YouVersion Logo
Search Icon

Roma 1

1
Atsyɛ̀’te
1Yɔɔn ŋwà’ne fóo mbwo mèŋ Pɔl, nyìŋ gẅie á fa’a fà’ Yěsô Kristo, e Ssé la tóŋo wɔ̀ɔn ńdɔg ńgÿo ngàŋ ntúm Yěsô Kristo, ńzába wɔ̀ɔn ngie n gʉa ńtsẅi Nkʉ̀ Mbòŋo wé mbwo lá’. 2Ntyě sǎg pá’ Ssé la la’ ńka’ wɛ̌ Nkʉ̀ Mbòŋo tà ńgÿo pà Ntsẅi nkʉ̀ pé pe fʉ̀’ʉ mvfò ŋwe’e tsɛ̀ɛ ŋwà’ne yé. 3Wɛ̌ nkʉ̀ gɔɔn nò nà Míŋ we Yěsô Kristo gẅie aa Cʉ̀apʉ̀a wege. À la sele ńcʉ́’ʉ nyìŋ mésoŋ mé zyé yé nà ngẅɛ̀ ndá fùɔ Ndavíd. 4E Ssé piŋ ńzába yé á gwɔ́ Míŋ Ssé, ńgẅiin metʉ̀. Á lɔg pá’ à la gÿo á zíme tsetsɛ̀ɛ mepfó, mbɔɔ pá’ à la ńnéŋe Zẅìge Ndʉalʉ̌a mbwo yé. 5E Ssé la cʉa pɔ́ nà yé Kristo ńcÿó gem yɔ́ɔn, ńdɔgɔ wɔɔn ńgÿo ngàŋ ntúm Yěsô Kristo légwɔ́ gie mèŋ n ge gʉa shwóŋó nò Ssé, tsɛ̀ɛ mengwòŋ ntsèm. Epʉ̀a záb ntʉ́m nà yé, ńjú’ ncwò wé, à cʉa pú’u, pɔ́ ná mekù’ mbwo Yěsô Kristo. 6Mbɔɔ pi gí, pi ee nà nùɔ pʉ̀a ŋwɛ́, ńtí nue e Ssé ka tóŋo gẅi ngie pi gwɔ́ gí pʉ̀a Kristo. 7Mèŋ m biŋ ńnáa yɔɔn ŋwà’ne mbwo pi métsèm pie pi ee tÿǒsoŋo *Roma. Pi pie e Ssé kwoŋo gẅi, áa yɛ̌ à la tóŋo gẅi pá’ pi ge gwɔ́ pʉ̀a pé pie à tsɔ̌’. Mèŋ ne ńtsɔ́ɔn ngie Tá wégè Ssé mbɔɔ Cʉ̀apʉ̀a Yěsô Kristo ne ńgwɔ́ né pi, ńně ńnéŋe sẅéte ntʉ́m pi.
Pɔl ne ńtsɔ́ɔn légʉa ńgyá pʉ̀a Kristo pie ée Roma
8Mèŋ m vɔ̌g ńcʉa nà lezíŋ Yěsô Kristo ésie Ssé yɔ̀ɔn nà twó sí métsèm, mélà’mie mé ée tsɛ̀ɛ njÿó jʉ’ ntsèm ne ńgɔɔn ntí gie pi lɔg ńzáb ntʉ́m nà Yěsô Kristo. 9Áa yɛ̌ fʉ̀’ wɔ́, gie mèŋ n ne sẅíŋte Ssé, mèŋ n té nyé té kíme gẅi wɔ́. E Ssé ne ńzsé pú’u. Mèŋ n gɔɔn pá’ɔɔn ńgwɔ́ nyìŋ gẅie à ne fa’a fà’ yé lé ngwòŋ ntʉ́m wé ntsèm, ńně ńtsẅii nkʉ̀ mbòŋo gẅie é líe Míŋ we. 10Mèŋ n gǐŋ ne sẅíŋte Ssé fʉ̀’ʉ kɔ́ wɔ́, ńdúɔ mbwo yé ngie à gÿo, légwɔ́ gẅie mèŋ n zɔ́gɔ ńtsɔ́ɔn légʉa mbʉ̀a pi, à pumte nà we lékwoŋ. 11Á nue n kwà’ ne ńtsɔ́ɔn létó ńgyá gẅí, légwɔ́ gie n ge gÿo Zẅìge Ndʉalʉ̌a cÿó gem gí, mentʉ́m mí kẅi’i ńtʉte. Pi lɔg pú’u ńkẅi’i ńtʉte. 12Ndyɛ̌’ n kɔ’ɔ́ gɔɔn pɔ́ ngie n dɔɔn tó ńgwɔ́ tsetsɛ̀ɛ pi, egi ntí lézáb ntʉ́m nà Ssé é kẅiŋte wɔ̀ɔn, eyɔ́ɔn ntí kẅiŋte gẅí.
