Mateo 2
2
Dorë cjitëmȩri pio judiri jana̧rëreji̧ri̧dirȩ büë oa ütararea̧ dabaji̧ri̧ judiro̧ Jechu boi̧ pio ju̧i̧ dadäräpea̧ oa
1Ado Jechu judi ara̧ oa cjiarëremȩde Judea quȩmȩ chiriräpȩ ju̧ri̧, Berȩ quȩmȩ bë ma̧ri̧räpȩ ju̧ri̧. Aja̧, ara̧ oa cjiarëremȩde Erode quȩmȩ pio judi chiri ütëmȩrȩ cjo̧ro̧rä judirä. Ado pio judirä peaja̧di cjo̧ro̧rëreji̧ri̧dirȩ büë oa ütararea̧ dabaji̧ri̧ pio judiro̧. Jabechji̧ urëdi tjamo̧ oa jo̧rȩtaji̧ri̧rȩ cjo̧ro̧rëreji̧ri̧dirȩ, ado chjadëri̧ dabarëreji̧ri̧dirȩ büë pio ju̧i̧ chjiari. Ado pio jiro büë oa ütararea̧ dabaji̧ri̧ pio judiro̧ go̧düdärärëreji̧ri̧dirȩ Jerucharȩräpȩ ju̧ri̧, Erode quȩmȩ ütë cjo̧ro̧mȩräpȩ ju̧ri̧. Jabechji̧ dorë cjitëmȩri pio judiri go̧düji̧ri̧rȩ japamitë ana̧ tjamo̧ri̧ tai̧rëreji̧ri̧dirȩ, a̧dë chjäte jachi tjamo̧ri pio judiri. Ado pio judiro̧ japamitë ana̧ chjätä ëte, jabechji̧ Jerucharȩräpȩ ju̧ri̧ go̧düdärärëreji̧ri̧dirȩ. Ado ju̧ri̧pȩ go̧düdäräa̧rä, ja̧di ta̧rëri̧ iëno̧ iëno̧ ta̧rërëreji̧ri̧diro̧jȩrȩ pumȩ ji̧ri̧:
2—Danȩrȩ, ¿tjana̧räpȩde ara̧ oa cjiamȩ judi, judio pio ji̧ri̧ ja̧ Ütëbea üdë? —iëno̧ë ta̧rëa̧diro̧jȩrȩ—. Jabechji̧ pio ju̧i̧ chjiari na̧rȩmȩ büë pio ju̧i̧ daea̧rea̧ro̧jo̧ȩ. Uëräpȩ baramȩ oa, uëräpȩmo̧ cjitëmȩ oa daea̧rea̧ro̧jo̧ȩ, cja̧rȩmo̧ co dadërërea̧ büë pio ju̧i̧. Tjamo̧ davä. Ütë pio ju̧i̧ chjiari na̧rȩmȩ büë pio ju̧i̧, judi ara̧ oa cjia̧ pio ju̧i̧ chjiari na̧rȩmȩ büë pio ju̧i̧ daea̧rea̧ro̧jo̧ȩ. Ado ibëa̧ chiriri pio judiri cho̧rë ma̧na̧rea̧ro̧jo̧ȩ jachi tjamo̧ri pio judiri. Jabechji̧ Ütëbea pio ju̧i̧ goëdaera̧pea̧rea̧ro̧jo̧ȩ. Tjamo̧ davä. Pio ju̧i̧ chjacjiamȩri̧ jo̧rȩtera̧pea̧rea̧ro̧jo̧ȩ. ¿Jabo tjana̧räpȩde? —yo̧ji̧ri̧rȩ iëno̧ iëno̧ ta̧rërëreji̧ri̧dirȩ Jerucharȩräpȩ ju̧ri̧.
