2 SAMOELAX 1
1
Grawng Mhong Davit Yum Sawlux
1Khaix hoik yum Sawlux Davit deeh hoek khaing pah tix pui Amaliet, nawh ot ka daux veng Zikalat ra singaix, 2yam hoek ka daux loe singaix, jhak heue, pui tix kaux khaing tab Sawlux riah kraung ceep tix mai sau phawng tiex ka plak khaix tix, yam hoek nawh ka Davit nawh gup tix piang tiex mai tawx krax nab yam ka Davit. 3Davit chawk nawh ah nin, “Kaoh maix khaing dee mawx?” mai pui an ah nin ka Davit, “Aux hoik to khaing tab pui Isarelax.” 4Davit deeh ah nin ka nawh, “Mawh koe grawng ceu pa yuh ka mawx? krai aux mhong liak, ” mai nawh pawk ah nin, pui hoik to khaing daux bang naing mai hoik goh ti yum tom nie, Sawlux mai kawn simex nawh Yawnasan kawx hoik yum.” 5Davit deeh ah nin Sawlux mai kawn simex nawh Yawnasan yuh ka mawx? 6Pui awn ju an krai ah nin, “Yam hoek aux piang gawng Gilabaw, daux pa ang tix keud ce, aux yaox hoik sigup Sawlux ka piang pliah cao tix mai cub kru naing ling lawx brung, pui naing brung khankix niied ti pheet nawh. 7Yam veeh Sawlux ti jhak ka plak khaix tix, nawh yaox aux mai kok ka aux mai aux deeh pawk ah nin, aux ot tin, 8nawh ah nin ka aux, mawh maix pui mawx? aux deeh pawk ah nin, aux mawh pui Amaliet. 9Mai nawh ah nin ka aux, hoek tin mai pah aux yum, mawh kheu aux kied kha rhawm tix, kheu ang aux chix dud rhawm, 10mawh kheu nan aux hu ka nawh mai pah nawh yum, kheu hoik kriem tawng aux ang nawh lai pon im ka dee goh tix mai aux hoik peeik mhok khri khaing kaing nawh mai ble pa ceep nawh ka taix ti mai aux hoik viex an hoek tin ka cao simiang aux.”#1Sa 31:1-6; 1Been 10:1-6 11Yam an Davit riah kraung ceep tix mai pui pa ot tau mai nawh kawx yuh awm an. 12Kix yiiem doe mai twah pa ih tom hoek plak bo, son Sawlux mai son kawn simex nawh Yawnasan mai son pui Siyiex khankix mai son pui nyiex ma pui Isarelax, mawh kheu hoik goh kix ti yum ka lawm vaig khawmuik. 13Davit chawk ka pui awn ju pa hoik krai grawng ceu an ah nin, “Mawh maix pui kaoh khaing dee mawx?” mai nawh deeh pawk ah nin, “Aux mawh kawn simex pui tang ceu pui Amaliet.” 14Davit ah nin ka nawh, “Maix ang koe krax lhat graung, sonsang nyeu maix taix tix, pah ka pui pa hoik groi Simiang Siyiex rawm bee piang yuh ka mawx?” 15Davit kok kawn nyawm awn ju ah nin, “Hu mai pah nawh yum, ” mai kawn nyawm awn ju an pah nawh yum. 16Mawh kheu nan, Davit ah nin ka nawh, “Kieh nham maix deeh hoek piang cao maix, mawh kheu jheeh cao maix mawh pa kham mhai rug son cao maix, kheu ah maix nin, aux hoik pah pui pa hoik groi Siyiex rawm bee piang yum heue.”
Lox Yiiem Doe Davit
17Davit yiiem doe mai ah lox rhax in ka son Sawlux mai ka kawn simex nawh Yawnasan, 18Nawh krai sonsang gau pui Yudax ka lox lai rhax ah in, lai rhax in mawh pa hoik tiiem ti deuh ka daux phuk lai Yasha.#Yaw 10:13 19“Pui Isarelax khankix eue, min plakngai maix hoik yum piang dee pa lhaong maix, pui naing pa vao rhawm kawx hoik goh ti yum. 20Paw krai grawng an ka daux veng Gata, paw krai pao grawng in, ka daux krax veng Ashakelon, aux lhat kawn bun pui Philitix koe krax pa gaux rhawm, phan ang mawh nan, aux lhat kawn bun pui pa ang nyang pat hak, koe krax pa nyawm rhawm. 21Gawng Gilabaw khankix eue, paw kieh rawm ciex mai rawm lhiex cod piang pex mai paw kieh plix khaox plix ox, pa sang tan koe ka daux kaung, grawh grawng nawh, plah rhiem pa tiebtie, cao pa ting riang rao khankix, hoik mawh pa nu nai pui ka, pliah rhiem pa tiebtie cie Sawlux, pa kraix bee kawx hoik rhaw.” 22“Ak cie Yawnasan ang lai deeh hoek giex mai lawm vaig cie Sawlux kawx ang mawh pa deeh ing yi, khaing nham pui yum mai khaing klon bee pui ting riang rao khankix.” 23Yam kawn im ju Sawlux mai Yawnasan hoik mawh pa koe krax moh krax rhawm mai pa khaw rhawm pui ka mai yam yum kiex kawx, kiex ang gwieh khaing paox ti, kiex nie lheu phai khaing klang krih mai nie lheu ting riang khaing sivai sangsi.” 24“Kawn bun Isarelax khankix eue, yiiem grai son Sawlux, pa hoik kieh pex yaox ti ceep kraung pa raoh rawt mai pa mhawm grang mai pa hoik jawg bre kraung khri piang kraung ceep pex.” 25Pui pa kied ting riang rao, hoik goh ti yum, ka daux sigreung bang naing, “Yawnasan pa yum ka dee pa lhaong pex khankix.” 26Pux aux Yawnasan eue, aux hoik laux rhawm ka son maix, maix mawh pa tawx krax nyawm rhawm ka aux, krax moh maix mawh pa daox deng ka son aux, mawh pa nie lheu blon khaing krax moh bun khankix.” 27Pui pa ting riang rao hoik goh ti yum mai kraung naing hoik mawh pa som nai heue.”
Currently Selected:
2 SAMOELAX 1: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012