KRUB 1
1
Grawng Krax Tan Pa Gleeing
1Siyiex kok ka Mose mai sikah ka nawh khaing daux nyiex gox bwan ah nin, 2“Krai ka ceu pui Isarelax ah nin, ka daux pex yam viex pui tix kaux kaux krax tan ka Siyiex, nawh tak viex ti tan tobrie pa mawh mawie, yung mai pex khankix. 3Phan nawh sang yuh krax tan pa gleeing ka mawie, kieh nawh tan mawie mhaing pa loig, ka diang siviex nyiex gox bwan man bang kum pui hun, sonsang mawh pa khaw caw sivoe ngai Siyiex, 4Nawh tak deuh taix tix piang kaing mawie sang tan an mai an tak mawh pa pon rieb ti teei son pa sang pluat ploi phimap nawh. 5Nawh tak pah mawie mhaing an sivoe Simiang Siyiex, mai kawn simex Arun cao giex kaing li khankix tak teei nham mai phruah hawt vung viang piang khu dee tan, pa koe hawt diang siviex nyiex gox bwan man bang kum pui hun. 6Nawh tak lieh mawie krax tan pa gleeing an mai tat nex lih khik mawx khik an, 7Kawn simex Arun pa mawh cao giex kaing li khankix tak phlu ngu piang khu dee tan mai nawm khix piang ngu an, 8mai kawn simex Arun pa mawh cao giex kaing li khankix tak teei khik nex mawie khawm kaing, khawm bee mai deuh piang khix pa koe ngu piang khu dee tan, 9mai nawh tak sigrhah kraung vaig mai caong ka rawm, cao giex kaing li tak gleeing an khawmuik piang khu dee tan, kieh mawh krax tan pa gleeing ka ngu, pa sioe bhawng ka Simiang Siyiex. 10Phan nawh sang yuh krax tan pa gleeing ka yung, phan ang mawh nan ka pex khankix mai tak tan mhaing pa loig, 11nawh tak pah an ka plak laong khu dee tan sivoe Simiang Siyiex mai kawn simex Arun pa mawh cao giex kaing li khankix tak phruah nham hawt vung viang piang khu dee tan khawmuik. 12Nawh tak tat nex to tan an lih khik mawx khik an mai bee nawh, cao giex kaing li tak teei ti deuh piang nawm khix pa koe ngu piang khu dee tan, 13mai nawh tak sigrhah kraung vaig mai caong khankix ka rawm, cao giex kaing li tak viex nawh khawmuik mai gleeing piang khu dee tan, kieh mawh krax tan pa gleeing ka ngu pa sioe bhawng ka Simiang Siyiex, 14phan nawh sang yuh krax tan pa gleeing ka sim khankix mai nawh tak viex pa mawh keukie, phan ang mawh nan, kawn sikaux nhum. 15Cao giex kaing li tak viex hoek ka khu dee tan mai siyiied kaing nawh dud mai gleeing nawh piang khu dee tan, mai tak biiet nham lih hawt praok khu dee tan, 16mai nawh tak pih ti tik ble mai can pa seeing, hu tik ka dee tik nyaox, ka praok khu dee tan plak lih singaix, 17nawh tak giex pruik sim an khawm hauk mai lug naok nawh son ang dud khaing paox tix mai cao giex kaing li tak teei tix gleeing piang nawm khix pa koe ngu piang khu dee tan, kieh mawh krax tan pa gleeing ka ngu, pa sioe bhawng ka Simiang Siyiex heue.
Currently Selected:
KRUB 1: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012