Matthai 1
1
Jesuh Suahkehnak Pilepu Minkhummi
(Luk 3:23-38)
1Abraham ih ciitlang David, David ih ciitlang Khrih Jesuh ih suahkehnak pilepu minkhummi cu: 2Abraham cu Isaak ih pa, Isaak cu Jakob ih pa, Jakob cu Judah leh a naule ih pa, 3cun Judah cu Perez leh Zerah ih pa – an nu Tamar, Perez cu Hezron ih pa, Hezron cu Aram ih pa, 4Aram cu Aminadab ih pa, Aminadab cu Nashon ih pa, Nashon cu Salmon in pa, 5Salmon cu Boaz ih pa – a nu Rahab, Boaz cu Obed ih pa – a nu Ruth, Obed cu Jesse ih pa, 6Jesse cu Siangphahrang David ih pa a ii. Cun David cu Uriah ih nupi rum an ngeihmi Solomon ih pa, 7Solomon cu Rehoboam ih pa, Rehoboam cu Abijah ih pa, Abijah cu Asa ih pa, 8Asa cu Jehoshafat ih pa, Jehoshafat cu Joram ih pa, Joram cu Uzziah ih pa, 9Uzziah cu Jotham ih pa, Jotham cu Ahaz ih pa, Ahaz cu Hezekiah ih pa, 10Hezekiah cu Manasseh ih pa, Manasseh cu Amos ih pa, Amos cu Josiah ih pa, 11Josiah cu Babilon ah sal diinhmun in tahpi an ik lioah Jekoniah leh a naule ih pa a ii. 12Culeh Babilon ah sal diinhmun in tahpi an ik hnukah: Jekoniah cu Shealtiel ih pa, Shealtiel cu Zerubbabel ih pa, 13Zerubbabel cu Abiud ih pa, Abiud cu Eliakim ih pa, Eliakim cu Azor ih pa, 14Azor cu Zadok ih pa, Zadok cu Eliud ih pa, 15Eliud cu Eleazar ih pa, Eleazar cu Matthan ih pa, Matthan cu Jakob ih pa, 16Jakob cu Khrih timi Jesuh ih nu Mari ih pumah Josef ih pa a ii. 17Curuangah Abraham in David tiang san hleili a ii; cun David in Babilon sal ih tahpi an ik tiang san hleili; cun Babilon ah sal ih tahpi an ik in Khrih tiang san hleili a ii.
Messiah Jesuh Suahnak
(Luk 2:1-7)
18Messiah Jesuh suahnak cu hitihin a ii. A nu Mari cu Josef ih ham a ik lio, an omkhat hlanah Thiang Thlarau thawngin naupai in hmuh a ii. 19A pumah thok Josef cu miding a ik ruangah mipi tiah in Mari mualphosak a daw loih daitein ṭhul dingah khua a khang. 20Ihmansela, acuti ti dingih a ruahcat hnuk caang, a mangla ah vanmi a hemah langin, “David ih ciitlang Josef, Mari hi na nupi ah lat ding cu phang duh hlah, icatile a sungih a paimi nau cu Thiang Thlarau thawngin a ii. 21Tiapa hring lei khawh, a min ah Jesuh na vawh thok, icatile a mipawl an sualnakpawl sungin a rung hngai thok,” tiah a ti. 22Hi hmawhhmawh a cannak cu Bawipa ni profet thawngin a sim taakmi:
23“Zoh hman, lenghriim ni
naupai lei khawh tiapa a hring thok,
cun a min ah Emmanuel
tiah an vawh thok,”
ti khi kimsak dingah a ii.
Emmanuel ih tican cu “Pathian kan hemah a om,” #Isa 7:14. ti a ii. 24Josef cu a han ṭhantiak tikah Bawipa ih vanmi ni thu a piak mangin a vua; Mari cu a nupi ah a la, 25ihmansela tiapa a hrinngah hlansung cu nupipumah diinhmun in a pawl lo. Culeh a hrin tikah a min Jesuh a vawh.
Currently Selected:
Matthai 1: KHBF
Highlight
Share
Copy
Want to have your highlights saved across all your devices? Sign up or sign in
Khualsim Holy Bible © Bible Society of Myanmar, 2021.