1 Korento 1
1
Atsyɛ’te
1Yɔɔn ŋwà’ne fóo mbwo mèŋ Pɔl ngàŋ ntúm Yěsô Kristo. E Ssé yé máŋwɛ́ zɔ la tsɔ́’ɔ wɔ̀ɔn ná we lekwòŋ ńdɔg ńgÿo wɛ̌. Fɛ́ wege Sostɛne aa yé ssé.
2Mèŋ n ŋwe’e ńnáa mbwo cú’tè pʉ̀a Ssé á tÿǒsoŋo Korento, á wɔ́b pie e Ssé la laa wɔ́b nà Yěsô Kristo ńdɔgɔ wɔ́b ńgÿo pʉ̀a pé, ńzɛ́te mbwo pɔ́b ngie pɔ́ gwɔ́ kwà’ pʉ̀a pé. N náa yɔɔn ŋwà’ne mbɔɔ mbwo mânyìŋ ntsèm gẅie aa nzɔ̌ nzɔ̌ wɔ́, ńtóŋo lezíŋ Cʉ̀apʉ̀a wege Yěsô Kristo. À lɔgɔ pú’u, ńgíŋe ńgwɔ́ Cʉ̀apʉ̀a wɔ́b yɔ́b. 3Tá wege Ssé mbɔɔ Cʉ̀apʉ̀a Yěsô Kristo ne ńgwɔ́ né pi ḿbiŋ ne ńnéŋe sẅétè ntʉ́m pi.
Menò mbòŋo mie Ssé lɔgɔ ńcÿó gem pʉ̀a Korento
4Mèŋ ne ńnáa ndǎg mbwo Ssé fʉ̀’ ntsèm ńtí gẅí, á nà menò mbòŋo mie à ka lɔg ńcÿó gem gí, ńcʉa nà pá’ pia Yěsô Kristo kéen ńtemte. 5Pá’ pia kristo kéen ńtemte la, e Ssé ka fǒ pú’u, ńnáa fù’ ntsèm né pi. À ka gÿo pi ku’u léshwóŋó nò yé, ńgíŋ ńgÿo pi ku’u lézsé nò nénʉ́. 6Á fó ná pá’ mé ka shwóŋó gẅi nò gie mé zsé ná Kristo, pi zẅíŋ lê ntʉ́m gẅi ntsèm, 7tà áa fʉ̀’ɔɔn ńgwɔ́ mbwo pi pie pi ne ńzẅí’te fʉ̀’ gie Cʉ̀apʉ̀a wege Yěsô Kristo ge kẅɛ, atsɔ́ fù’ gie á fóo mbwo Ssé, tà pi nyé ne ḿmoŋe á té wó wɔ́. 8Yé Yěsô Kristo ge gÿo pi tʉte tʉte tà ndá’ ńcʉ́me, à lá’a lyɛ’ gie yé Cʉ̀apʉ̀a wege, ge lá’ gíŋe tó mé le ne ńda’a gẅi nà tsɔ́ mmó wɔ́. 9Yé Ssé gẅie à la tsɔ́’ɔ gẅi pá’ pi ge ńnéŋe fʉ̀’ ntsèm é la nnɛ́ nà Míŋ we Yěsô Kristo gẅie aa Cʉ̀apʉ̀a wege, aa ntě ńka’a mmó gie à ge gÿo ḿbiŋe ńkúbe wɔ́.
Afàgte áa tsetsɛ̀ɛ pʉ̀a kristo á Korento
10Mefɛ́ mefɛ́, n dɔ̌g lezíŋ Cʉ̀apʉ̀a wege Yěsô Kristo ńgɔɔn né pi ngie: Pi gwɔ́ tà’ ncwò, ńgie tà fàgte gwɔ́ tsetsɛ̀ɛ pi, ńgie pi gẅiin tà’ ntí lesaŋá nò, ńgẅiin tà’ nkwaŋá. 11Mefɛ́ pɔ́ɔn, mèŋ n zɔɔn ńgɔɔn pá’ɔɔn nue epʉ̀a nà ngẅɛ̀ Keloé ka shwóŋó wɔ̀ɔn nò ná pi, ngie fàgte kéen ńkúu tsetsɛ̀ɛ pi. 12N ka fó mǒ ńjú’ ngie awɔ̌wɔ́ɔ tsetsɛ̀ɛ pi ńcʉ́’ʉ shwóŋó pɔ́ nà ye ntí. Tsɔ̌ nyìŋ gwaa ne gɔɔn ngie aa nyìŋ we Pɔl, wetsɔ́ ne ńgɔɔn ngie aa nyìŋ we Apolos. Wetsɔ̌ gwɔ́ ne gɔɔn ngie aa nyìŋ Kéfas, wetsɔ́ ne ńgɔɔn ngie aa nyìŋ we Kristo. 13Kristo aa pá’ɔɔn, mbà à kéen ńgabte mbùm ye lá? Mé la kim pɔ́ Pɔl nà tÿǒ nkǐ ńtí gẅi lá? Kà pi la kẅé ntse pɔ́ nà lezíŋ Pɔl?
