Luka 2
2
Yesu Wafafwa
(Mat 1:8-25)
1Matiku asaa iraghëëyo rëgafuma kunë Kaisari Agusto mwino antu voong'e va mu urëmi vevariwe. 2Ërëë na ivariwa ra mwandyo ra antu, itungo nenaa Kirineo müküü wa ng'ë a uSiria. 3Na voong'e vëgaenda uvariwa, mu muntu u muji wa ukhao. 4Na Yosefu noo agaenda ufuma uGalilaya, ufuma u muji wa uNasareti, faka Uyahudi, muji wamwa Daudi unë uguëtanwa Bethelehemu, 5gusoko mweeso na wa unyumba na mwango wamwa Daudi. Mweeso agatenda uvii gusoko adahe uvariwa itambëëmwe na Mariamu, nënaa umuturëye ikhomo na nënaa mwito. 6Narë veeso vëkuuko itungo rakwe ragitungua rëgafika. 7Na agagitungua mwanakwe wa mwandyo wa gëghosya na agamukumba masaa a gëng'inya. Na agamureecha usori nënaa ng'ombe yiulëlëa gusoko na gutie iyoma unyumba a aghenyi.
Adëmë nanë vaa Malaika
8Na ung'ë asëë arë vërëfo ademi nënaa vëoghoja idae ra mëtugho awe utiku u mbugha. 9Na malaika wa Müküü agavadwëëra veeso, na weru wa Müküü ugavamwëkëa ng'andë yoong'e, na veeso vëgagijuwa na wova. 10Na malaika agavakhanëa, “Mutaoghofee, gusoko rarava, nene namwetea nyenye Sayu Njija a uyanjo üküü unë ijie gwa antu voong'e. 11Gusoko anyu wafafwa itiku ërëë u muji wamwa Daudi Mutyoi, unë Kiristo Müküü. 12Na gëmanyëko u chëkë gusoko anyu: nyenye mwinje umuhanga mwana mudëu ukumbiwe masaa a gëng'ënya na urechiywe u sori kunë ng'ombe yiulëlëa.” 13Na gënyahafo iburi rikuu ra vamalaika va gërunde rëgakhuvëa na malaika wasuu vëumukurya Muungu na vëuhanya,
14“Ukuu kunë Muungu unto girunde,
na mung'ë majëghana mukhatë
a antu në nëvëumuyanjisya mweeso.”
15Itungo nënaa vamalaika vasaa vahegha na usuka girunde, adëmi vëgagikhanëa veeso gwa, “Kwendi faka uBetehemu na goone intu rasëë në radwëëra unë Müküü wadaha uguraghëa sese.” 16Na veeso vëgaenda vihukie, vëgamuhanga Maria ina Yosefu nanë mwana munyehe uree musori. 17Na nënaa adëmi vamwona mwana wasuu, veeso vëgavakhanëa Maria ina Yosefu rasëë në malaika wavakhanëe nëimughokee mwana. 18Na voong'e narë vategheeya asaa vëgataka mwino naa adëmi vaakhanëe veeso. 19Ëgweeso Maria agayavëka mantu oong'e munkhoo akwe na uyagheema ino. 20Na adëmi vëgasuka, kunu vëumukurya na umukumajua Muungu gusoko a oong'e në veeso vadahie uyategheeya nane uyaona, mwino ëte veeso naa vakhanëwe.
Yesu Ugufewa Rina
21Na matiku munana nënaa afika, nënaa watowa ihungu, agatanwa Yesu. Rina rasëë narë warëfewe na malaika narë akëë ainauchwa urito.
Yesu Watowa uHekalu
22Na itungo nënaa rafika gusoko a gëerya kunë gwa uhonga seria amwa Musa, Yosefu ina Maria vëgamutoa mwana uYerusalemu na vëgamuvëka usonge a Müküü; 23mwino ëandëkiwe mu seria a Müküü “Mu mwana wa mwandyo wa gëghosya ugutanwa mweru kunë Müküü.” 24Na veeso vëgafunya asi na dahwa yawe gwa uhonga mwino naa ëhanyiywe mung'ëë a seria a Müküü, “ya titi ya nkuwë vavëë, mba nkunda ivëë.”
