YONAX 1
1
1Gumlox Siyiex lih hoek ka Yonax kawn simex Amitie#2Sim 14:25 ah nin, 2“Kaoh hu ka veng ting Nineve kok yo mai glhat ka kix, mawh kheu krax pa caox caig yuh kix hoik hoek ka plak sivoe ngai Aux.” 3Viang mawh nan Yonax keud ti sang to mai mox tix ka veng Tasux, khaing plak sivoe ngai Siyiex mai nawh lih hu ka veng Yawppax mai yaox reu ting pa sang hu ka veng Tasux. Nawh tawx ngawh brug tix reu, laig ka daux reu mai brug reu hu tau mai kix ka daux veng Tasux, khaing plak sivoe ngai Siyiex heue.
Bhaung Ting Daux Rawm Sigrit Sigra
4Yam an Siyiex kieh bhaung ting lih ka piang rawm sigrit sigra, tom dex sang laux reu ting heue. 5Yam an pui yuh kaing daux reu ku kaux kied lhat graung mai pui ku kaux kok yo ka siyiex mawx siyiex an heue. Kix teei ti tik kraung tiblah daux rawm, sonsang chaong reu ting, yam an Yonax kied laig it ka daux lawg plak greem reu ting heue. 6Mawh kheu nan, cao kaing reu hu ka nawh ah nin, “Pui pa laig it eue, yuh ka mawh maix lai laig it, kaoh! mai rawg bwan ka siyiex maix, ha siyiex maix nieb doh keud ka ex mai taoh ex khaing krax pa laux leeing in nie.” 7Khaix an pui pa ot ka daux reu “Phaw ti yuh nieb, sonsang tawng kix grawng in, mawh kheu pui mawx?” Kix nieb ti yaox mai caw ka Yonax heue. 8Mawh kheu nan kix chawk ka nawh ah nin, “Mawh pui mawx pa kieh ceu in hoek ka piang ex, krai ex mhong liak? Yuh maix kaing patix? Kaoh maix khaing dee mawx? Mawh maix pui meung mawx? Mawh maix pui ceu tix?” 9Nawh deeh pawk ah nin ka kix, “Aux mawh ceu pui Hebrie, pa lhat graung ka Siyiex raoma, Cao pa phan haktiex mai rawm sigrit sigra mai aux mawh pa to khaing plak sivoe ngai Siyiex heue.”
Taing Yonax Daux Rawm
10Pui khankix nie koe krax lhat graung kah mai kix chawk nawh ah nin, “Maix lai yuh nin yuh ka mawx?” Mawh kheu krai nawh grawng tix ka kix, kix tom tawng mawh nawh pa to khaing plak sivoe ngai Siyiex heue. 11Khaix an kix chawk ka nawh ah nin, “Mawh kheu nie ting bhaung mai puk pak rawm, sonsang yiien yawg bhaung, ex sang caw ti yuh ka mawh ka maix?” 12Nawh ah nin ka kix, “Pex yaog ti taing aux daux rawm sigrit sigra, phan pex yuh nan rawm sigrit sigra tak yiien yawg hu heue. Aux tawng bhaung ting in hoek ka piang pex mawh kheu jao aux heue.” 13Viang mawh nan kix co ca ti vai reu sonsang hoek ka praok rawm. Viang mawh nan mawh kheu nie ting bhaung kix ang lai pex pon heue. 14Mawh kheu nan kix kok yo ka Siyiex ah nin, “Siyiex eue, yix khyox khaw ka Maix, paw doh kieh yix laux leeing kheu jao pui in mai paw kieh nham pui pa ang koe phimap hoek ka piang yix liak! Siyiex eue, Maix hoik yuh awm pa koe alo tix heue.” 15Yam an kix yaog ti taing Yonax daux rawm sigrit sigra heue. 16Yam an puk pak rawm sigrit sigra kawx yien yawg hu heue. Khaix an kix lhat graung ka Siyiex mai yuh krax tan mai yuh sijax mukheu ka siyiex heue. 17Yam an Siyiex khre rien kax ting tix mu, kieh bleet ka Yonax, Yonax ot ka daux vaig kax ting loe singaix loe sawm heue.#Mat 12:40
Currently Selected:
YONAX 1: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012