Akolosai 1
1
1Faulo, mutumwa wamwa Kiristo Yesu gwa mafenji a Muungu, na Timoteo muuna witu. 2Kunë antu në veeru nanë aruna në ahuvëi mung'ë amwa Kiristo kuuko uKolosai.
Mboto kunë nyenye nanë majëghana ufuma kunë Muungu Tata witu.
Marombi a Urumba
3Sese matiku oong'e gumurumba Muungu, Tata wa Müküü witu Yesu Kiristo itungo në gumurombea nyenye, 4gusoko sese gwategheye uhuvëi wanyu kunë Kiristo na uyanjo në muukweti gwa antu në veru voong'e, 5gusoko a ighonje nëraëkiwe girunde soko anyu. Ëyëë nyenye mwamitegheeye khaingëja mu ukhani wa tutë, wa Sayu Njija, 6nëamuhangie nyenye, mwino a tutë muurëmi woong'e. Afafie nkhari na ukua, vii mukhatë anyu nyenye aghonjo, ufuma itiku në nyenye arë mwamëtegheye na umëmanya mboto a Muungu muututë, 7mwino nyenye mwisëye ufuma kunë Efafura muyanjwi witu mutendi mwëmo muyitu. Mweeso mutumami në muhuvëi wamwa Kiristo gusoko itu. 8Mweeso wagukhanëe sese uyanjo wanyu mwino nyenye mwafiwe na Mwahu Mweru.
9Na uvii ufuma itiku rasëë naarë gwategheeya, sese gwinatuya umurombea nyenye. Sese gumuromba Muungu amwijuye nyenye na umanyi wa mafenji akwe, na mahaa oong'e a munkhoo nanë umanyi. 10Kangë nyenye mudahe uduva mwino Müküü uyanjëte na matiku oongë mutende asaa nëumuyanjësya mweeso. Uduvi wanyu ugufa nkhari mung'ë a mu mwëëmo në uja na giongeeya mung'ë a umanyi wa Muungu. 11Muungu amutende nyenye mwina nguu yoong'e itambëëmwe na udaho, gwa uhonga nguu yakwe ya uküü wakwe, mudahe uhanga ughimu wa mu gëntu gwa ughimëyi itambëëmwe na uyanjo. 12Funyi asi kunë Muungu Tata, në wamutendie nyenye munoneye uhanga ifunju ra usai wa antu në veru mung'ë a weru. 13Mweeso wagutyoe sese ufuma u nguu ya kiiti na ugutoa sese mu utemi wa Mwana wakwe muyanjwi, 14na kunë mweeso sese gwahangie ukhomoi, iheywa ra mahutye itu.
Kiristo na Mwëmo Wakwe
15Kiristo në winkhori wa Muungu nëatigheete, mufafwa wa mwandyo wa ntundo oong'e. 16Gusoko ukëërëa kunë mweeso Muungu watundie mu gëntu a unto girunde na a fange, asaa nëigheete na mantu nëatigheete, nambesa matumbë a utemi nanë vibali nambesa anyautëma mba anyaudaho, mantu oong'e atundiwe ukëërëa kunë mweeso na gusoko akwe. 17Mweeso në wambee utongera mantu, oong'e na kunë mweeso mantu oong'e ikwatërelëë itambërëmwe. 18Mweeso në ëtwe ra mwëërë, uKanisa. Mweeso ni mwandyo, mufafwa wa mwandyo ufuma gwa akuyi gusoko mu gëntu mweeso adahe utendeka Müküü. 19Gusoko kunë mweeso agayanjiswa na ukhondeki woong'e wa Muungu wikhae. 20Na ukërëa kunë mweeso ukhuvëya kunë mughonjo mantu, oong'e nëmbesa a fang'e mung'ë nambesa a unto girunde, agatenda majëghana gwa saghami aMwana wakwe në wakurë unto a musalaba.
21Na hafo khae nyenye arë mwëkue na Muungu na arë mwëarughu mung'e a masëgho, na utenda ntendo nëmbë. 22Na mweeso itungwee wamukhuvëye umwëërë wakwe wa nyama na ikuya rakwe, gusoko amwete nyenye mwë vaeruchwë na mutikweti ihondwe. 23Na ëse mutina ihutye usonge akwe, nyenye mufwaghëëre mu uhuvëi, ëse mwakhamu gi. Mutahingisiwe ufuma gighonje ra Sayu Njija në mwamëtegheeye, nëatanantiywe muntundo oong'e fang'e a irunde, na unë nene Faulo, natendekie në mutumami.
Mwëmo Wamwa Faulo Mutumami wamwa Kanisa
24Itungwee nene nëyanjëte ukhasëka gusoko anyu, na mwëërë wane wa nyama nëkhondeye makhasëko nëasaghie amwa Kiristo gusoko a mwëërë wakwe u chu Kanisa. 25Nene natendekie në mutumami gwa uhonga na mufango wa Muungu unë nene nafewe gusoko anyu, uwutenda ukhani wa Muungu umanyëke laa. 26Gëmpihë gasëkë nëgafihiwe ufuma khae yasii na ufuma u mpafo yoong'e gweeso itungwee gakunukuwe kunë veeru vakwe. 27Kunë veeso Muungu wahwaniye utenda ëmanyëke üküü mukhatë a Ndughu ingëja, ughwarë wa üküü wa gëmpihë ëkëë, unë Kiristo mukhatë anyu, ighonje ra üküü. 28Sese gumutanantya mweeso, na umukenea mu muntu na usëya mu muntu gwa mahaa oong'e gusoko gudahe umweta mu muntu ukhamie gii kunë Kiristo. 29Gusoko asëë nene ngikhasia, na utintara itambëëmwe na nguu yoong'e në mweeso ugutendaa mukhatë ane gwa nguu.
Currently Selected:
Akolosai 1: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.