14Mèŋ ne síe Ssé á nue é té ndà’ Gaẅis pɔ́ Krispus wɔ́, mbà tsɔ̌ nyìŋ gẅi la tè kẅé ntse mbwo mèŋ wɔ́. 15Pú’u lá, atsɔ̌ nyìŋ gẅie ngwɔ́ á gɔɔn ngie pi la kẅé ntse ńdɔgɔ pú’u, ńcʉ́’ʉ pʉ̀a pɔ́ɔn à tè wó wɔ́. 16Oon, n dege kɔ́, atsìŋe ndá Stefanas la gíŋe ńkẅé ntse mbwo mèŋ, é té ndà’ pú’u wɔ́, mbà mèŋ n kaa gíŋe ńzsé tsɔ̌ nyìŋ tsetsɛ̀ɛ pi gẅie à la kẅé ntse mbwo mèŋ wɔ́. 17Kristo la zɔɔn tè túmo wɔ̀ɔn ngie n gʉa ńgÿo pʉ̀a kẅé ntse mbwo mèŋ wɔ́. A là túmo wɔ̀ɔn pɔ́ ngie n gʉa ńtsẅi nkʉ̀ mbòŋo. Tá ńké lelɔg pɔ́ zse nò nyìŋ mésoŋ ńtsẅi wɔ́, ḿbɔ́gɔ légÿo metʉ̀ mie é fóo nà pá’ Kristo la kwé nà tÿǒ nkǐ é mag.
Yěsô Kristo aa metʉ̀ mbɔɔ zsé nò Ssé
18Mé zɔ́ɔn ńgɔɔn nò nà legwé Kristo nà tÿǒ nkǐ á gwɔ́ mbwo pʉ̀a pie pɔ́ ée nà mánzsè lepyé ńgwɔ́ pɔ́ nò ngàŋ lejÿɔ́g, tá ńké ńgʉa nà pege pie pege ee nà mánzsè letsẅɛ́, yɛ̌ nò gwɔ́ mbwó pege ńda’te pɔ́ metʉ̀ Ssé. 19E Ssé la zɔɔn ńgɔɔn tsɛ̀ɛ ŋwà’ne yé ngie: Mèŋ n ge gÿo tágte zse nò pazsé nò, é pyág legyè pʉ̀a pie legyè sɔ́b ée wó.
20Anzse nò lɔgɔ pá’ɔɔn ńgíŋe ńgwɔ́ nzɔ̌? Anzse ŋwà’ne Ssé gwɔ́ nzɔ̌? Anzoŋo nò ná yɔɔn kème njÿó gwɔ́ yé nzɔ̌? E Ssé léen tè gÿo azsé nò tsɛ̀ɛ njÿó cʉ́’ menò pʉ̀a wɔ́ le?
