1 Timoteo 1
1
Faulo Ugumuramucha Timoteo
1Faulo, mutumwa wamwa Kiristo Yesu gwa iraghëëyo ra Muungu Mutyoi witu nanë Kiristo Yesu unë ighonje ritu.
2Kunë Timoteo, në mwanane wa tütë mung'ë a uhuvëi.
Mboto, gëhë, nanë majëghana ufuma kunë Muungu Tata nanë Kiristo Yesu Müküü witu.
Ukenei Gwa Asëyi va Weegheeghe
3Mwino naa ngaguraghëëya veve itungo nënaa nene nina muhënjo wa gwenda u mukoa wa uMakedonia, veve igunoneye usaghe u muji në üküü wa Efeso. Nene ngufenja veve udahe uvaraghëëya antu vëgëtunga fafo vëkhondye usëya masëyo a uregheeghe. 4Veve igunoneye uvakhanëe antu avaa vëkhondye uyaghaya matungo awe uhuma mahumo nanë uhangwëya mukhova urifu wa vaa kükü, unë ëguvatëndaa antu vikungume muntu na muntu muuyakwe. Mahumo ayaa nanë mukhova në urifu wa vaa kükü ugumughëëya Muungu ëkëutënda mwëmo wakwe, wa uvatyoa antu gwa uhuvëi. 5Soko a iraghëëyo ërëi rëuvasacha ahuvëi viyanje veeso gwa veeso gwa uyanjo nëufumie u nkhoo në njija nanë uhuvëi wa tutë. 6Asëyi avoo vauregheghe vadahie uyaghaa ufuma mu masëyo ayaa na vendie giingëya aghonjo mu murighëtyo wa gëfutu. 7Veeso vëufenja usëya seria a Muungu, ëgweeso veeso vëtimëmanyie mbesa asaa në veeso vëuyarighëëtya mba mantu në veeso vëuyasusutëya.
8Sese gumanyie mwino seria në njija, nësa muntu woong'e ugumëtumëa vija. 9Sese gumanyie, mwino chu seria iyii inafunywaa gwa antu nëvëumuyanjisya Muungu ëgweeso gwa antu nëvëtikwatëëre seria nanë anya gëdida. Kangë seria ëyëë afunyinywe gwa antu nëvëtiumukuryaa Muungu nanë anya mahutye, gwa antu nëtiveru nanë antu nëvëmuhwëtë Muungu, gwa antu nëvëuvauraghaa va ihe nanë avoo nëvëuvauraghaa va nyinya, nanë gwa antu nëvëuvauraghaa antu gëkaku. 10Gunto a avaa, seria afunyiywe gwa antu në avaya, gwa aghosya nëvëgilehadaa na aghosya vauya, antu nëvëuurinjaa antu vauya, vëegheeghe, antu nëvëusudangëa uregheeghe nanë antu nëvëutëndaa gëntu gëkaku në gëhiya na masëyo nëënoneye na aGekiristo. 11Gwa uhonga na Sayu Njija nëëfumie gwa üküü wa Muungu unë antu vëumukutaa, gwa ëyëë Muungu wamëmpee nene nëmëtanantye.
Faulo Ugufunya Irumbë Kunë Yesu Kiristo
12Nene ngumurumba Kiristo Yesu Müküü witu, unë wankhomiye nene gusoko a utenda mwëmo wane, gusoko mweeso wanyune nene nëmuhuvëi na agang'wania nene gwa utumami wakwe. 13Uvii, mbesa uvii nene kheengë naa ngumujumaa mweeso nanë umukhasya mweeso nanë umutuka mweeso. Ëgweeso mweeso wantendie në muja kunë nene gusoko naa natëndie vii gusoko naa nëmufutu na naantihuvëe. 14Na Müküü witu wankununtëe mboto nyingë nanguu, itambëëmwe na uhuvëi nanë uyanjo nëëmung'ë amwa Kiristo Yesu. 15Murighëëtyo urui në wa tutë na uvii unoneye ughenyifwa na uwuhuvëa, mwino Kiristo Yesu wajie mu urëmi uvatyoa anya mahutye. Na nene në munya mahutye wa mwandyo ukëra voong'e. 16Ëgweeso gusoko nene naa në muhutii ukëra voong'e Muungu agaraghëëra gëhe gakwe kunë nene. Kiristo Yesu agaraghëëra ughimu wakwe kunë nene ëtëndeke nyinkhori gwa avoo unë vëjie umuhuvëa mweeso na uhanga ufanga wa khae na khae. 17Kunë Mutëmi wa khae na khae, në atiukuyaa, në atidwëëre, Muungu umwedu, ëtëndeke ukumu nanë ikuryo khae na khae. Amini.
18Iraghëëyo ërëi nene ngugufa veve, Timoteo, mwanane, gwa uhonga na nkhani ya anyagëdaghu, nëigughokee vee, mwino veeso vayiehere veve udahe gihoma urughu në uja. 19Kwatëëralii uhuvëi na utënda wina urekanui në uja mukhatë a nëënoneye na në itinoneye. Gwa ujughuta urekanui mukhatë a nëënoneye nanë ëtinoneye antu vëgëtunga varekie uhuvëi wawe. 20Mukhatë a vasaa unë Himenayo nanë Alekisanda, unë namufee Setani gusoko veeso vëdahe gisëya ukhondya ujumana.
Currently Selected:
1 Timoteo 1: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.