HEBRIE 1
1
Gumlox Siyiex Daux Kawn Cao
1Siyiex pa hoik sikah ka tax du ex khankix ka daux cao jhai khankix, tom nie bawg mai ka tom nie ceu di dix, 2Ka daux bawg yam sidah singaix inkix, hoik sikah ka ex ka daux Kawn Nawh Cao, pa hoik ciak Nawh ti kieh mawh Cao pa pon sin kuceu khawmuik, Kaw pa hoik teei Nawh Cao ti yuh khawm haktiex khankix kah heue. 3Nawh mawh pa deeh jhan ghaix ka min pakngai Siyiex mai mawh riang grang tokaux Nawh Cao mai pa joh jhan ka ku ceu khawmuik ka gumlox sibrawm Nawh. Khaix hoik yuh Nawh ti kieh singax khaing phimap, Nawh ngawm ka plak taix khawn dawm min pakngai Siyiex ka dee lhaong heue.
Kawn Siyiex Pa Ting Lhaong
4Kheu hoik lih mawh Nawh pa nie lheu blon ting khaing kawncau Siyiex khankix, mawh kheu hoik pon Nawh son ceu kaux pa nie lheu mhawm khaing ceu kaux kix heue. 5Grawh grawng nawh hoik sax ah Nawh Cao ka kawncau Siyiex kaux mawx, “Maix mawh Kawn simex Aux. Aux hoik kieh Maix keh ka daux singaix in heue.”#Yaog 2:7 pa baox ah nin, “Aux tak mawh Keeing ka Nawh mai Nawh tak mawh Kawn ka Aux heue.”#2Sa 7:14; 1Been 17:13?
6Nawh Cao baox deeh ah nin ka grawng yam sang deeh viex Kawn Ai tix hoek ka piang haktiex, “Kieh kawncau Siyiex khawmuik krub ka Nawh heue.”#Pi 32:43
7Nawh Cao ah nin ka grawng kawncau Siyiex khankix, “Nawh Cao yuh ti kieh kawncau Siyiex cie tix mawh bhaung mai kieh pui cau Nawh mawh rao ngu heue.”#Yaog 104:4 8Nawh Cao ah nin ka grawng Kawn Cao, “Siyiex eue, dang ngeung Maix mawh tom leeing ju heue. Khaox gix simiang pa rahsee cie Maix, mawh khaox gix simiang meung Maix heue. 9Maix hoik moh ka pa rahsee mai hoik koeng ka pa ang khaw ang jiet heue. Mawh kheu nan Siyiex, pa mawh Siyiex Maix, hoik groi rawm bee ka Maix, ka rawm bee pa gaux rhawm, lheu khaing piang paox Maix khankix heue.”#Yaog 45:6,7
10“Simiang eue, ka daux yam jah Maix hoik kaw num haktiex heue. Raoma khankix mawh khaix taix Maix heue. 11Ankix tak sang laux leeing, viang mawh nan Maix tak ca kawn kaux koe heue. Khankix khawmuik tak sang prim hu awm kraung ceep. 12Maix tak sang pua ka khankix awm ka man fua. Tak sang deeh thai deeh loh khankix awm kraung ceep, viang mawh nan Maix ca awm paox tix mai jhong num Maix khankix ang chix uik sidah heue.”#Yaog 102:25-27
13Hoik sax ah Nawh Cao ka kawncau Siyiex kaux mawx? “Ngawm plak taix khawn dawm Aux, tom kieh Aux pui pa koeng ka Maix, mawh ngot dee deuh Maix caong tix heue.”#Yaog 110:1
14Kawncau Siyiex khankix khawmuik mawh khuan pa cau, pa hoik ploi ti yuh son kix pa tak sang pon ti cie sin krax taoh ang mawh lie?
Currently Selected:
HEBRIE 1: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012