Marix eue, paw lhat graung, kheu maix hoik pon bwan khaing Siyiex. 31Jhak heue. Maix tak koe kaux daux vaig tix mai keh kawn simex tix kaux mai tak kok ceu kaux Nawh mawh Yesux heue.#Mat 1:21 32Nawh tak ting lhaong mai tak kok Nawh mawh kawn, kaw pa ting lhaong khaing khawmuik mai Siyiex tak tawx dang ngeung keeing Nawh Davit ka Nawh heue.” 33Nawh tak giex kaing ru Yakop leeing ju mai Meung Nawh tak ang chix sidah heue.#Isa 9:7 34Viang mawh nan Marix chawk ah nin ka kawncau Siyiex an, “Ceu in chix mawh yuh ka mawx? Kheu aux ang koe mex mai ang pied ang pha simex heue.” 35Kawncau Siyiex an deeh pawk lox mai ah nin ka nawh, “Khuan Singax Singeh tak sang hoek ka piang maix mai sibrawm kaw pa ting lhaong khaing khawmuik, tak sang tawb veei ka piang maix, mawh kheu grawng in Kawn singax pa tak sang keh, tak kok mawh kawn Siyiex heue. 36Jhak heue, bun paox ru maix Elizabiet kawx, hoik nghe kawn simex, nawh kuad kawx mai yam in uik koe liah khix khawm ah pui pa neh kah, 37mawh kheu sibrawm Siyiex, pa ang Nawh chix yuh ang koe tix ceu kawx heue.”#Jah 18:14 38Marix baox ah nin, “Aux mawh siliex Simiang, awm lox krai maix kieh mawh ka aux heue.” Kawncau Siyiex an lih hu khaing nawh heue.
Marix Hu Fi Ka Elizabiet
39Daux bawg yam singaix an khankix Marix nied ti kaoh mai hu ka daux haktiex dee koe gawng koe lua, ka veng Yudax tix veng. 40Laig ka daux nyiex Zakharix mai nawb bwan ka Elizabiet. 41Yam mhong Elizabiet lox nawb Marix ka nawh, kawn ngie pa ot daux vaig nawh jaloh ka mai Elizabiet naog mai Khuan Singax Singeh heue. 42Nawh yo lox sinum ah nin, “Ka daux ceu bun maix kied ting bwanson mai plix vaig maix kawx ting bwanson heue. 43Aux pon min plakngai pa hoek miex Simiang aux ka aux yuh nin, yuh ka mawx? 44Grawh grawng nawh, jhak heue, yam mhong lox pa nawb maix ka daux yhaok aux, kawn ngie pa ot daux vaig aux jaloh tix kheu gaux rhawm tix heue. 45Bun pa hoik yum rhawm ting bwanson, mawh kheu grawng ceu pa hoik krai Simiang ka nawh, tak sang naog sang grum heue.”
Lox Rhax Pa Yaogyaw Marix
46Marix ah nin, “Ju aux yaogyaw Simiang, 47mai khuan aux gaux rhawm ka daux Siyiex Cao Taoh aux heue. 48Mawh kheu Nawh hoik jhak ka bun siliex Nawh pa tiiem rhawm. Grawh grawng nawh, jhak heue, jah yam in tix ju hoik tix ju, ku ju, tak kok aux mawh pa ting bwan son heue.” 49Mawh kheu Kaw pa ting sibrawm hoik yuh ceu pa ting lhaong son aux mai ceu kaux Nawh mawh pa Singax Singeh heue. 50Krax caux rhawm Nawh, hoek ka tix ju hoik tix ju, ka piang kix pa chix lhat ka Nawh heue. 51Nawh hoik jhi yaox riang rao ka daux plawng taix tix. Nawh hoik kieh pa ting rhawm ting rhi, pa keud ka daux rhawm tix, khankix prung prang heue. 52Nawh hoik khlut laux simiang khaing dang ngeung dee ngawm kix mai hoik yaog pa tiem kieh lhaong heue. 53Pa cai rhawm khankix Nawh hoik kieh sak ka ceu pa nyawm mai Nawh hoik ploi cao mi khankix hu yi giex going heue. 54Nawh hoik teem ka Isarelax kawncau mau soi Nawh, yuh ka mawx sonsang doh keud nawh ka krax caux rhawm heue. 55Awm lox pa hoik sikah Nawh ka tax du ex khankix ka Abraham,#Jah 17:7 khawm ru nawh leeing ju heue.#1Sa 2:1-10 56Marix ot tau mai Elizabiet dex loe khix mai deeh ing ka nyiex tokaux tix heue.