Wëmbo wamwa Simioni
25Na urëfo muntu uYerusalemu, unë naa uguëtanwa Simioni, na muntu uyuu na munyatutë na naa umwoghofete na umukurya Muungu. Mweeso naa wëndie ufefeheyi wa Isiraeli, na Mwahu Mweru naa wë itambëëmwe na mweeso. 26Na Mwahu Mweru na wamukunukwëre mwino chu atëgoona ikuya në akëë ainamwona Kiristo wa Müküü. 27Na agatongeerwa na Mwahu Mweru agaja mukhatë a hekalu. Na narë afafi vakwe vamweta mukhatë mwanawe Yesu, utënda gusoko akwe gwa uhonga na ntende a seria. 28Agamukwatëra mweeso u mëkhono akwe na agamukurya Muungu na uhanya,
29Itungwee Müküü udahëte umurekea
mutumami wako ende gwa majëghana,
gwa uhonga ukhani wako.
30Gwa miho ane nawuune utyoi wako
31unë veve waunëng'anëye gwa antu voong'e.
32Na weru wa uvamwëkëa antu në ti Ayahudi,
na gwa üküü kunë antu vako Isiraeli.
33Na tata wakwe nanë nyinya wakwe vëgataka gwa rasëë narë rahanyiywe kunë mweeso. 34Na Simioni agavaforya veeso na agahanya kunë Maria nyinya wakwe,
“Rarava, mwana uyuu në wavëkiwe gwa ugwa nanë gëmëka gwa antu vingë va Isiraeli,
na gwa ndolyo unë ëguhitwa na antu.
35(Na itemeo rëuhoma mukhate a nkhoo ako noo)
na masëgho ufuma nkhoo nyingë yinjë ukunukwërwa.”
36Arë urëfo munyagëdaghu wa gëkhema, Ana, muncha wamwa Fanueli, wa undughu amwa Aseri, mweeso noo naa mukhekuu. Wikhaire itambëëmwe na mughohi wakwe mëakha mufungatë ufuma fana waroghowe nënaa këë inatang'ana na mughosya gëmwëëre. 37Wikhaire gëhimbë faka narë wina mëakha makumi munana na ëne. Mweeso inaheghaa ufuma uhekalu, ugukurya itambëëmwe na ufunga nanë uromba utiku nanë mumwë. 38Na mweeso agaja itungo ërëro na mweeso agamufa Muungu irumbë, na uhanya oong'e nëimughokee Yesu Kiristo kunë voong'e naavërindëe gusoko ukhomwoi wa Yerusalemu. 39Ikhondo Yosefu na Maria narë vayatenda oong'e në araghëëywe na seria a Müküü, vëgasuka ukhao u muji wa uNasareti a uGalilaya. 40Na Mwana agakua agahanga nguu, wijue mahaa, na mboto ya Muungu arë yi itambëëmwedu na mweeso.
Mwana Yesu Uguhekalu
41Uvii afafi vakwe arë vëendaa uYerusalemu mu mwakha itiku në iküü a Fasaka. 42Naarë waficha mëakha ikumi na ëvëë vëgaenda mwino arë ntende ao. 43Nënaarë sigunkuu akëa vëgasuka. Mwana Yesu agasagha unyuma uYerusalemu. 44Afafi vakwe arë vatimanyie rasëë, vëgaghema urë wë itambëëmwedu na iburi ra anyamuhënjo. Veeso vëgaenenda mumwë, woong'e na vëgaandya umufenja gwa anyandughu vao na gwa anyambuya vao. 45Nënaa arë vaamuurya, vëgasuka uYerusalemu, vëumufenja mweeso. 46Na arë akëa matiku atatu vëgamuhanga mweeso mukhaatë a hekalu, wëkhee mukhaatëa asëyi, uvategheye na uvawëëya mawëëyo. 47Voong'e narë vategheeya nkhani yakwe vëgataka umanyi wakwe na masucho akwe. 48Nanë arë vamuona mweeso vëgataka na nyinya agamwëëra, “Mwanane asikë nëwagutenda see vii? Rarava tata wako, nanee aja gugufenja gwa uvai.” 49Na mweeso agavakhanëa, “Asikë nëaja muumpenja nene? nyenye mutimanyie mwino në inoneye esee ngunyumba amwa Tata wanena?” 50Na veeso vëënamanyaa muurëghëëtyo wasuu në wavakhanëa veeso. 51Na agaenda itambëëmwedu inao faka Nasareti, na agavakurya veeso. Na nyinya agaëka asaa oong'e unkho akwe. 52Na Yesu agafwaghëëra ukua u mahaa na uchëmo, na umuyanjisya Muungu nanë antu.
Currently Selected:
Luka 2: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.