Luka 20
20
Udaho Wamwa Yesu
(Mat 21:23-27; Mrk 11:27-33)
1Itiku rëmwedu, mweeso naarë ugusëya antu mukhatë a hekalu na utanantya sayu në njija, akumbëki në aküü na asiyë vaseria itambëëmwedu na anyampaa vëgaja vëgamufëmëya, na umukhanëa mweeso, 2Gukhanie see, “Ugutenda mantu, ayai gwa udaho kë? Nampa anyu nëwagufie vee nguu iyii?” 3Mweeso agavasucha, Na nenenoo ngumuwëya nyenye iwëyo: 4Itungwe nkhanëi nene, “Ubadiso wa mwa Yohana ufumie girunde nampa ufumie gwa antu?” 5Na veeso vëgagëwëëya mu muntu na muyakwe, vëuhanya, “Nëmpa guhanye, ufumie girunde, uguhanya, ‘Asikë në mwinamuhuvëa? 6Ëgweeso nëmpa nguhanye, ufumie gwa antu, antu voong'e vëugutua sese na magwe, gusoko vayanjie mwino Yohana munyagëdaghu.’ 7Na vii veeso vëgasucha Gutune kunë ufumëi. 8Na Yesu agavakhanëa, Mbesa neenoo ntiumukhanëa nyenye gwa udahokë ngutenda mantu ayai.”
Wikhori wa Mughunda na Anyaurëma
(Mat 21:33-46; Mrk 12:1-12)
9Na mweeso agaandya uvakhanëa antu wikhori urui, “Muntu umwedu agafandëa mughunda wa mësabibu, akakodesya anya urëma, na agaenda ung'ë ingëja agikhaa agarifya. 10Naarë ikhondo raghea, agatuma atumami gwa anya urëma vamufe mweeso nkhari ya ntënange ya misabibu. Ëgweeso anya urëma vëgamukhua mweeso, na vëgamujuncha agasuka mëkhono mëtufu. 11Na mweeso agatuma mutumami ungëja; uyuinoo vëgamukhua na umutendea mantu amënyaa ino, na vëgamujuncha agasuka mëkhono mëtufu. 12Na mweeso agatuma wagatatu, uyuinoo vëgamutendea nkhomee vëgamujughuta unji a mughunda. 13Mughonjo wa mughunda agahanya, Ngutenda urë? Ngutuma mwanane në muyanjwë fangëja veeso vadahëte umwuoghoofa mweeso. 14Ëgweeso anya urëma naarë vamwona mweeso, vëgahanya veeso aghonjo, ‘Uyui mweeso musai, në gumuuraghe usai utendeke witu. 15Na veeso vëgamuuragha vëgamujughuta gunji a mughunda wa mësabibu.’ Uguvatenda urë mughonjo wa mughunda wa mësabibu? 16‘Mweeso, ujie na uvauragha anya urëma vasaa, na uvafa vangëja.’ Naarë vategheeya vii vëgahanya: ‘Muungu nëamëe intu ërëë rëtadwëëre.’”
17Ëgweeso agavakhamëchiya miho na agavakhanëa, “Rianayo ntuni ukhani urui në waandëkiwe:
‘Igwe nëvarihitie ajengi,
itunguwee raiye igwe në rikuu ra musingi?
18Mumuntu në wagweera unto a igwe rasëë ugutënëkanga mafëgha mafëgha.
Ëgweeso nanëramugweera unto
muntu rëumusyakakha.’”