Grawng Keh Yohan
57Yam hoik naog bawg yam Elizabiet sang keh, nawh keh kawn simex tix kaux heue. 58Yam hoik mhong paox plawg, paox ru Elizabiet, grawng krax caux rhawm pa ting pa hoik yuh Siyiex son kiex, kix gaux rhawm tau mai kiex heue. 59Yam uik koe daix ngaix, kix hoek sonsang pat hak kawn nyawm an,#Krub 12:3 mai kix dex sang kok nawh mawh Zakharix awm ceu kaux keeing nawh. 60Miex nawh deeh ah nin ka kix, “Ang mawh, tak kok nawh mawh Yohan heue.” 61Kix deeh ah nin ka kiex, “Ka daux paox ru maix, pui pa sum ceukau yuh nin ang koe tix kaux kawx.” 62Kix yuh mhai chawk ka keeing nawh, grawng pa simie nawh ti tok ceu kaux mawh patix heue. 63Nawh mhaing ce tiiem lai mai tiiem ah nin, “Ceu kaux nawh mawh Yohan,” kix pa ot tan khawmuik daox deng kah heue. 64Jheeh nawh deeh baoh dom mawx dom an mai siniag dak nawh deeh gah mai nawh deeh sikah, yaogyaw bwanson Siyiex heue. 65Kix pa ot sivie siveng tan khawmuik lhat ka mai grawh grawng ceu in khankix tah hu kudah kudee ka daux haktiex dee koe gawng koe lua meung Yudax heue. 66Kix pa mhong grawh grawng ceu in khawmuik priex ti tawng ka daux rhawm tix, ah nin, “Phan mawh nin, kawn nyawm in tak sang mawh pa yuh ka mawx? Mawh kheu ot taix Siyiex tau mai nawh heue.”
Lox Jhai Krai Zakharix
67Keeing nawh Zakharix naog Khuan Singax Singeh mai krai lox jhai ah nin, 68“Kieh Simiang, Siyiex Isarelax ting bwanson heue. Mawh kheu Nawh hoik hoek ti lai ling mai hoik taoh pui cie tix. 69Nawh hoik kieh Cao Taoh koe son ex tix kaux, ka daux geh nyiex ru kawncau Nawh Davit. 70Awm hoik krai Nawh ka jheeh cao jhai pa singax singeh khankix, pa hoik koe di dix. 71Grawh grawng sang taoh ex khaing pui pa koeng ka ex khankix mai khaing tawm taix pa boh rhawm pa khoi ka ex khawmuik heue. 72Sonsang yuh krax caux rhawm ka tax du ex khankix mai sonsang doh keud ka lox sijax mukheu pa singax singeh Nawh heue. 73Pa mawh lox pa hoik tiextu Nawh mai tawx ka Abraham keeing ex dix. 74Sonsang taoh ex luan khaing daux tawm taix pa koeng ka ex khankix sonsang pon luan ex khaing krax lhat graung mai pon ti yuh son Nawh. 75Ka daux pa singax singeh mai pa rahsee, daux bawg yam ngaix pa kawn ot kawn koe ex ka sivoe Nawh khawmuik heue. 76Kawn nyawm eue, tak sang kok maix mawh cao jhai cie kaw pa ting lhaong khaing khawmuik, mawh kheu maix tak sang hu sivoe pakngai Siyiex sonsang cox krax heue.#Ma 3:1 77Sonsang kieh pui cie Nawh tawng grawh grawng krax taoh, ka daux pa pluat ploi phimap kix heue. 78Mawh kheu krax caux rhawm Siyiex ex, pa riang singaix khaing dee lhaong tak sang hoek ti lai ling ka ex. 79Sonsang jhan riang ka piang kix pa ngawm ka daux pa faik #Isa 9:2mai veei krax yum. Sonsang thong caong ex laig ka daux krax pa nhim heue. 80Kawn nyawm an haok hwan mai ting riang ka daux khuan mai nawh ot ka daux tiagtu, tom hoek singaix bawg yam jhi tokaux tix ka pui Isarelax heue.
Currently Selected:
LUKAX 1: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012