Luka 1
1
1Gusoko antu vaingë vadahie uandëka sayu ya mantu maingë nëatendekie mukhatë itu, 2mwino veeso vadahie udwëëya kunë sese gwa avoo unë ufuma mwandyo naa arë vamasudanga na atumami va ukhani. 3Nene noo negaona vija, nënaa arë nawënkëya mantu oong'e gwa vija nanguu, nëgaramwua ugwandëkëa gwa mufango müküü Teofilo. 4Uvii veve udahe umanya tutë nëëeghokee mantu unë veve wadahie ukhanëwaa.
Ufafo wamwa Yohana Mubadisi Ugutanantiwa
5Ikhondo ramwa Herode, mutëmi wa Uyahudi, arë urëfo mukumbëki rina rakwe Sakaria, wa idae ramwa Abiya. Mukhema wakwe arë uguëtanwa Elisabeti umwe wa ancha va ugënyamwango gamwa Aroni. 6Na voong'e vavëë arë anya tutë usonge a Muungu, na naa vakwatëëre maraghëëyo oong'e a Müküü na naa vëtina ihondo. 7Ëgweeso veeso arë vatikweti mwana, gusoko Elisabeti arë mughumba, na voong'e vavëë arë vakhombifie ino. 8Nënaa mweeso ugituma mwino mukumbëki usonge a Muungu, na idae rakwe ra utumami rëgafika. 9Gwa uhonga na ntende a akumbëki, mweeso agahwaniwa gwa ukhwërwa kura uingëa u hekalu ra Müküü na utunchëya musalaka. 10Na iburi rikuu ra antu arë vihangwëëye unjë vëuromba, ikhondo rasëë#1:10 Ikhondo rasëë: Naa gwina ifundo nërëvëkiwe ra utunchëya musalaka. ra utunkëya musalaka. 11Na hafo malaika wa Müküü agamudwëëra mweeso agaëmëka gu uvaru wa gëlëlo#1:11 Uvaru wagëlëlo: Ryana rayo në udaho wa Muungu. wa masabahu a utunkëya musalaka. 12Sakaria narë wamwona mweeso agataka na agaoghofa. 13Ë gweeso malaika agamukhanëa, “Utaoghofe, Sakaria, gusoko Muungu wateghëëye marombi ako. Na mukhema wako ugugufafëya veve mwana wa gëghosya, na rina rakwe ugumwëtana Yohana.
14‘Na veve uguyanja na ubankaara, na antu
vaingë vëgiririsya gusoko a ufafwa kunë mweeso.
15Ugutendeka müküü usonge a Müküü,
na atëunywa divai na mbesa gëntu në gëlulu#1:15 Gëntu në gëlulu: Iburi ra anazarayo naa vëtiunywaa gëntu në gëlulu.
Na ugijuywa Mwahu Mweru
mbesa ufuma unda amwa nyinya.
16Na mweeso uguvasucha antu vainge
vana va Isiraeli kunë Müküü Muungu wawe.
17Na mweeso winjë usonge a Müküü mung'ë
a nkhoo na gwa nguu yamwa Elia.
Uguvakhuvëya va tata nanë vana vao itambëëmwe kangë.
Na uguvatenda avoo në vatikweti
utegheeyi vëhange ihaa ra tutë.
Na uvaghondanëya antu gusoko a Müküü.’”
18Na Sakaria agamuwëëya malaika agahanya, “Nene ngumanya wurë intu ërëë? Gusoko nene në munyampaa, mukhema wane noo mukheikuu.” 19Malaika agamusucha, “Nene në Gabrieli, unë ngwëmëka usonge a Muungu#1:19 Nene në Gabrieli, unë ngwëmëka usonge a Muungu: Ngëmëka giyoma ra Muungu. Na Muungu wantumie nene urighëëtya na veve, na uguretea sayu ëyëë në njija. 20Na rarava, veve ugutendeka wë gëmumu na utëudaha urighëëtya faka kunë mantu ayaa ëjie udwëëra. Gusoko veve winahuvëa nkhani yane, unë ijie ukhondekeka gwa itungo rayo.” 21Na antu narë vëmurindëe Sakaria, veeso vëgataka gusoko a utinya mung'ë a hekalu. 22Na itungo narë wafuma unji, mweeso naa atiudaha urighëëtya na veeso, na veeso vëgamanya mwino waonaa gëntu mung'ë a hekalu#1:22 Gëntu mung'ë a hekalu: Naa agaona uKunukuo wa Muungu. Na mweeso agarighëëtya inao gwa ndolyo gusoko naa waja gëmumu. 23Nënaa itungo rakwe ra utumami rahira, mweeso agasuka ukhakwe. 24Nënaa matiku asaa akëa, Elisabeti mukhema akwe agaucha urito. Agagifiha unyumba mëërë etano, uguhanya, 25“Uvii Müküü wantendee nene mung'ëë a matiku itungo në mweeso wendie undarava nene, na ung'ëgheya mënyaa usonge antu.”