13Mefɛ́ pɔ́ɔn, pi zsé mboŋó ngie n dǎ táŋ tɛ’ létó ńgyá gẅi tá shÿó ké tè kẅɛ tà ńkú lyɛ̌’ɔɔn. N daa pú’u ńtsɔ́ɔn létó fa’a tsetsɛ̀ɛ pi tà pi jÿó gí pì pá’ n ka fa’a tsɛ̀ɛ tsɔ́ mengwòŋ pɔ́ jÿó pì. 14E Ssé la náa yɔɔn fà’ né mèŋ, áa yɛ̌ mèŋ n gẅiin létsẅi nkʉ̀ mbòŋo mbwó pʉ̀a metsèm, á mbwo pʉ̀a pie é la zí’i zsenò mbɔɔ pie é la té zí’i, á mbwo pà zsé ŋwà’ne mbɔɔ pà tè zsé. 15Áa mmó gie á gÿo tá mèŋ n tsɔ́ɔn létó ńtsẅi nkʉ̀ mbòŋo mbwo pi gí, pie pi ee tÿǒsoŋo *Roma.
Metʉ̀ nkʉ̀ mbòŋo
16Ńgwɔ́ eshʉ́ lékúu wɔ̀ɔn á létsẅi nkʉ̀ mbòŋo wɔ́, ée metʉ̀ mie e Ssé lɔgɔ ńgÿo pʉ̀a pie é záb ntʉ́m nà yé tsẅɛ́ɛ. À zye nà pà Yuda ńkúu ná pʉ̀a pie é té pà Yuda wɔ́. 17Á zɔɔn ńgwaa gwɔ́, nkʉ̀ mbòŋo ne ńgÿo mé zsé pá’ á cʉa pú’u, tá Ssé lɔg pʉ̀a mésoŋ ńtóŋ pʉ̀a pie pɔ́ ée ndʉŋ ndʉŋ mvfò yé á cʉa pɔ́ ndà’ nà pá’ pɔ́ záb ntʉ́m nà yé. E tsɔ̌ nzsè ndyɛ̀’ɛ è tè wó wɔ́. Áa mmó gie mé la ŋwe’e tsɛ̀ɛ ŋwà’ne Ssé ngie: Nyìŋ gẅie aa mvfò Ssé ńgwɔ́ ndʉŋ ndʉŋ ńtí nue à záb ntʉ́m nà yé zɔ ge lá’ gwɔ́ wó.
Epʉ̀a mésoŋ ee pà gÿo nò tepòŋ
18E Ssé zɔɔn ńgwɔ́ tÿǒ lepwó ne ńnyɛɛ ngie à ne ńgyaŋa lóŋ, mélà’mie pʉ̀a mésoŋ é móŋo yé, ńnéŋe ńgÿo menò tepòŋ. Pɔ́ ne ńdɔgɔ ńgÿo menò tepòŋ mɔ́b ńtáte nò nénʉ́ léfa’a fà’. E Ssé ne ńnéŋe ntsaŋ twó pɔ́b, 19mélà’mie ammó gie à lɔɔn ńgwɔ́ mé zsé nà Ssé, pɔ́ gíŋe ne ńzsé yɔ́b zsé. E Ssé la shʉ̀ashʉ̀a ńnyɛɛ wɔ́b yɛ̌ mmó. 20Á zɔɔn ńgwaa gwɔ́, mbà tá fó pá’ e Ssé la nyɛ́te njÿó, mé fó nà shúm sie à la nyɛ́te, ńzsé ngie aa Ssé, tà mbɔɔ pá’ mé té gyá yé lê nÿɔ́g wɔ́. Mé zsé metʉ̀ mé mie é téen ńdá’a maga wɔ́. Á cʉa pú’u, ńgwɔ́ pʉ̀a mésoŋ le lá’ ngie pɔ́ la tè ne ńzsé Ssé wɔ́ wɔ́. 21Pɔ́ zsé Ssé, tá pɔ́ té gu’te yé, ésíe yé pá’ á ne ńzɛ́te ngie mé gÿo pú’u, nà Ssé wɔ́. Tà ńcʉ́’ pú’u, mbà legyè sɔ́b la fʉte wɔ́b pɔ́ fʉa mánzsè, ntʉ́m wɔ́b gẅie é gẅiin pɔ́ gʉ̀gʉ̀ nzsenò gÿo pɔ́ gwé tsɛ̀ɛ nzěm. 22Pɔ́ tóo sá’a ngie pɔ́ zsé nò, ńcʉ́’ mepʉ̀a. 23Pɔ́ nyé légu’te Ssé gẅie à gẅiin legú’, ńgwɔ́ tè kwé, ńcʉ́’ ńgu’te pɔ́ shúm sẅɛ̀ɛ, éshúm sie é sẅé nyìŋ mésoŋ gẅie aa ńkwé, ésẅé meshʉ́ŋ, setsɔ́ sẅé menɔ̀ɔn pie é gẅiin mekwò lekùa, setsɔ́ sẅé menɔ̀ɔn pie éshwoŋo lepfòm sɔ́b ssé.