Ihanyo ra Urëëfa Kooti
(Mat 22:15-22; Mrk 12:13-17)
19Asiyë vaseria na makuhani në aküü vëgafenja umukwata mweeso ikhondo ërëro ërëro, ëgweeso vëgaoghofa antu, gusoko vëgaimanya wikhori wasuu arë uvaghokee veeso. 20Na vii vëgamuduma na utuma anya ulia nyonyi, në vëgagitenda antu vaja gusoko vamukwate gwa nkhani yakwe, na umusitaka kunë gavana. 21Veeso vëgamuwëëya, “Musëyi, gumanyie mwino veve ugurighëëtya tutë na ugusëya tutë, na utiuhwania, ëgweeso tutë ugusëya njëa a Muungu. 22Urë nëguuja useria sese ufunya kooti kunë Kaisari nampa tiguuja?” 23Ëgweeso mweeso agamanya masëgho ao, na agavakhanëa veeso, 24“Ndaghii nene hela. Ikwete ikeeru ra manyu na maandëko amanyu?” Veeso vëgasucha, “Amwa Kaisari.” Mweeso agavakhanëa, 25“Mufi Kaisari në akwe Kaisari nanë a Muungu muufi Muungu.” 26Na veeso vinadaha umukwatya gwa nkhani usonge antu nkhani nëwairëghëëtiye; ëgweeso vëutaka gwa masucho akwe, na veeso vëgakia tweë.
Ihanyo ra Ufëtyo
27Hafo Asadukayo, vëkëtunga vëgënda kunë mweeso vasaa nëvëuhanya gutie ufëtyo, wa akuyi na vëgamuwëya iwëyo, vëuhanya. 28“Musëyi, Musa waguandëkëye sese mwino muntu nëwakwieywa na muuna akwe, në wina mukhema, ëgweeso atikweti mwana, mweeso inoneye amusae muhimbë wasuu na amufafëye vana. 29Itungwee arë varëfo ana amuntu vëmufungatë, wamwandyo agaroghoa mukhema, na agakuya akëë atikweti mwana, 30na wagavëë 31na wagatatu vëgamusaa mweeso, na vii voong'e mufungatë vëgakuya vënamurekea vana. 32Mpeo ayoo mukhema wasuuno agakuya. 33Uvii itiku ra ufëtyo ujie utendeka mukhema wamanyu? Gusoko voong'e mufungatë vamuroghoe.”
34Na Yesu agavakhanëa, “Antu vamurëmi urui vëuroghoa na uroghowa. 35Ëgweeso vasaa nëvavarëywe vanoneye uhanga urëmi uruo na ufëtyo ufuma gwa akuyi vatiuroghoa na uroghowa, gusoko vatiukuya kangë, 36gusoko veeso vikhwete mwino va malaika na vana va Muungu, gusoko vafëtiye ufuma gwa akuyi. 37Ëgweeso viuyi mwino akuyi vëufëtiwa, Musano waraghiwe muikeru ra itunku, hafo naarë wamwëtana Müküü Muungu wamwa Ibrahimu, na Muungu wamwa Isaki, na Muungu wamwa Yakobo. 38Mweeso ti Muungu wa antu nëvakure ëgweeso Muungu wa antu në afanga.” 39Na asëyi vëgëtunga vaseria vëgamusucha, “Musëyi, warëghiitya ija.” 40Veeso Afarisayo vinasoya umuwëëya iwëyo ringëja kangë.
Iwëyo Kunë Masihi
(Mat 22:42-46; Mrk 12:35-37)
41Ëgweeso mweeso agavawëëya, “Antu vëuhanya urë mwino Kiristo mwana wamwa Daudi? 42Gusoko Daudi mughonjo uguhanya mugëtabu ga Saburi:
‘Müküü wamukhanëe Müküü wane,
Ikhaa umukhono wane wa gëlëlo,
43faka nene mughonjo nëvaëke arughu vako vatendeke itumbë ra mëghuu ako.’ 44Daudi ugumwëtana mweeso Müküü, na vii ugutendeka urë mwana wakwe?” 45Na antu voong'e naarë vamutegheeye mweeso agavakhanëa, asëywi vakwe, 46“Ighoji na aandëki vaseria, nëvëufenja uyaa nkhanjo, na ufenja uramuchwa usokoni na ugikhaa umatumbë në maja umasunagogi na ugikhaa kunë varë ahesimiwa aghenyi në varaikiwe ungoi. 47Vëulia nyumba ya ahimbë na vëgëtenda a aja gwa uromba marombi në marefu. Veeso vajie uhanga iramui në ikuu.”
Currently Selected:
Luka 20: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.