Jeremías 1
1
1Le dzíiba' cu ya'alic bix cuxlajic yéetel ba'ax tu beetaj Jeremías u paal Hilcías. U ch'i'ibal Jeremíase' cu taal ti' aj kiino'ob caja'ano'ob ca'ach tu caajil Anatot, tu lu'umil u ch'i'ibalo'ob Benjamín. 2Yuumtzile' tu t'anaj Jeremías tu trece ja'abo'ob u ajawil Josías, u paal Amón, táan u ajawiltic Judá. 3Bey xan tu t'anaj tu kiinilo'ob Joacim, u paal Josías, táan ca'ach u ajawtic Judá, tac tu once ja'abil u méektáan Sedequías u paal xan Josías, le ca tu méektáantaj Judae'; u káat ya'ale', tac tu cinco winalil le ja'abo', le ca j bisa'abo'ob náach u cajnáalilo'ob Jerusalene'.
Yuumtzile' cu t'anic Jeremías
4Yuumtzile' tu t'anajen ca tu ya'alaj ti' teen:
5Ma'ili' in dzáa a cuxtale', dzo'oc ca'ach in kaj óoltiquech;
ma'ili' síijiqueche', dzo'oc ca'ach in jun páaycuntiquech,
u ti'al a beetic u aj bóobatil caajo'obo'.
6Tene' tin núucaj:
¡Yuumtzil! ¡tene' jach paalen ma' xan in wojel t'aani'!
7Ba'ale' Yuumtzile' tu ya'alaj ti' teen:
Ma' a wa'alic wa jach paalech.
Teche' yaan a bin tu'ux bíin in túuxtech,
yéetel yaan xan a wa'alic ba'ax bíin in wa'al ti' teech.
8Ma' a ch'a'ic sajaquil ti' mix máac,
tumen teen bíin yanaquen ta wéetel u ti'al in canantech.
Teen Yuumtzil, teen a'alic ti' teech.
9Yuumtzil túune' tu tich'aj u kab, ca tu cóojsaj tin chi', ca tu ya'alaj ti' teen:
10Tene' quin dzáic in t'aano'ob ta chi'.
Bejela'e' táan in dzáic ti' teech páajtalil
Tu yóokol ajawilo'ob yéetel múuch' caajo'ob,
u ti'al a jobic yéetel u ti'al xu'ulsic caajo'ob,
u ti'al pa'ic yéetel jenic caajo'ob,
u ti'al xan a líiksic yéetel u ti'al a wa'acunsic caajo'ob.
11Yuumtzile' t'aanajene' ca tu ya'alaj teen:
Jeremías, ¿Ba'ax ca wilic?
Ca tin núucaj: Taan in wilic u kab jun cúul almendro.
12Yuumtzile' tu ya'alaj teen: Jaaj a t'aan.
Tumen táan in pa'atic u yúuchul ba'ax tin wa'alaj.
13Yuumtzile' tu ca'a t'anajen,
ca tu káat chi'itaj ti' teen: ¿Ba'ax ca wilic?
Tene' tin núucaj ti': quin wilic jun p'éel cuum cu looc,
chéen ta'aytac u wéequel líikbal j xaman.
14Yuumtzil túune' tu ya'alaj ti' teen:
Líikbal j xaman bíin talac u wéequel yaj óolal
tu yóokol u cajnáalilo'ob lu'um.
15Teen Yuumtzil, teen a'alic
bíin in ca'aj in t'aan tuláacal u ajawilo'ob j xaman.
Bíin talac ajawo'ob u dza'ob u jalach káanche'ob tu jool u caajil Jerusalén,
actáan ti' tuláacal u tuulumilo'ob bakpachtico'
yéetel actáan ti' tuláacal u caajilo'ob Judá.
16Leti' le jadz bíin in xot kint
yóokol le aj kebano'ob tu xúump'attajeno'obo',
le máaxo'ob tu tóocajo'ob pom ca tu kultatajo'ob
táanxel lu'umil kuob, leti'ob beetmailo'ob.
17Ba'ale' teche' ma' a ch'a'ic sajaquilil;
xeen ca wa'al ti'ob tuláacal ba'ax dzo'oc in wa'alic ti' teech.
Ma' a ch'a'ic sajaquil, tumen wa ma'e'
tene' je'el in beetic a quiquilanquil tu táano'obe'.
18Bejela'e' quin dzáic ti' teech muuk
beyech caaj bakpachta'an tu tuulume',
beyech jun p'éel ocom fierro u ca'aje', beyech tuulum bronce u ca'aje',
u ti'al a wa'atal j t'aan tu táan tuláacal u caajilo'ob Judá:
ti' u ajawilo'ob, u nuuquilo'ob, u aj kiino'ob, yéetel tuláacal u cajnáalilo'ob.
19Leti'obe' bíin u ba'ateltecho'ob ba'ale' ma' bíin páataco'ob ta wéeteli'
tumen teen bíin ti'anaquen ta wéetel u ti'al in canantech.
Teen Yuumtzil, teen a'alic ti' teech.
Currently Selected:
Jeremías 1: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992