Ifafwa ramwa Yesu Ratanantywa
26Mweri wa mutandatu malaika Gabrieli agatumwa na Muungu ende u muji nëuguëtanwa Nasareti në uGalilaya, 27kunë muncha nënaa uturëywe ikhomwa#1:27Muncha nënaa uturëywe ikhomwa: Muncha nëwakengerwe na mughosya gwa mufango wa uroghowa matiku a usonge. na muntu rina rakwe Yosefu, wa ugënyamwango gamwa Daudi. Na rina ra muncha wasuu naa Maria. 28Na malaika agaja kunë mweeso agamwëëra, “Veve, unë Muungu wa gufaa mboto, Müküü wë itambëëmwe na vee.” 29Ëgweeso Maria narë wategheeya nkhani ëyëë ihaa rakwe rëgahangënkhana. Na agaghema nkhani iyii ryana rayo në ntuni? 30Na malaika agamukhanëa, “Utaoghofe, Maria gusoko Muungu wagufaa mboto#1:30 Wagufaa mboto: Intu në ija në antu vangëja vinafewa. 31Na kengea, veve uguucha wito mung'ëë a nda ako na ugufafa mwana wa geghosya na ugumwëtana rina rakwe Yesu. 32Mweeso ugutendeka mukuu, na ugwëtanwa Mwana amwa uyoo wë gunto a oong'e. Na Müküü Muungu ugumufa mweeso itumbë ra utëmi ramwa tata wakwe Daudi. 33Na mweeso ujie utema u gënyamwango gamwa Yakobo khae na khae. Na utemi wakwe ugutendeka utikweti mpeo.” 34Na Maria agamukhanëa malaika, “Ërëë rëutendeka urë, gusoko nene ntiroghowe?” 35Na malaika agamusucha mweeso agahanya,
“Mwahu Mweru ugugusimëa gunto ako,
na udaho wa Muungu në wë gunto a
oong'e ugugukunëkëa veve.
Uvii mwana në ugufafwa ujie uëtaanwa mweru,
Mwana wa Muungu.
36Na rarava, munyandughu wako Elisabeti mung'ë a ukheikuu wakwe wadahie guucha urito wa mwana wa gëghosya. Na uruu në mweri wa mutandatu kunë mweeso unë naa antu vëumwëtaana mughumba. 37Gusoko gutie nërëtiudahëka kunë Muungu.” 38Na Maria agahanya, “Rarava, nene në mutumwa wa Müküü; nërëtendeke kunë nene uhonga na ukhani wako.” Na malaika agatunguya agamureka mweeso.
Maria Wenda Umusoya Elisabeti
39Mung'ë a matiku asaa, Maria agatunga muhënjo urë agaenda ung'e a gëtanto, u muji umwe wa Uyahudi. 40Na mweeso agahefea unyumba amwa Sakaria na agamuramucha Elisabeti. 41Na itungo narë Elisabeti wategheeya iramucheyo ramwa Mariamu, gana ganyui gëgariima mung'ë unda amwa Elisabeti. Na Elisabeti agagëjuywa Mwahu Mweru, 42na mweeso agarighëëtya gwa ruri aküü, “Muungu waguforiye veve mukhatë a akhema na Muungu noo ugumuforya mwana nëujie umufafa. 43Na gusoko kë në Muungu wantendea nene vii ërëë radwëëra kunë nene, nyinya wa Müküü wane aje kunë nene? 44Gusoko rarava, itungo nënaa nategheeya ruri wako wa iramucho, gana ganyui agahweta unda anë gwa uyanjo. 45Bahu akwe mweeso nëuguhuvëa gusoko asaa në Muungu waaraghanie ijie udwëëra, mwino malaika warighëtëye gwa rina ra Müküü.”
Wëmbo wamwa Maria wa Ikuryo
46Na Maria agahanya,
“Nkhoo ane ëgumukurya Müküü,
47na nkhoo ane ayanjaa mung'ëë a
Muungu Mutyoi wane.
48Gusoko wendie umwihenga mutughwa
wakwe në wënyumpiye.
Gusoko rarava, ufafo woong'e
vëjie untaana muforiwa.
49Gusoko mweeso unë munyanguu watendie mantu në makuu gusoko ane,
na rina rakwe në ryëru.
50Na gëhe gakwe gë kunë vasaa unë vëmutegheeye mweeso,
ufuma ufafo faka ufafo.
