Luka 8
8
Akhema narë Vëhongete inaa Yesu
1Genyahafo naarë asaa akëra, Yesu agaenda umuji na uvijiji, ugutanantya na uvatoera sayu në njija a utëmi wa Muungu. Na avoo ikumi na vavëë arë vëitambërëmwedu na mweeso. 2Na noo akhema vëgëtunga unë Yesu naa waaforiye inyonyinyonyi në ëvëë nanë marue. Akhema vasaa në Mariamu, nëuguëtanwa Magdalena, ufuma unë Yesu wamufunyiye inyonyinyonyi i mufungatë, 3nanë Yoana mukhema Kusa, mughondanëyi#8:3 Mughondanëyi: Rina rayo wakili. wamwa Herode na Susana nanë vangëja vingë, naarë vëumutamëa gwa maari yao.
Wikhori Wamufandëi
(Mat 13:1-9; Mrk 4:1-9)
4Naarë iburi rikuu raja itambërëmwedu na antu ufuma mu muji vëgaja kunë mweeso, mweeso agarighëëtya gwa wikhori. 5“Mufandëi agaenda ufandëa mbeyu yakwe; na mwino naa ugufandëa ingëja igagwëëra unjëa, na igafanangëwa, na nyonyi ya unto igailëa. 6Na ingëja igangwëëra gitalaghwe, naarë yakiinda, iganyara gusoko gutie utotu. 7Na ingëja igagwëëra umaghuya; na maghuya igakuuinkani na ëgayitunyëëya njeeso. 8Na ingëja igagwëëra gërongo në rija, na ikakiinda, na igafa khari ighana.” Mwino mweeso naarë warighëëtya uyii, agahumbua ruri, “Wasuu në ukweti matwë autegheeya, ategheeye.”
Soko Ausëya gwa Nyikhori
(Mat 13:10-17; Mrk 4:1-9)
9Asëywi vakwe vëgamuwëëya, rianayo ntuni wikhori urui, 10mweeso agasucha, “Nyenye mwafiwe umanya ëmpihë ya utëmi wa Muungu; ëgweeso vangëja vëunyinkhori, uvii uraava vëurava veeso vëtiudaha goona, na vëutegheeya veeso vatiumanya.”
Yesu Ugurakanua Wikhori wa Mufandëi
(Mat 13:18-23; Mrk 4:13-20)
11Itungwee riana ra winkhori tëërë: “Mbeyu në ukhani wa Muungu. 12Yasii në yunjëa në vasaa nëvëutegheeya, na amëëte Ibilisi waja uheya ukhani ufuma unkho, yao vataje vahuvëe na utyoeka. 13Na yasii në igitalaghwe në vasaa unë vëutegheeya ukhani, vëusëngëya gwa nkumbu nkuu; ëgweeso vasaa vatikweti mëëri, nëmërëfu veeso vëuhuvëa gwa itungo rëkufei na ikhondo ra maëgheeyo vëugwa unkhoo. 14Na gwa yasii nëyagwëëre mukhatë a maghuya, në vasaa nëvëutegheeya, ëgweeso gwa nyenenda ao na njëa yao vëutunyëywa na ukhasëkëa mari na nkumbu ya uduvi na nkhari yao itiuvëya. 15Na iyio nëiguirongo në rija në avoo, nëvëutegheeya ukhani na ukwatëëralii gwa winyumpi na nkhoo në njija na ufa nkhari gwa ughimëyi.
Gemwëë Negëkunëkëe
(Mrk 4:21-25)
16“Gutie muntu nëwaacha gëmwee nëukukunëkëa na nyungu, nampa gugeika kiuungu ga urëë, ëgweeso ugugëika unto a chengo, gusoko vasaa nëvëuingëa vadahe uona weru. 17Gusoko gutie gëntu nëgëfihie nëgëtigighea, na gutie gëkaku gëmpihë nëgëtiumanywa na ugighea uweru. 18Mukwatëërelii mwino chu mutegheeya gusoko wasuu nëukweti gëntu ujie uongeywa ufewa, na wasuu nëatikweti gëntu nambesa mweeso ugughema ukweti ujie uheeywa.”