24Áa mmó gie á la gÿo e Ssé nyé wɔ́b pɔ́ gÿo menò sẅile sẅile mie ntʉ́m wɔ́b la ně ńtsɔ́ɔn ndêen ńké ńdɔgɔ légÿo pú’u, ésele ńcʉ́ŋte mbùm yɔ́b, ńdɔg sele ntém shʉ́ twó pɔ́b. 25Pɔ́ la nyé nò nénʉ́ gie áa nà Ssé, ńcʉ́me nzèm cÿɔ nò, á gwɔ́ pá’ pɔ́ cʉ́’ ńgu’te pɔ́ shúm sie e Ssé la nyɛ́te, ńcʉ́’ʉ fa’a pɔ́ mbwo sɛ̌ shúm. Tá mé gẅiin légu’te pɔ́ yé mbù’ ngwòŋ, ńgu’te yé á nà ngù’ nkɔ́ɔn nê nkɔ́ɔn, *Amen.
26Áa mmó gie á la gÿó e Ssé nyé wɔ́b pɔ́ gÿo mmó gie nkwaŋá wɔ́b tyé mǒ tá é gwɔ́ menò mie ée néŋ shʉ́ nà pɔ́b. Mezwě pɔ́b nyé mbàŋa ńcʉ́’ʉ fa’a pɔ́ tsɔ́ pànzwě pâ pɔ̌ nuŋe, yɛ̌ ntí légÿo menò è té ntí gie Ssé la záb wɔ́. 27Mbàŋa gíŋe ńgÿo yɔ́b pɔ́ pú’u, ńnyé pànzwě, letʉ́m sɔ́b cʉ́’ʉ shÿó pɔ́ sele ńtsɔ́ɔn tsetsɛ̀ɛ pɔ́b pɔ́ pá’ mámbàŋa pɔ́ wetsɔ̌ ge sele ńnuŋe, á gwɔ́ nò shʉ́ nà pɔ́b. Á gwɔ́ pú’u, e Ssé néŋ ngɔ́’ kwà’ nà pɔ́b á fóo nà tsẅé tepòŋ yɔ́b.
28Pá’ pɔ́ la lʉ’ʉ lézsé Ssé lá, e Ssé la nyé wɔ́b, legyè sɔ́b sie é té tyé zɔ̌ cʉ́’ʉ sá’a wɔ́b pɔ́ cʉ́’ʉ ńgÿo pɔ́ mmó gie pɔ́ kɔ’ɔ́ tè gÿo wɔ́. 29Menò mie Ssé tè ne ńkwoŋo wɔ́ pú ńjÿó wɔ́b, pɔ́ gÿo menò tepòŋ, ńgẅiin kègɔ́’, ńgwɔ́ pʉ̀a ńcÿɔ́g cÿɔ́g, légyá mmó nyìŋ ńkwɔ́’ɔ lóŋ mǒ pú ńjÿó wɔ́b, pɔ́ zẅéte pʉ̀a, ńnéŋe ńtág pɔ́ melà’, ńgẅiin fʉte, akɔ́ sá’a twó pɔ́b gwɔ́ pɔ́ gÿo gÿo, ńzáb menò twó pʉ̀a, 30ésele ńtÿɔ́g sóon nà pɔ́b tsetsɛ̀ɛ pɔ́b, ńgwɔ́ megàŋ mbù Ssé, ńzoonte pʉ̀a, ńgwɔ́ ngàŋa ŋá’tè, ńgwɔ́ pà nyɛ nnɛ́, éfa’ meshÿó ntsèm lélɔg ńgÿo nò tepòŋ, pɔ́ té jú’ ncwò metá pɔ́b mbɔɔ we memá pɔ́b wɔ́. 31Legyè zága wɔ́b. Pɔ́ ka’a nò pɔ́ té gÿo, ntʉ́m wɔ́b lêen ńtʉa, pɔ́ ee pà tè tsɔ́ɔn mezìŋe. 32Pɔ́ cwòŋo ne ńzsé ngie áa mbwo Ssé, e pʉ̀a pie pɔ́ gẅiin wɔɔn mà, ée pʉ̀a pie é tyé pá’ mé ge lá’ zẅé wɔ́b zẅé. Tá’, pɔ́ té fʉate mɔɔn menò fʉate ndà’ wɔ́, pɔ́ gíŋe ńkẅiŋte pʉ̀a pie é ne fʉate mɛ̌ menò yɔ́b.

Currently Selected:

Roma 1: NGBM

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy