Habacuc 1
1
Cu tacpool Habacuc ti' Ku tu yo'olal keechel ba'alo'ob cu beeta'al
1Lela' leti' le péectzil tu ye'esaj Ku ti' Habacuc.
2Yuumtzil, ¿Ba'ax kiin bíin a ch'en xiquint in sen awat káat óolala'?
¿Ba'ax kiin bíin jáawac in payalchi' tu yo'olal le meyaj loob
u ti'al ca talaquech a wáanto'on?
3¿Ba'ax o'olal ca beetic in wilic sen ya'ab yaj óolal yéetel kasa'anil?
Súutpachta'anen tumen meyaj loob bey xan tu yéetel ch'éejsaj;
tuláacal tu'ux yaan x wo'oquin bey xan ba'atelo'ob.
4Ma' táan u dzo'ocbesa'al a wa'almaj t'aan,
yéetel cu xanabcha'ata'al ba'ax cu najmata'al,
loolob máaque' cu ch'a'apachtic le utzul máaco'
bey xan máax kechic ba'ax ti'ibil.
Yuumtzile' cu núuquic u káat chi' Habacuc
5Ilawile'ex le múuch' caajo'ob bakpachtmaile'exo';
pacte'ex chu'upuque'ex yéetel jak óolal.
Ta'itac in beetic nucuch ba'alo'ob
ba'ale' ma' bíin a wocsaj óolte'ex wa ca tzicbalta'ac ti' te'ex.
6Bin in ca'aj in líikes u ti'al j ba'atelt le j caldeobo',
leti'obe' j loolob máaco'ob mantadz u káato'ob
u yáalcabto'ob tuláacal yóokolcaab tzéelmantzéel,
u ti'al ca u ch'a'ob le lu'umo'ob ba'al a ti'ale'exo'.
7Jakbe'eno'ob yéetel sajbe'entzilo'ob,
ma' tu éejemtico'ob u láak a'almaj t'aan, chéen le u ti'alo'obo'.
8U tzíimino'obe', asab chich u yáalcabo'ob ti' yáalcab j coj,
asab dzíictaco'ob ti' u peekilo'ob x tocoy lu'um.
U j nat' tzíimino'obe' ya'abo'ob u bin yáalcabo'ob,
náach yanilo'ob quéen u puluba'ob j ba'atel
je'el bix u pulicubáa jun túul cóot tu yóokol u yo'och.
9Cu ch'éejsico'ob tuláacal ba'ax tu'ux cu máano'ob;
tu'ux cu máano'obe' cu chupico'ob yéetel sajbe'entzilil
le máaxo'ob cu bisa'alo'ob j kalbilo'
asab ya'abo'ob je'el bix u sa'am lu'umil ka'anab.
10Cu p'a'astico'ob u ajawilo'ob yéetel máaco'ob jach kabéeto'ob.
Cu che'ejltico'ob le tuulumo'obo',
tumen cu dzáico'ob u níixilo'obe' tu tzéelo'ob,
cu ch'a'ic u ti'alto'ob.
11Cu ch'aacato'ob je'el bix u ch'aacat jun p'éel chac ikale';
leti'obe' chéen u muuko'ob cu kuintico'ob.
Habacuque' cu ca'a tac pool
12Yuumtzil, ¿Ma' wa cuxa'anech u ti'al mina'an a xuuli',
in Ku quili'ichech, mina'an quíimil xan ti' techi'?
Yuumtzil in aj ta'acbesaj, teche' ta dzáa muuk le j caldeob
u ti'al ca u beeto'ob a p'is óol.
13Teche' jach láaj utz a wanil u ti'al ca a cha'a u beeta'al ba'ax kaas,
bey xan u ti'al ca a wil u beeta'al loobil;
¿bix túun a cha'antic maacal a chi' le j quíimsaj wíinico'ob,
ca maquic a chi' ca'aliquil le aj loobo'
cu ch'éejsic máaxo'ob asab utzo'ob ti' leti'?
14¿Ba'axten ca beetic ti' le j xiibo'ob
je'el bix a beetic ti' u cayilo'ob le ka'anabo',
bey ba'alche'ob mina'an máax méektáantico'ob?
15Le j caldeobo', cu ch'a'ico'ob u láak múuch' caajo'ob
je'el bix u chu'ucul cay tumen j caybalo'obe';
cu chuquic tu yéetel u lutzub wa tu yéetel u káanilo'ob caybal,
le quéen u yil buca'aj nica'anile' cu sen qui'imachajal u yóol.
16Le t o'olalo', le j chuc cayo' cu yaabiltic u lutzubo'ob yéetel u káanilo'ob u caybal,
cu kubic quiimsbil ba'alche'ob, cu tóoquic xan poom ti' u tzicbe'enil,
tumen tu yo'olalo'obe' yaan ya'ab ba'al u jaante.
17Bey, ¿wa bíin xi'ic u chuquico'ono'ob le j caldeobo'?
¿Xi'ic u bin wa u quíimsico'ob wíinico'ob x ma' ch'a'a óotzilil?
Currently Selected:
Habacuc 1: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992