21Áa pú’u, pá’ɔɔn á nue pʉ̀a mesoŋ la tè lɔgɔ yɔ́b zse nò, ńzsé Ssé wɔ́, tà mbɔɔ pá’ e Ssé ne shʉ̀ashʉ̀a ńnyɛɛ zsé nò yé. Áa mmó gie á la gÿo e Ssé záb ngie à ge gÿo pʉ̀a pie pɔ́ zǎb ntʉ́m ná ye tsẅɛ́, éfó ná yɔɔn nò gie pege ne ńgɔɔn, epʉ̀a ne ńgyá ngie é gwɔ pɔ́ menò pʉ̀a lɔɔn. 22Pà Yuda ée nà wɔ́b nkwɔ’ɔ́ ńně ńzɛ́te ngie mé nyɛɛ mmó gie á la’te metʉ̀ Ssé. Pʉ̀a Gelekia ne ńzɛ́te mmó gie á la’te kwà’ zsé nò. 23Tá á ké ńgʉa ná peg, peg ne sá’a pɔ́ nò Kristo gẅie mé la kime yé nà tÿǒ nkǐ. Yɛ̌ nò gwɔ́ mbwo pà Yuda ńgwɔ́ nò gie ngwɔ́ mé zɔɔn le kím tà shwóŋó nyìŋ wɔ́, ńgwɔ́ mbwo pʉ̀a pie é té pà Yuda wɔ́ ńgwɔ́ pɔ́ menò pʉ̀a. 24Tá á gʉa mbwo pʉ̀a pie e Ssé tsɔ’ɔ́ wɔ́b, kà é gwɔ́ pɔ́ pà Yuda wɔ́, kà pʉ̀a pie é té pà Yuda wɔ́ wɔ́, Kristo la’te pá’ metʉ̀ Ssé ée pú’u, mbɔɔ pá’ zsè nò Ssé áa pú’u. 25Á nue ammó gie e Ssé gÿo nyìŋ mesoŋ gyá ngie áa nò pʉ̀a, azsé nò áa mǒ ńcʉa gie áa nà mmó gie nyìŋ mesoŋ gÿo. Ammó gie Ssé piŋ ńgÿo nyìŋ mesoŋ gyá ngie á pÿɛ pÿɛ̌, yɛ̌ gẅiin tʉ̀ ńcʉa we shúm sie nyìŋ mesoŋ gÿo.
26Mefɛ́ mefɛ́, pi pie Ssé la tsɔ́’ɔ gẅí, pi gyá ntí gie pi lɔg ńgwɔ́, epʉ̀a pie mé ee tsɛ̀ɛ njÿó ńgyá ngie ée pàzsé nò, é té tsetsɛ̀ɛ pi tà ńgyɔ́ɔn wɔ́. Pàgẅiin metʉ̀ é té tsetsɛ̀ɛ pi tà ńgyɔ́ɔn wɔ́. Pàfó nà metsìŋe ndá memáa pʉ̀a piŋ ńké tè tsetsɛ̀ɛ pi tà ńgyɔ́ɔn wɔ́. 27Tá’, e Ssé la tsɔ́’ shúm sie njÿo gyǎ é gwɔ́ pɔ́ shúm pʉ̀a ńdɔg ńtém shʉ́ ná pàzsé nò, ńtsɔ́’ɔ mmó gie áa tsɛ̀ɛ njÿó ńgwɔ́ pɔ́ pepÿɛ́ ńdɔg ńtém shʉ́ ná sie é gẅiin tʉ̀. 28E Ssé la tsɔ́’ɔ mmó gie áa tsɛ̀ɛ njÿó á té tsɔ́ mmó ku’, ńkɔ́g kɔ́g, mé gwág gwǎg, ńdɔg ńzẅé nzẅìŋ gie mé kwǎŋ ngie áa mmó tɛ’. 29À cʉa pú’u, atsɔ̌ nyìŋ mesoŋ le ŋá’te mvfò Ssé wɔ́. 30Yé Ssé zɔ la temte gẅia Yěsô Kristo, ńdɔgɔ yé ńgÿo yégè zsé nò. E Ssé fó ná ye ńgyá wégè pá’ pà tè fʉa, ńdɔgɔ wégè ńgÿo pʉ̀a pé, ńzá’ nkÿo pù’ nò tepòŋ ná pege. 31Á lɔgɔ pú’u, ńcʉ́me nà nò gie ŋwà’ne Ssé gɔɔn ngie: Nyìŋ lɔɔn ne ńkwoŋo leŋá’te, á lɔg pɔ́ mmó gie Cʉ̀apʉ̀a la gÿo tá ńdɔg ńŋá’te.
Currently Selected:
1 Korento 1: NGBM
Highlight
Share
Copy
Want to have your highlights saved across all your devices? Sign up or sign in
Nouveau Testament en Ngienboum © Alliance Biblique du Cameroun, 2007.