Luka 22
22
Mufango wa Umuragha Yesu
(Mat 26:1-5; Mrk 14:1-2; Yoh 11:45-53)
1Ikhondo arë rahumbea, ra sigunkuu amëkate nëëtikhandughie changa#22:1 Mëkaatë nëëtikhondughëe changa: Mëkaate ëyëë naa ëgulëwa utiku na anyaudëma nënaa vëuhamahama. nëëtwanwa Pasaka. 2Na akumbeki në aküü na asëyi vaseria, arë vëufenja njëa aumuragha, gusoko veeso vëgaoghofa antu.
Yuda Waja Umutonea Yesu
(Mat 26:14-16; Mrk 14:10-11)
3Hafo Setani agahefea kunë Yuda nëuguëtanwa Isikariote, në arë umwedu wa atumami ikumi na vavëë. 4Mweeso agaenda usanya na akumbeki në aküü na gwa aküü mwino udahëte umutonea kunë veeso. 5Na vëgayanja, ufatana vamufe mweeso hela. 6Uvii mweeso agayanja, na ufenja chanya gaumutonea kunë veeso fana gutie antu.
Ughondanëyi wa Sigunkuu a Pasaka
(Mat 26:17-25; Mrk 14:12-21; Yoh 13:21-30)
7Rëgafika itiku ra Mëkaate Nëëtikhandughie changa, në mwankhoo wa Pasaka ugukikitwa atendeke ikumbëko. 8Uvii Yesu agavatuma Fetero vina Yohana, agavaëra “Endi na mwende ughondanëya Pasaka soko itu gudahe uja ulëa.” 9Veeso vëgamukhanëa, “Gufei në ugufenja sese gughondanëye?” 10Mweeso agavakhanëa, “Ravi, nëmwaingëa umuji nyenye mwinjë utaana na mughosya nëëwitwëkëte siiva a majë. Muhongi muhefee unyumba asëë në wahefea. 11Na mumukhanëe mughonjo wa nyumba, ‘Musëyi uguguwëya veve Rëgufei edëëmu ra aghenyi fana nene ngulëa Pasaka itambëëmwedu na asëywi vane?’ 12Na mweeso ugumwaghëa mwaango üküü unto ughorafa udoniwe ghondanëyi hafo.” 13Na veeso vëgaenda na uhanga mwino mweeso arë waakhanëe, na vëgaghondanëya Pasaka.
Ilewa ra Müküü
(Mat 26:14-16; Mrk 14:1-2; 1Ko 11:23-25)
14Na ikhondo naarë rafika agikhaa umesa, itambëëmwedu na atumami vakwe. 15Na mweeso agavakhanëa, “Nahunukwa ino ulia Pasaka ëyëë itambëëmwedu ginanyu nëkëë ntinakhaswa. 16Gusoko nene ngumukhanëa nyenye nti ulia kangë faka nëhikwë utemi wa Muungu watema.” 17Na mweeso agahoa gakuu, na naarë wafunya asi agahanya, “Hori akai, na mwaghane nyenye aghonjo. 18Gusoko nene ngumukhanëa nyenye ufuma itungwe ntiunywa nkhari a musabibu faka kunë utemi wa Muungu ujie.” 19Na mweeso agahoa mukate, na naarë wafunya asi agauaghanëa agavafa, agahanya “Urui mwëërë wane nëwafunyiywe soko anyu. Tendi vii gwa unkumbukwa nene.” 20Na vii gakuu nëwalëa, agahanya, “Gakuu akai gairaghano në rëfya ra saghami ane nëahunukie gusoko anyu. 21Ëgweeso ravi mukhono wakwe wasuu nëuguntonea nene wë itambëëmwedu nanee umesa. 22Gusoko Mwana wa muntu wooka kunë winjë mwino yaramuwe, ëgweeso hëhë akwe umuntu wasuu nëungumuhongea!” 23Na vëgaandya ugiwëya veeso gwa veeso, anyu mukhatë ao nëungutenda ntendo asëë.
Wikungumi wa Üküü
24Ugadwëëra wënyomi mukhatë ao, anyu nëuguvarëywa müküü ukëa auya. 25Na mweeso agavakhanëa, “Atëmi va Anyagëlungu vëuvibala antu vao, gwa nguu na atawala vasaa vëutanwa anyambuya va antu. 26Ëgweeso kunë nyenye tiuyi, në müküü mukhate anyu unoneye atendeke mwino munyui, na munya utongera atendeke mwino munya utumëka. 27Gusoko në müküü nanguu në anyu, unë wasuu në wikhee umesa, nampa wasuu nëugutumeka? Tiuyuo në wikhee umesana? Ëgweeso nene në mukhatë anyu nëmwë munya utumëka. 28Nyenye mwe avoo në mwasaghie ginanyu umaighëëyo ane. 29Nanee ngumwëkëya nyenye utemi mwino Tata wane nëwanjikëye nene, utemi, 30nëmudahëte ulia na unywa umesa ane muutëmi, wane na ugikhaa gitumbë ra utemi na uvaramua mbeyu ikumi na ëvëë ya Isiraeli.
Yesu Uguhanya Fetero Ujie Umukhana
(Mat 26:31-35; Mrk 14:27-31; Yoh 13:36-38)
31“Simioni, Simioni, ona Setani ugumufenja nyenye na uvii mweeso adahe umufenenta nyenye mwino ngano, 32ëgweeso nene nagurombea vee gusoko uhuvëi wako utaje uriime, na vee në wafentuka vakhamie aruuna vako nkhoo.” 33Na Fetero agamukhanëa, “Müküü nene nighondaneye gwenda ginako ujera nambesa ukuya.” 34Yesu agamusucha, “Nene ngugukhanëa vee, Petro, itiku ërei rarëo njololo ëtiurëa në vee ukëë winankhana mëhinjo ëtatu mwino utinjinjë nene.”
Ikhondo ra Holota
35Yesu agavawëya asëywi vakwe, “Naarë nene namutuma nyenye mutikweti mbuguuri na mpënda nanë maatu, mugakefewa na ntuni? Veeso vëgamusucha Gwënakefewa. 36Mweeso agavakhanëa, Ëgweeso itungwee nëukweti mbuguuri amehoe, na mpënda viuyi viuyi. Na wasuu nëatikweti itemeo na aghurye nkhanjo aghue. 37Gusoko nene ngumukhanëa nyenye mwino chu maandeko ayai anoneye afichiywe kunë nene, na gusoko wavarëywe itambëëmwedu na anya mahutye, gusoko asaa nëandëkiwe gusoko ane akhondekeka.” 38Na veeso vëgahanya, “Rava, Müküü, hafai irefo mpanga ivëë.” Na agavakhanëa, “Yakhondaa.”#22:38 Yakhondaa: Yesu agavakhanea aseywi vakwe, “Yakhondaa” nënaa waona vadëa umonya na vëtiudaha umanya.
Yesu Uguromba Ugitanto ga Miseituni
39Na mweeso agahegha umujini agaenda Ugitanto ga Miseituni mwino arë ntende akwe ërë na asëywi vakwe vëgamusambëya. 40Naarë mweeso wafika ng'andëngë agavakhanëa, “Rombi mutaje uingëa umaighëëyo.” 41Na agavareka agaenda ga munyanya wa ughuma igwe, agatungama na agaromba, 42“Tata, nëmbesa mafënji ako ung'eye nee gakuu akai gamakhasëko. Ëgweeso tiese mafenji ane, ëgweeso mafenji ako, atendeke.” 43Na malaika ufuma girunde agamudwëëra agamukkhamia nkho. 44Na arë mweeso ugumakhasëko makuu agaromba tëkëtëkë, na sufi yakwe nyingë mwino saghami ëgajulula fang'e. 45Naarë wauka kunë ugurombea agaenda uvahanga asëywi vakwe varaa na uvai. 46Na mweeso agavakhanëa, “Asikë nëmwaraa? Uuki na murombe mutaje uingëa umaighëëyo.”