Nyinya waMwa Yesu na Aruuna Vakwe
(Mat 12:46-50; Mrk 3:31-35)
19Kangë yiu wakwe na aruuna vakwe vëgaenda kunë mweeso, ëëgweeso vinamufikëa gusoko amwirundo. 20Na agakhanëwa, “Yiu wako na aruuna vako vaimekëe unji, vasëghëëte uguona vee.” 21Ëgweeso mweeso agavakhanëa, “Yiu wane na aruuna vane në vasaa në vëutegheeya ukhani wa Muungu na uutenda.”
Yesu Ugukiya Efefe ra Majë
(Mat 8:23-27; Mrk 4:35-41)
22Itiku rëmwedu Yesu aganatea masua itambëëmwedu na asëywi vakwe, na mweeso agavakhanëa, “Kwëndi gutambuke irambo faka ntumbë agavëë.” Uvii veeso vëgatunguya. Narë vëuenenda vinjë, mweeso agaraa tuo. 23Na giharumbë gëgaja ufuma unto a majë masua igaandya gijua majë, vëkaa vëuholota. 24Na veeso vëgamwendea na umufëtya mweeso vëuhanya, “Müküü, Müküü, gwakuya!” Na mweeso agauka na umekenea nkungu na mafefe a majë gugatuatwë gugariuka riu. 25Mweeso agavakhanëa, “Uhuvëi wanyu wegufei?” Na veeso vëgaoghofa na utaka, vëgikhanëa veeso gwa, “Uyui anyu vii nëuguraghëya nkungu na majë na nyeeso yu mutegheeya mweeso?”
Yesu Wamuforia Muntu wa Gënyonyinyonyi
(Mat 8:28-34; Mrk 5:1-20)
26Yesu na asëywi vakwe vëgafika ung'e a uGerasi nëiravie na uGalilaya. 27Na mweeso naarë wafuma wasima fang'ë, agataana na muntu nëufumëe umujini unë naa wina inyonyinyonyi; gusoko arë ainayaa masaa, gwa matiku maingë na arë atigikhaa ukhaya ëgweeso umbëlëlo. 28Naarë mweeso wamuona Yesu, agakurya mukindo agagwa fang'ë usonge akwe, na urighëëtya gwa ruri në aküü, “Gwina ntuni ginako Yesu, Mwana wa Muungu në Müküü? Ngugunena vee, utankhasye nee.” 29Gusoko mweeso arë waraghiya inyonyinyonyi në ëvë ëmufume unji muntu wasuu. (Gwa matungo maingë arë vëumutungaa mweeso; mweeso arë ugughojwaa, na utungwa na mëkhua na maghava, ëgweeso agatënanga itungo na agadurywa na inyonyinyonyi faka gihaka.) 30Uvii Yesu agamuwëëya mweeso rina rako anyu? Na mweeso agahanya rina rane “Legion” (jesi) gusoko inyonyinyonyi ëngi arë yamuhefee mweeso. 31Na nyeeso ëgamuromba mweeso ataraghëëye yeende gikhombo nëirundu. 32Na idae rikuu ra nguuma#8:32 Nguuma: Nguuma nëigutwaghwa ukhaya. arë rëudëma hafo unkenento a gëtanto; na nyeeso ëgamuromba mweeso avayanjëye ivahefee nguuma. Uvii mweeso agaviyanjëya. 33Uvii inyonyinyonyi ëgafuuma unji umuntu wasuu, na ëgaihefea unguuma, na idae rëgamanka unkenento airambo na rëganyumughëa jubuluu umajë. 34Narë adëmi vaona në adwëëra vëgadua, uenda uvakhanëa antu va umujini na vaumëghunda. 35Antu vëgaenda unji veende uona ntuni nëadwëëra, na vëgafika kunë Yesu, na vëgamuhanga muntu wasuu nëwafumiwe na inyonyinyonyi, wikhee umëghuu amwa Yesu, uyaëte masaa, na ukweti ihaa rakwe ija, na vëgaoghofa. 36Na vasaa naarë vaune vëgavadonea veeso mwino waforiywe uyuu naarë wina inyonyinyonyi. 37Uvii antu voong'e naarë vëfifë na itumbe ra Gerasi vëgamuromba Yesu aheghe kunë veeso, gusoko arë vakwatwaa na wova ukuu. Uvii aganatëa masua na agasuka. 38Muntu wasuu nëaja wafunyiywa inyonyinyonyi agamuromba veende inakwe, ëgweeso Yesu agamuhitëya agamukhanëa, 39“Suka ukhako na wende utanantya oong'e në Muungu wagutendee vee.” Na mweeso agaenda kunë winjë, ugutanantya u muji woong'e asaa në Yesu wadahie umutendea mweeso.
