MALASYI 3
3
1Bajegɔ Nyɛʔɛlɛ la Sye wì bɛfu fɔlɔ à li yo: «Mí bi na pitunŋu troʔo we. Wí bi ya na kloʔo yɛli ge wa na yɛʔɛ ge. Yé na Bajegɔ Nyɛʔɛlɛ la ca, lí bi je wa li sraʔa go ni bì ye fo. Yoflinmi nofele pitunŋu ŋa ye cori ge, wí bi ban.#3:1 ma wèle wa Mat 11:10; Mar 1:2; Luk 1:76; 7:27 ni wè.
2Hɛn bi ba gban bì yere wi panwlɛʔɛ na ge? Nòo ba wì tyɛʔɛ nyiŋi ga na, pa han bi gban bì go be? Mɛjɛn wí bi ba bo nɛ pa wɛrifiʔi kwɔʔɔ nyɛ ga pé naʔa tɛʔɛlɛ ge bì bo nɛ pa kpasyoro jeʔefɔlɔ sɛʔɛ nyɛ we.#3:2 ma wèle wa Jow 2:11; Tyɛ 6:17 ni wè.
3Wí bi ba glɛn bì wɛrifiʔi tɛʔɛlɛ ge bìʔi yɛli. Bì Lefi kluʔu yɛli ge, bì pe yɛli nɛ pa wɛrifiʔi nyɛ ge ní tɛ nì pé na pi yɛli pomo ma na ge. Pé bi baa sraʔayee fara Bajegɔ Nyɛʔɛlɛ ma sinmi ní. 4Ki nyiŋi na, Juda kluʔu nì, Jerusalɛmu kaʔa woo ní, pe nadanma akanma pí bi ba Bajegɔ Nyɛʔɛlɛ glan le, nɛ pa nyigblɛrɛ da nyɛ ti da doró ti kaʔa nyɛ ge yɛkplɛʔɛ gee na ke da doró ge.»
5Bajegɔ Nyɛʔɛlɛ la Sye wì bɛfu fɔlɔ à li yo: «Mí bi flo wa yè tanla kiti kala na le. Mí bi fyala bì yo bee kala na pé nyɛ nyafɛɛ ní, ní kyɛnrɛ hanrifɛɛ kala na le, bee pé na pè klan ní bee ní poò na tungɔɔ pe sraʔa kanʔa pe ma ge, mâ po pé na kucaa ní piclibee cɔlɔ be, na klomo kanʔa lepanglɛɛn ma be, bee poò na fyaʔa ná na ge, mí bi fyala bì kiti kon pé na.»
Ye hrù ye pan Bajegɔ Nyɛʔɛlɛ krugu le
6«Mí nyɛ Bajegɔ Nyɛʔɛlɛ. Wò na krɛʔɛ. Kiì kala na, yèé Jakɔbe kluʔu pii be ye ìn dì gu ge. 7Bajegɔ Nyɛʔɛlɛ la Sye wì bɛfu fɔlɔ à li yo nɛ: Mà kpe yè tokpɔɔ pe nyiŋi na, ye da laʔá mà na tunmu kayoro wa de. Ye ìn dàá ti cun kmaʔa bì da ti kpɔʔɔ. Ye hrù ye pan nà krugu domi pa mi hru bì ban yèé krugu be kpo. Di yé naʔa nyu mà yo pa ye hru bì ban nà krugu pomo mimii na? 8Hɛn pɔɔ gban bì Nyɛʔɛlɛ li woʔo yu ge yo? Di yèé yé ma na woʔo yu ge. Yé naʔa yugu mà yo yé ma na woʔo yu ge mɛlɛ? Yé na na tahaʔa nì, ní nadanma akanma yu be.» 9Bajegɔ Nyɛʔɛlɛ la Sye wì bɛfu fɔlɔ wɔ̀ɔ yo: «Yé ma danŋa, mɛjɛn ye tyɛnlɛ hɛɛn pè bɛfu pé ma na woʔo yu ge.
10Yee ban na tahaʔa nì kí po funŋuʔu, ye baʔa tyɛʔɛ wa krɔʔɔ tyɛʔɛhaʔa na, jango akaʔa bi da wa na go ni ge. Ye na po ye na wèlé nàʔa po mi ìn bi namuru finɛtriyee nyɛʔɛ ye kan bì kanla fun frɛmɛ trigi ye na fɔ mi tyɛʔɛhaʔa kò gáa daʔa adi.»#3:10 ma wèle wa Sraʔa 27:10; Ton 18:21-24; Lado 12:6; 14:22-29; Neʔe 13:12 ni wè. 11Bajegɔ Nyɛʔɛlɛ la Sye wì bɛfu fɔlɔ à li yo: «Mí bi fyɛnrɛ da yrigi tí na akaba ka be. Ti ìn bi ga ní bì yè akaba ba cɔʔɔ ye na fali ge. Yè klo hrɛsɛn tiri kà nigbe ìn bi go basɛʔɛ.» 12Bajegɔ Nyɛʔɛlɛ la Sye wì bɛfu fɔlɔ à li yo: «Kloʔo ke tɔɔ hɛɛn pè bɛfu pé bi baa ye yeri frɛmɛ pii, mɛjɛn yè klo lí bi ba bo tanla.»