51Mweeso wendie uraghëëra nguu itambëëmwe na mukhono wakwe,
mweeso wavafaghatëye anya gëdida mung'ëë a masëgho a nkhoo yawe.
52Mweeso waatununtiye anya nguu ufuma u matumbë awe a utemi,
agavahumbua anyaginyumpya.
53Mweeso agavijuya anya njaa gwa mantu në maja,
na aghwarë agavareka vende mëkhono mëtufu.
54Mweeso agamwarëya mutumwa wakwe Isiraeli,
ukumbukwa gëhe gakwe,
55mwino mweeso warighëtëye kunë va tata vitu,
kunë Iburahimu nanë kunë ufafo wakwe khae na khae.”
56Na Maria agagikhaa itambëëmwe na Elisabeti gëntu mwino mëeri ëtatu na mweeso agasuka ukhaakwe.
Ifafo Ramwa Yohana Mubadisi
57Ikhondo ra ugitungua kunë Elisabeti rëgafika, na mweeso agagitungua mwana wa gëghosya. 58Na anyafife vakwe nanë anyandughu vakwe vëgategheeya mwino Müküü wamutendee mweeso gëhe gëkuu, na veeso vëgayanja itambëëmwe na mweeso. 59Na itiku ra munana veeso vëgaja umutoa mwana ihungu, na veeso vëgafenja umwëtana Zakaria, rina ramwa ihe. 60Ëgweeso nyinya wakwe agahanya, “Ëtiuyi; mweeso winjë utaamwa Yohana.” 61Na veeso vëgamukhanëa, “Anju gutie muntu mpa umwedu mu anyandughu vako në wina rina ërëë.” 62Na veeso vëgatenda ndolyo kunë ihe, vëumuwëëya mwino mweeso ugufenja mwana atanwe nyanyu. 63Na mweeso agaromba gëbao gagwandëkëa, na agaandëka, “Rina rakwe në Yohana.” Na voong'e vëgataka. 64Na gënyahafo momo nanë urimi wakwe vëgatarughwërwa, na agarighëëtya ugumukurya Muungu. 65Na wova ugavahanga anyafifë vakwe. Na sayu yasii yoong'e igarigheetiwa ung'ë oong'e a uvitanto vya Uyuda. 66Na voong'e narë vategheeya mantu ayaa vëgagiwëëya munkhoo yawe vëuhanya, “Mwana uyi ujieutenda wë urë?” Gusoko mukhono wa Müküü naa wë gunto akwe.
Uraghui wamwa Sakaria
67Na Sakaria tata wakwe agijuywa Mwahu Mweru agatanantya uguhanya,
68“Aforiwe Müküü Muungu wa Isiraeli,
gusoko wajie uvaarëya na uvakhomwoa antu vakwe.
69Waguhumbwëyë ufembe#1:69 Ufembe: Udaho, nguu.
wa utyoi witu
mung'ëë a nyumba a mutumami
wakwe Daudi,
70mwino warighëëtëye gwa mëomo
a anyagëdaghu vakwe
në veeru ufuma khae,
71mwino gudahe utyowa ufuma gwa arughu vitu,
na ufuma u mukhono wa voong'e unë vëguhwete sese.
72Utenda gëhe mwino wendie uvëka iraghano#1:72 Iraghano: Wirumëëyi wa antu vavëë utenda intu. Në umwedu watendasya, gutie uvë woong'e nëugudwëëra.
gwa va tata vitu
na ukumbukwa iraghano
rakwe në ryeru.
73Irafiyo#1:73 Irafiyo: Irafëyo ra antu vavëë utenda intu. Në umwedu wakhanëkëya mba watenda sya uvë ugudwëëra. unë mweeso warafie kunë
tata witu Iburahimu,
74ugufa sese, uvii sese,
gwa ukhomwowa ufuma u mukhono wa arughu vitu,
gudahe umutumamëa ësë gutina wova.
75Mung'e a weru nanë tutë usonge akwe
matiku oong'e a uduvi witu.
76Na veve, mwana, ugutanwa munyagëdaghu
wamwa wasau në wegunto a mantu oong'e;
gusoko veve winjë ugumutongeera Müküü gwa unëng'anëya njia yakwe.
77Uvafa umanyi wa utyoi gwa antu vakwe
mung'ëë a irekewa ra mahuye awe.
78Ukëërëa gëhe ga Muungu witu
itungo ra itiku në rejie kunë sese ufuma gunto.
79Uvafa weru vasaa unë vikhee u kitë na mung'ëë a muurë wa ikuya,
utongeera mëghuu itu mung'ëë a njëa a majëghana.” 80Na mwana agakura na agatendeka wina nguu munkhoo, na naa wë gëhaka faka itiku rasëë në mweeso wajie udwëëra gwa Isiraeli.
Currently Selected:
Luka 1: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.