Nehemías 1
1
Nehemiase' cu payalchi' tu yo'olal u caajal.
1Lela' u tzicbalil Nehemías u paal Hacalías. Tu ja'abil veinte ti' u ajawil Artajerjes, ti' le winal cu kaaba'intic Quisleu, teen Nehemías ti' yanen ca'ach tu caajil Susae', 2ca j kuch in sucu'un Hanani yéetel dze'edzec máaco'ob, ti' u taalo'ob tu lu'umil Judae'. Tin káat chi'itaj ti' bix yanil u caajil Jerusalén yéetel xan tu yo'olal le judiob ma' j bisa'abo'ob táanxel lu'umilo'. 3Ca tu núucajo'ob: Le máaxo'ob ma' j bisa'abo'ob táanxel lu'umile', le j p'áato'ob te j lu'umo' talam yaj cuxlico'ob, subtzil xan ba'ax cu yúuchul ti'ob. Wa tu yo'olal Jerusalene', ju'uju'ut u pakilo'ob bakpachtic, u jool najilo'obe' tóoca'ano'ob.
4Le ca tin wu'uyaj le ba'axo'ob cu ya'alico'obe', culajen j okol, j p'áaten dze'edzec kiino'ob sen yaj in wóol, táan in su'ukin yéetel táan in payalchi' tu táan u Junab Kuil ca'an. 5Ca tin wa'alaj ti': Yuumtzil, teche' u Kuilech Ca'an, nojochech yéetel sajbe'entzil Junab Kuech, Teech a p'atmaj ma'alob jejedzlil a nup t'aan chuca'an xan wóolal ti' le máaxo'ob u yaabiltmajecho'ob yéetel cu dzo'ocbesico'ob a nu'ucbe'en t'aano'ob; 6bejela'e' quin káat óoltic ti' teech ca a wu'uy le payalchi' quin beetic yéetel kiin, bey xan yéetel áakab tu yo'olal le a palitzilo'ob israelitaobo'. Quin kaj óoltic to'on israelitaone', dzo'oc kebanchajal ta táan, ¡tac teen yéetel in láaktzilo'ob dzo'oc j kebantal! 7Tumen j cuxlajo'on kaas ta táan; ma' t dzo'ocbesaj a nu'ucbe'en t'aano'ob, a wa'almaj t'aano'ob yéetel le tzol xiquino'ob ta dzaj ti' to'on tu chi' a palitzil Moisés. 8Ka'ajac ti' teech bix ta kuben t'antajilac, wa to'on c kebanchajale', yaan a ki'itbesico'on ti' tuláacal yóokolcaab; 9ba'ale' wa ca suunaco'on ti' teech, yéetel c dzo'ocbesic a nu'ucbe'en t'aano'ob yéetel c beetic je'el bix u najmale', quex ca ki'itbesa'aco'on tac tu xuul u naklil yóokolcaabe', bíin a molo'on yéetel bíin a biso'on tu ca'a téen ti' le quili'ich cúuchil ta yéeyaj u ti'al u cajtal a kaaba'o'.
10To'one' a palitzilo'on yéetel a caajalo'on, ta tocajo'on yéetel nojoch páajtalil yéetel xan nojoch muuk. 11Yuumtzil quin káat óoltic ti' teech, ca a wu'uy in payalchi', yéetel u káat óolalo'ob a palitzilo'ob, leti'obe' chéen táan u dzíiboltico'ob u tziquiquecho'ob. Quin káatic ti' teech xan ca a beet u bin teen utzil yéetel ca lúubuquen utzil ti' ajaw. Teen máax cu dzáic ca'ach u yukul ajaw Artajerjes.
Currently Selected:
Nehemías 1: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992