Yesu Wakwatwa
(Mat 26:47-56; Mrk 14:43-50; Yoh 18:3-11)
47Naarë këë urighëëtiye, rëgaja iburi rikuu ra antu na uyuo nëuguëtanwa Yuda, umwedu wa asëywi ikumi na vavëë uvatongeea. Veeso agamuhumbera Yesu agamutomia. 48Ëgweeso Yesu agamukhanëa, “Yuda, ugumutonea Mwana wa Muungu gwa umutomya?” 49Na vasaa naarë inao naarë vaona nëajie udwëëra, vëgahanya, “Müküü, guvakhue na itemeona?” 50Na umwedu wa asëywi vakwe agamukhua mutumami wamwa mukumbeki në müküü agamutema gëtwe ga gëlëlo. 51Ëgweeso Yesu agasucha agahanya “Ërei nërekhonde!” Na mweeso agamutenya gitwe na agamuforya. 52Na vii Yesu agavakhanëa aküü va makuhani na atongeri va hekalu na anyampaa, naarë vaja umukwata, “Mwaja mwino umukwata mwivi,” anju mwaja mwino mafanga na mafinë? 53Matiku oong'e naarë gënanyu uhekalu, mwinadaha ung'umbwëra mukhono nene. Ëgweeso ërëi në ikhondo ranyu, ra udaho wa kiiti.
Fetero Ugumukhana Yesu
(Mat 26:57-58; Mrk 14:53-54, 66-72; Yoh 18:12-18, 25-27)
54Uvii veeso vëgamukwata Yesu na umuhoa umutoa, unyumba amwa kuhani në mukuu. Fetero arë uvahongeta unyuma kuenge, 55Naarë vafemba moto mukhatë aianja na vëgagikha fang'ë itambëëmwedu na Fetero arë wëmukhatë ao. 56Na muncha, narë mutumami, mweeso agamuona wikhee uweru na agamukhamëchëya miho, agahanya, “Muntu uyuino arë inao.” 57Ëgweeso Fetero agakhana uguhanya, “Mukhema, nene ntimumanyie.” 58Naarë ituungo rëkufëi rëkëa muntu ungëja agamuona Fetero agahanya, “Veve wë umwedu wao.” Ëgweeso Fetero agahanya, “Muntu vee, nene ntimweeso.” 59Naarë saa a gëtunga akëa muntu ungëja akhonkhomëka, uguhanya, “Tutë muntu uyi arë inao. Gusoko mweesono Mugalilaya.” 60Ëgweeso Petero agahanya, “Vee Muntu, nene ntimanyie në veve ugurëghëëtya.” Na gënyahafo naarë këwëghëëtiye njololo ëgarëa. 61Na Müküü agagifetukëya na agamurava Petro. Na Fetero agakumbukwa ukhani wa Müküü, naarë wamukhanie, “Nekëë inarea njololo rëo, vee ugunkhana mëhënjo ëtatu.” 62Na agaenda unji na agarëa gwa uvai.
Yesu Ugwinëhëywa na Ukhuwa
(Mat 26:67-68; Mrk 14:65)
63Na antu vasaa naarë vamukwatie Yesu vëumuinëhiya na umukhua. 64Veeso vëgamutunga mpuna na umuwëya, “Raghua! anyu në wagukhua vee?” 65Na veeso vëgamukhanëa nkhani ingëja nyingë ya umutuka.
Yesu Watowa Usonge a Barasa
(Mat 26:59-66; Mrk 14:55-64; Yoh 18:19-24)
66Naarë waacha, rëgagihangwëya ibarasa ra anyampaa ra antu rëgagikhaa itambëëmwedu, kuhani në müküü nanë vaandëki, na veeso vëgamutoa ubarasa ao, na veeso vëgahanya, 67“Nëmbesa wë Kristo, gukhanie see.” Ëgweeso agavakhanëa, “Nëmbesa nëmukhanie nyee, mutiuhuvëa kamwe. 68Nambesa nëmuwëye nyee mutiudaha unsucha. 69Ëgweeso ufuma itungwee Mwamuntu ugutendeka wikhee umukhono wa gëlëlo wa Muungu munya udaho.” 70Na voong'e vëgahanya, “Uguhanye veve wë Mwana wa Muunguna?” Na agavasucha, “Nyenye muhanya, mwino nene në mweeso.” 71Na veeso vëgahanya “Usudanga këë në sese gusëghëëte? Gwategheeya sese aghonjo ufuma umomo wakwe mughonjo.”
Currently Selected:
Luka 22: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.