Nyɛʔɛlɛ lí bi ba li sinmi tyɛʔɛ hɛɛn na be
13Bajegɔ Nyɛʔɛlɛ à li yo: «Yé ma kayopere yo ná ma. À ye yo: ‹Yé ma nyaʔa kayopere yo ná kan? 14Yé naʔa nyu mà yo wó ma tunŋu kɔ Nyɛʔɛlɛ kan le waʔafe mà yo wo dáa li kaʔa gee li dá gon mâ yaʔa ní li tunmu kayoro kloʔo tanʔa mà kpele wa Bajegɔ Nyɛʔɛlɛ la Sye wì bɛfu fɔlɔ wi yɛʔɛ ma ge, di à ye nyaʔa tonro ta waʔa ni? 15Di ŋaŋa ni, yé naʔa nyu mà yo makpɔʔɔmo fɛɛ kayoro tiì nyɛ tanra, ma yo hɛɛn bee pé na kapere hanri. Pe kyɛʔɛ yrɛbɛ pí na nyɛʔɛ, mà yo nɛ: Ee, pé na Nyɛʔɛlɛ pin na li wele, di yraʔa kà na je pe ta.› »
16Ki nyiŋi na, bee pe dáa fyaʔa Bajegɔ Nyɛʔɛlɛ na le, à pe kpoʔolo mà yo teme na. Bajegɔ Nyɛʔɛlɛ à li nagruʔu can mà loʔo pé ma. Pe dá ladomo sɛbɛ nyoŋo wa li yɛʔɛ ma ge, bee kala na pe dáa fyaʔa lí na ní bee ní pé na li yele kpɔʔɔ le.
17Bajegɔ Nyɛʔɛlɛ la Sye wì bɛfu fɔlɔ li daʔá yo nɛ mà yo: «Mí ma wlɛʔɛ ga kon maʔa yaʔa, pé bi ba bo na woolo ki wlɛʔɛ na ge. Mí bi ba nyugara ta pé na nɛ pa to wi hin nyugara ta wi najɛtaʔa na pomo ma na ŋa wí na tunŋu ko wí kan ge. 18Ga kí ma hɛnsinbee ní hɛnpee kon be pe na, ní bee ní pé na tunŋu ko Nyɛʔɛlɛ kan ní bee ní poò na tunŋu ko Nyɛʔɛlɛ kan le, yé bi ba nì bì ki konlo nya le nɛ.» 19Bajegɔ Nyɛʔɛlɛ la Sye wì bɛfu fɔlɔ à li yo: «Wlɛʔɛ kà na pan wa, kí nyɛ tifugu ceŋge nɛ pa furu kpangbanŋa kwɔʔɔ nyɛ ge. Makpɔʔɔmo fɛɛ ní kapere hanrifɛɛ ní pè bɛfu pé bi ba bo nɛ pa fafawaʔaba nyɛ be. Ki wlɛʔɛ na, pé bi ba hogo bì gɔ. Pe niri nì, ní pe kaclara nì kɛ ìn bi ba goro. 20Di yèé bee yé na fyaʔa na yele na le, sinmi mi yaa kí bi ba nyini ye kan paʔama pa mi bo wa li kpangbanma kmara ni de, yé bi ba syɔ bì nyini da yeri bì da hɔlɔ nɛ pa nupyɔ nyɛ ŋa wí ma nyini wa nugba ni ge. 21Yé bi baa hɛnpee tanri yè ceʔe ní, mɛjɛn pé bi ba bo yè ceʔe noʔo na nɛ pa taplɔʔɔ nyɛ ge, na wlɛʔɛ ga na mí ma kon ge. Bajegɔ Nyɛʔɛlɛ la Sye wì bɛfu fɔlɔ wɔ̀ɔ yo ban.
Eli wi hrubanma kayoʔo
22Yee lama tun ga nì na tungɔɔ Mowisi wi dáa ye krɛʔɛ ge, kaʔa gee mi da gón mâ yaʔa ní furu kayoro ní da mi dá gan wí ma wa Orɛbe angogo na, ti po Israyɛli kluʔu woo pè bɛfu woro ge.
23Ye wèlé, mí bi Nyɛʔɛlɛ leyoo Eli tun ye ma kpɛn sanni Bajegɔ Nyɛʔɛlɛ li wlɛgbɔʔɔ kí bi no ge. Kí nyɛ fyakpɔrɔ wlɛʔɛ gi.#3:23 ma wèle wa Mat 11:14; 17:10-13; Mar 9:11-13; Luk 1:17; Jan 1:21 ni wè. 24Wí bi tee ní pe pii le pè ní pe po yoflinmi ni bì pii hanri pe yo pe flin pe tee ní be, jango ho gá ba ki klo la cɔʔɔ le danŋama ní.»
Currently Selected:
MALASYI 3: NLK10
Highlight
Share
Copy
Want to have your highlights saved across all your devices? Sign up or sign in
Bible Society of Côte d'Ivoire