1 Timoteo 1
1
Pabloe' cu dzíib ti' Timoteo
1Teen Pabloe', u apóstolen Jesucristo, túuxta'anen tumen bey tu ya'aljilac Ku c J tocsajil yéetel Yuumtzil Jesucristo, máax c alab óolal. 2Quin dzíibtic teech le ju'una', Timoteo, in jaajil paal ti' le ocsaj óolalo', táan in dzíiboltic ca yanac teech u siibal utzil, u ch'a'a óotzilil yéetel u jéedzel óolal Ku c Taata yéetel Cristo Jesús c Yuumtzil.
Tzol xiquino'ob tu contra tuusil ca'ansajo'ob
3Je'el bix tin káat óoltaj teech le ca j binen tu lu'umil Macedoniao', ca p'áataquech tu caajil Efesoe' bey quin káat óoltic teech bejela'e' u ti'al ca a wa'al ti' dze'edzec máaco'obe' ma' u ca'ansico'ob tuusil tuuculo'ob 4mix u ch'en xiquintico'ob tuuso'ob yéetel chéen tzicbatbil ba'alo'ob mina'an u xuul tu yóokol le úuchben láako'obo'. Le ba'alo'oba' chéen cu bisico'ob máac cunel ba'atel t'aano'ob yéetel ma' tu yáantico'ob u ti'al c dzo'ocbesic le kuben u dzaamaj to'on Kuo', tu yo'olal le ocsaj óolalo'.
5Tumen u biilal le a'almaj t'aan u ti'al ca c yaabiltbáa t baatzil yéetel jun p'éel yaacunaj sija'an ti' jun p'éel sac sac pucsi'ikal, ti' jun p'éel ma'alob tuucul yéetel ti' jun p'éel x ma' ca'a p'éel ichil ocsaj óolal. 6Yaan dze'edzec dzo'oc u p'atico'ob lela', yéetel dzo'oc u sa'atalo'ob ti' chéen cunel t'aano'ob. 7U káato'ob béeytal u j ca'anbesajilo'ob le a'almaj t'aano', ba'ale' ma' tu na'atico'ob mix le ba'ax cu ya'alico'obo' mix le ba'ax cu ca'ansico'ob yéetel kub óolalo'.
8C ojele' le a'almaj t'aano' ma'alob, wa cu beeta'al u meyaj ti' le ba'ax o'olal dza'ano'. 9Yaan c ojéeltique' mix jun p'éel a'almaj t'aan cu dza'abal u ti'al le máaxo'ob cu beetico'ob utzo', u jaajile' le a'almaj t'aano' dza'an u ti'al le máaxo'ob chich u pucsi'ikalo'obo', le máaxo'ob ma' tu yu'ubico'ob t'aano', u ti'al le máaxo'ob kasa'ano'obo', yéetel j kebano'obo', u ti'al le máaxo'ob ma' tu tziquiltico'ob Kuo' mix le toj u cuxtalo', u ti'al le máaxo'ob cu quíimsico'ob u taataob wa u maamaobo', u ti'al tuláacal le j quiimsaj wíinico'obo', 10u ti'al le máaxo'ob cu nup kebano'obo', wa cu kebantalo'ob yéetel u yéet máaquilo'obo', u ti'al le máaxo'ob cu yocoltico'ob máaco'obo', u ti'al le j tuuso'obo' yéetel le máaxo'ob cu ch'a'a chi'itico'ob u kaaba' Ku yéetel tuuso'. Le a'almaj t'aano' u ti'al xan tuláacal le ba'ax yaan tu contra le utzil ca'ansajo'obo'. 11Le utzil ca'ansaja' queet yéetel le nojbe'en ma'alob péectzil kubenta'an teen tumen le qui'iqui' t'anbil Kuo'.
U dza'abal nib óolal tu yo'olal u ch'a'a óotzilil Ku
12Quin dzáic nib óolal ti' c Yuumtzil Jésucristo, máax tu dzáa teen muuk u ti'al lela', tumen tu tucultaj chuca'an in wóole' ca tu dzáajen ti' u meeyjul. 13Tu beetaj tuláacal lela' quex quin lobiltic ca'ach yéetel in t'aano'ob, quin ch'a'apachtic ca'achi' yéetel quin poch'ic ca'achi'. Ba'ale' Kue' tu ch'a'aj teen óotzilil, tumen teen ca'ache'; ma' in wocsmaj in wóol ti'i', yéetel ma' in wojel ca'ach ba'ax quin beetiqui'. 14Le o'olale' u siibal utzil c Yuumtzile' jach nojochchaj tin wóokol, jun múuch' yéetel le ocsaj óolal bey xan le yaacunaj yaan to'ono' tu yo'olal nupa'anilo'on ti' Cristo Jesús.
15Le t'aana' jach jaaj yéetel unaj u yocsaj óolta'al tumen tuláacal, Cristo Jesuse' j taal way yóokolcaabe' u ti'al u toc le j kebano'obo', ichil lelo'oba' teen u yáaxil. 16Ba'ale' tu yo'olal lela' tu ch'a'aj teen óotzilil Ku, u ti'al beyo' Jesucristoe' ca u chíicbes ti' teen yáaxile' tuláacal u chuca'an óolal. Ca j béeychajen je'el bix jun p'éel ca'ansaj ti' le máaxo'ob bíin u yoques u yóolo'ob ti' leti'o' u ti'al ca yanac ti'ob cuxtal mina'an u xuul. 17Le o'olale' co'ox dzáic tziquil yéetel nojbe'enil mantadz ti' le jun túulili' Ku yaan u na'ato'. Amén
18Timoteo, in paal, quin dzáic teech le kuben t'aana' u ti'al ca a ba'atelt le ma'alob ba'atelo' yéetel ocsaj óolal bey xan yéetel ma'alob tuucul, je'el bix tu yáax a'alajo'ob le sucu'uno'ob j t'aanajo'ob ta wo'olal tu kaaba' Kuo'. 19Dze'edzeque', tu yo'olal ma' tu táan óoltajo'ob u ma'alob tuuculo'obe', dzo'oc u lúubulo'ob ti' u yocsaj óolalo'ob. 20Bey úuchic ti' Himeneo yéetel ti' Alejandro, máaxo'ob tin kubajo'ob ti' Satanás u ti'al ca u cano'ob ma' unaj u poch'ico'ob Kui'.
Currently Selected:
1 Timoteo 1: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992