Daniel 1
1
U chu'unpajal le dzíba'
1Ichil u yóox p'éel ja'abil u ajawil Joacim, u ajawil Judae', Nabucodonosor u ajawil Babiloniae' j kuch Jerusalén yéetel u múuch' aj ba'atelo'ob ca tu bakpachtaj le caajo'. 2Yuumtzile' tu cha'aj ca ma'achac Joacim tumen Nabucodonosor, bey xan ca lúubuco'ob tu kab, o'oli' tuláacal u nu'uculo'ob u kulnaj Ku. Nabucodonosore' tu bisaj le máaco'ob kala'ano'obo' tu caajil Babilonia, le quili'ich nu'uculo'obo' tu dzaj tu'ux yaan u ayikalil u kulnaj u kuob; 3tu ya'alaj xan ti' Aspenaz, u noojoch u aj meeyjulo'ob le jalach najo', wa yaan taasa'ano'ob ichil le j israelitaob u paalal ajaw, wa u paalal dzuulo'ob, 4táanquelmo'ob, qui'ichquelem u yila'alo'ob mina'an mix ba'al kaas tu wíinclilo'ob, canbalnaja'ano'ob yéetel yaan u na'ato'ob, bey xan ca u yojéelto'ob tuláacal ba'axo'ob u najmal u yojéelta'al, bey xan nu'uca'ano'ob u ti'al ca meyajnaco'ob jalach naj. Ti' le ti'obe' bíin ca'anbesa'ac u t'aan yéetel u dzíibil ju'uno'ob le j caldeobo'. 5Nabucodonosore' tu ya'alaj xan ca dza'abac sáamsamal ti' le táanquelmo'obo' láili' le janal yéetel le vino cu dza'abal xan ti'o', u najmal u ca'anbesa'alo'ob ichil óox p'éel ja'abo'ob, cu dzo'ocole' cu p'áatalo'ob meyajtic.
Daniel yéetel u yéet paalalo'ob tu jalach naj ajaw
6Ichil le táanquelemo'obo' ti' yaan ca'ach Daniel, Ananías, Misael yéetel Azarías, u ch'i'ibalo'ob u múuch' cajtalilo'ob otochnáalo'ob Judá, 7le paalalo'oba' j ke'ex u kaaba'ob tumen u nojochil u aj meyajo'ob le jalach najo': ti' Daniele' tu dzaj u kaaba'int Beltsasar; ti' Ananíase' tu dzaj kaaba'int Sadrac; ti' Misaele' tu u kaaba'int Mesac; ti' Azaríase' tu dzaj u kaaba'int Abed-nego. 8Ba'ale' Daniele' tu dzaj tu yóol ma' u kebanchajal yéetel u janal, mix yéetel u vino ajaw, ca tu ya'alaj ti' u nojochil u aj meyajo'ob jalach naj ma' u beeta'al u kastal u yanil#1.8 Kastal u yanil, tumen le judíobo'ca'ambesa'an ca'ach ti'ob ma' u jantico'ob je'el ba'axac janalile', wa cu jaantico'obe' cu p'áatalo'ob ma' utz yanilo'obi'. yéetel le janalo'obo'. 9Ku j beet ca'a lúubuc utzil Daniel ti' u nojochil u meyajo'ob le jalach najo', 10Ba'ale' tu ya'alaj: Sajaquen ti' ajaw in dzuulil. Le ti'e' tu ya'alaj ti' teen ba'ax u najmal a jaantique'ex yéetel ba'ax u najmal a wukique'ex, tumen wa cu yilic sacpile'ene'ex yéetel óotzil a wiche'ex, ma' bey le u láak táanquelmo'obo', ta wo'olale'exe' ajawe' bíin u ya'al ca quíimsa'aquen.
11Daniel túune' j t'aanaj yéetel le aj canan dza'an tumen u nojchil le j meyajo'ob le jalach naj u ti'al u canantic Daniel, Ananías, Misael yéetel Azarías, ca tu ya'alaj ti': 12Quin káat óoltic ti' teche' ca a túunt yéetel a j meyajo'oba': a'al ca dza'abac ti' to'on chéen janalbe'en xíiwo'ob, yéetel ca dzabac chéen ja' c uk diez kiino'ob. 13Cu dzo'ocol u máan le kiino'obo', ca quetic bix anilo'on yéetel le j táanquelmo'ob tzéenta'abo'ob yéetel le janal cu jaantic ajawo', beet túun t éetel je'el bix bíin a wile'.
14Le aj canano' tu éejemtaj, diez kiino'ob, tu beetaj yéetelo'ob beyo'. 15Cu dzo'ocol u máan le diez kiino'obo', u táan yicho'obe' cu yila'al t'a'ajtaco'ob yéetel toj u yóolo'ob ti' tuláacal le u láak táanquelmo'ob cu jaantico'ob le ba'ax cu jaantic le ajawo'. 16Bey túuno', le aj canano' cu bisic le janal yéetel le vino u najmal u jaantico'ob yéetel u yukico'ob ca'acho', ca túun tu dzaj ti'ob janalbe'en xíiwo'ob.
17Ti' le can túul táanquelmo'oba' dzaab ti'ob tumen Ku na'at yéetel ch'a'a nu'uctajil u ch'a'a nu'uctico'ob tuláacal u jejeláasil dzíibo'ob bey xan tuláacal kaj óolajil. Daniele' cu na'atic xan ba'ax u kat ya'al tuláacal u jejeláasil náayo'ob yéetel wayako'ob. 18Le ca j kuch le kiin dzaab tumen ajaw u ti'al ca bisa'ac le j táanquelmo'ob tu táane', u nuuquil u aj meyajo'ob jalach naj tu bisajo'ob tu táan ajaw. 19Ajawe' j t'aanaj tu yéetelo'ob, ichil tuláacal le j táanquelmo'obo', ma' j yanchaj mix jun túul quetic Daniel, Ananías, Misael yéetel Azaríasi', leti'ob túune' j p'áato'ob tu meyajto'ob le ajawo'. 20Ti' tuláacal le ba'axo'ob cu kabéetchajal na'atil yéetel ojéelajile', káat chi'ita'abo'ob tumen ajaw, ila'abo'obe' táaj yaan u ojéelajo'ob ti' le j meeno'ob yéetel ti' le aj na'ato'ob yano'ob ti' tuláacal u ajawilo'. 21Daniele' j p'áat te'elo' tac tu yáax ja'abil u ajawil Ciro.
Currently Selected:
Daniel 1: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992