Muncha waMwa Yairo na Mukhema Umwe Vaforiwa
(Mat 9:18-26; Mrk 5:21-43)
40Na Yesu naarë wasuka mwirundo wasuu ugamughenyifa mweeso, gusoko veeso voong'e arë vamwindëe mweeso. 41Na agaja muntu uguëtwaa Yairo, arë müküü wa sinagogi na agagwa umëghuu amwa Yesu na agamuromba ende unyumba akwe, 42gusoko arë ukweti muncha wakwe umwedu wa mëakha ikumi na ëvëë na arë wëfifë ukuya. Naarë uguenda winjë, antu vëgamutunyiya mweeso. 43Na mukhema umwedu naarë wakëëngie mëakha ikumi na ëvëë na ainakiekwa na muntu mpa umwedu. 44Mukhema wasuu agamuhonga Yesu unyuma agatenya ikundo ra isaa rakwe na gënyahafo murihë wa saghami akwe ugahia. 45Na Yesu agahanya, “Anyu në wantenya nee?” Naarë voong'e vakhana uyii, Fetero agahanya, “Müküü, iburi ra antu rëgufëmëye vee na ugutunyëya vee!” 46Ëgweeso Yesu agahanya “Urëfo në watenya nee gusoko naona nguu yampumaa nee.” 47Na mukhema wasuu naarë waona chu mweeso atiudaha gifiha, agaja ugukhakhata, na agagwa fang'ë usonge amwa Yesu. Agarigheetya usonge antu voong'e sokokë aumutenya Yesu na, mwino mweeso waforiywe gënyahafo. 48Na Yesu agamukhanëa, “Muncha, uhuvëi wako waguforya, ende na majëghana.”
49Naarë këë Yesu urighëëtëye agaja muntu ufuma ukhaya a mutemi agaja na uhanya, “Muncha wako wakuya. Utamukhasye Musëyi ino asëë.” 50Ëgweeso Yesu naarë wategheeya uyii agamukhanëa mweeso; “Utaje wuoghafe uhuvëe gutufu na mweeso ugufoa.” 51Naarë mweeso wafika ukhaya, ainamuyanjëya muntu mpa umwedu uingëa mukhatë a nyumba itambërëmwedu inao, ëgweeso Fetero, na Yohana, na Yakobo, na tata na nyinya wa mwana. 52Na voong'e arë vëurëa na uhongeya soko akwe, ëgweeso mweeso agavakhanëa, “Mutarëe, gusoko ainakuya ëgweeso uree.” 53Na veeso vëgamuheka gusoko arë vamanyie wakuya. 54Ëgweeso Yesu agamukwata mukhono agamwëtana, agamwëëra, “Mung'ënya uka.” 55Na nkhoo akwe igamusukia na agauka genyahafo na mweeso agavaëëra vamufe malëwa alëe. 56Na afafi vakwe vëgataka, ëgweeso agavaghiiya vatamukhanëe mpa muntu umwedu asaa nëadwëëra.
Currently Selected:
Luka 8: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.