Job 1
1
Kue', cu cha'ic u sen óotzilchajal Job
1Yanchaj tu lu'umil Uz jun túul j xiib cu kaaba'intic Job, le j xiiba' sen toj ca'ach u cuxtal, jach u yoquesmaj u yóol u meyajtic Ku, canantic ma' u beetic kaas ti' mix máac. 2Jobe' yaan ca'ach siete u j xibil paalal yéetel óox túul u x ch'upul paalal, 3leti'e' u yuumil ca'ach siete mil j tamano'ob, tres mil camello'ob, quinientos u dzáamilo'ob u wacaxil u bukulta'al lu'um yéetel quinientos x burraob. Sen ya'ab xan ca'ach u palitzilo'ob. Leti' u asab ayikalil ti' tuláacal le j lakinilo'obo'.
4U paalal Jobe', suuc ca'ach u kiinbesico'ob noj janal tu yotoch u jujun túulilo'ob, ti' le kiin u t'oxmajilo'obe', ma' tu p'áatal wa ma' u t'anico'ob janal xan u x íidzino'ob tu yicnalo'ob. 5Cu dzo'ocol u máan u kiinilo'ob le noj janalo'obo', Jobe', cu t'anic ca'ach u paalalo'ob, cu líikil piknal u sáastale', cu kubic tóocbil ba'alche'ob tu kaaba' u jujun túulil u ti'al u yuztquintico'ob ti' u kebano'ob. Lelo', mantadz u beetic ca'ach Job, tumen cu tucultic ma' xan wa j kebanchaj u paalalo'ob ti' u kaakas t'antico'ob Ku tu pucsi'ikalo'obi'.
6Ti' jun p'éel u kiinil unaj u bino'ob ca'ach tu táan Yuumtzil u aj meeyjulo'ob ca'ane', j bin xan yéetelo'ob u ángelil tacpool. 7Yuumtzile' tu káat chi'itaj ti':
¿Tu'ux a taal?
Le u ángelil taacpoolo', tu núucaj:
Dzo'oc in máan in láaj xíimbalt tuláacal u yóokolcaabo'.
8Yuumtzil túune' tu ya'alaj ti': ¿Ta wutzil ilaj in palitzil Job? Mina'an u láak máac tu yóokol lu'um je'el bix leti'e', ca u meyajten tu yéetel chuca'an óolal, toj u cuxtal yéetel x ma' si'ipil, cu cananticubáa ma' u beetic kaas ti' mix máac.
9Ba'ale' le aj tacpoolo', tu núucaj: Leti'e', ma' chéen cunel u meyajtiquech yéetel chuca'an óolali'. 10Teche', ma' ta cha'ic u beeta'al mix ba'al ti' leti', mix ti' u láaktzilo'ob, mix ti' le ba'alo'ob yaan ti'ob; teche', ca beetic u bin utzil ti' tu yéetel tuláacal ba'ax cu beetic, sen ya'ab u yaalak, leti'e' asab ayikalil ti' tuláacal le lu'umo'oba'. 11Ba'ale', láaj lukes ba'ax yaan ti' ca a wila'a wa ma' tu loolob kaakas t'antiquech tu táan a wich.
12Yuumtzile', tu núucaj ti' le aj tacpoolo': Ma'alob. Beet je'el ba'axac a káat yéetel u baluba'ob Jobe', chéen ba'ale', ma' a beetic mix jun p'éel kaas ti'.
Le aj tacpool túuno', j luk tu táan Yuumtzil.
13Jun p'éel kiin ca'aliquil u j xibil paalal yéetel u x ch'upul paalal Jobe', táan ca'ach u kiinbesico'ob jun p'éel noj janal tu yotoch u nojoch sucu'uno'obe', 14j kuch jun túul j xiib tu yotoch Jobe', ca tu dzáa le péectzil ti'a': Táan ca'ach c buklic le lu'um yéetel le wacaxo'ob naadz tu'ux cu janal le x burraobo'; 15ca téec kuch le j sabeobo', ca tu yocoltajo'ob le wacaxo'obo' cu dzo'ocole', tu quíimsajo'ob xan yéetel u yej máascab le j xiibo'obo'. Chéen teen j púudzen u ti'al in taal in wa'al ti' teech.
16Ma' qui' dzo'ococ u t'aan le xiibo', j kuch u láak jun túule' ca tu ya'alaj: J lúub jun p'éel u jaadz cháaque', ca tu láaj quíimsaj le aj canan tamano'ob pa'ate'e yéetel le j tamamno'obo'. Chéen teen j púudzen u ti'al in taal in wa'al ti' teech.
17Ma' qui' dzo'ococ u t'aan le j xiibo', ca j kuch u yóox túule' ca tu ya'alaj: J taal óox múuch' j caldeob t óokole', ca tu láaj ocoltajo'ob ti' to'on le camello'obo', cu dzo'ocole', tu láaj quíimsajo'ob le j xiibo'obo'. Chéen teen j púudzen u ti'al in taal in wa'al ti' teech.
18Láili', ma' dzo'oc u t'aan le j xiiba', ca j kuch u láak jun túule', ca tu ya'alaj: A j xibil paalal yéetel a x ch'upul paalale', táan ca'ach u kiinbesico'ob jun p'éel noj janal tu yotoch u nojoch sucu'uno'obe', 19ca j téec taal jun p'éel u moson iikil x tocoy lu'ume', ca tu jadzaj tu can tzéelil le najo', ca tu lúubsaj tu yóokol a paalal. Tuláacalo'ob j quíimo'ob. Chéen teen j púudzen u ti'al in taal in wa'al ti' teech.
20Job túune', j líik sen yaj u yóole', ca tu jataj u nook, tu kosaj u tzo'otzel u poole', ca j chinlaj u ti'al j kultaj.
21Ca tu ya'alaj: Chacnulen taaliquen way yóokolcaabe', chacnulen bíin in p'atej. Yuumtzil dzáa ti' teen tuláacal, Yuumtzil xan lukes ti' teen; ¡qui'iqui' t'anbil u kaaba' Yuumtzil! 22Quex tumen úuch tuláacal le ba'alo'oba', Jobe', ma' j kebanchaji', mix tu ya'alaj mix ba'al kaas tu yo'olal Kui'.
Currently Selected:
Job 1: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992