3Ado judiro̧ ja̧di ta̧rëri̧ iëno̧ iëno̧ ta̧rëa̧ oaiä, jabechji̧ chiri ütë cjo̧ro̧mȩ pio judi, Erode quȩmȩ pio judi ana̧ tjamo̧ri̧ jo̧rȩtamȩpea̧de, uapai̧ ta̧rëri̧. Jabechji̧ pio judi ütëmȩrȩ cjo̧ro̧a̧ oaiä, judio pio ji̧ri̧ ja̧ ütëmȩrȩ cjo̧ro̧a̧ oaiä, jabechji̧ uapai̧ ta̧rëri̧ jo̧rȩtamȩpea̧de ano̧ mire ütëpe bagapai̧ damȩ pio ju̧i̧ chjiari. Ado pio judimo̧rȩdë, jabo Jerucharȩräpȩ cjo̧ro̧ji̧ri̧ pio judiro̧borë bücjüri̧ cjiaji̧ri̧rȩ jo̧rȩtaji̧ri̧pea̧dirȩ. 4Ado pio ju̧i̧iä Erode judi chjaodëri̧ a̧dopa tänȩno̧rëremȩdejȩrȩ judio ütëti̧ pio ji̧ri̧. Jabechji̧ tjamo̧ goë tuti ja̧bepaji̧ri̧ pio ji̧ri̧, Moicherë go̧ȩparërea̧ ma̧ȩ oa a̧ra̧ano̧ji̧ri̧ pio ji̧ri̧bo a̧dopa tänȩno̧rëremȩdejȩrȩ büë oa ütararea̧ dabaji̧ri̧ pio judiro̧ yo̧a̧ pio ju̧i̧ chjiari chjadëri̧ ta̧rëpea̧ oa. Ado a̧dopaji̧ri̧ oa ja̧di ta̧rëri̧ yo̧mȩrȩ iëno̧ë ta̧rërëremȩdejȩrȩ Erode judi:
—Chjadëri̧ yo̧chji̧coe —yo̧a̧dejȩrȩ—. ¿Tjana̧räpȩ ara̧ oa cjiapade Ütërë mitëa̧ Chjätä Tänȩmȩ judi? Chjadëri̧ yo̧chji̧coe —yo̧a̧dejȩrȩ.
5Ado dëbë yo̧ji̧ri̧rȩ yo̧a̧diro̧jo̧ȩ:
—Tjana̧räpȩdë, danȩ ütë, Judea quȩmȩ chiriräpȩ ju̧ri̧ ara̧ oa cjiapade, Berȩ quȩmȩ bë ma̧ri̧räpȩ ju̧ri̧ —yo̧a̧diro̧jo̧ȩ—. Pio ju̧i̧ yo̧diibe Ütë tjamo̧ ja̧ ma̧ȩ üdë. Jabechji̧ ja̧di ta̧rëri̧ go̧ȩparëremȩde Ütërë ea jana̧ chjadüa̧ oa ni̧bämȩ judi. Ta̧rëvä ma̧ȩ oa.
6"Berȩ quȩmȩ bë ma̧ri̧ üdë Judea quȩmȩ chiriräpȩde. Jabo pio jiro bë ma̧ri̧ üdë boi̧chji̧räbo, jabechji̧ a̧dë chjäte ba chiade bë ma̧ri̧ pio ji̧ri̧iä. Jabechji̧ pio jiro bë ma̧ri̧rä ara̧ oa cjiapade tjamo̧ yo̧pamȩ judi, a̧dë chjäte ba chiamȩ judi. Ado pio judi chjadëri̧ jidapadejȩrȩ ca̧ pumȩ ji̧ri̧, Icharai pio judiri ja̧ji̧ri̧ pumȩ pio ji̧ri̧."#2:6 Miquea 5:2
Aja̧ ütë, ja̧di ta̧rëri̧ go̧ȩpea̧ oa cjiade ma̧ȩ üdë Ütë pio ju̧i̧ chjiari, Berȩräpȩ ara̧ oa cjiapamȩ Ütë pio ju̧i̧ chjiari —yo̧a̧diro̧jo̧ȩ.
7Pio ju̧i̧ ta̧rëa̧ oaiä, Erode quȩmȩ ütë pio judi ma̧ȩ chjadürëremȩdejȩrȩ büë oa ütararea̧ dabaji̧ri̧ pio ji̧ri̧iäpȩmo̧ pio jȩa nö̧ta goadi ni̧bä chjaopea̧ oa büë pio ju̧i̧ chjiari. Ado judiro̧ a̧dopea̧rä, chjadëri̧ dabamȩpea̧de. Aja̧, judiro̧ büë oa pearä darërea̧ ji̧, ‘pio jiro uirä darëreji̧ri̧diro̧da, pio jiro gupënȩrä darëreji̧ri̧diro̧ju̧i̧da, pio jiro doro darëreji̧ri̧diro̧ju̧i̧da’ quëna̧ dabamȩpea̧de Erode judi. 8Ado ji̧ri̧ ta̧rë ëte, ja̧di ta̧rëri̧ yo̧rëremȩdejȩrȩ:
—Danȩrȩ, jäe dachji̧vä Berȩräpȩ ju̧ri̧ —yo̧a̧dejȩrȩ—. Iëno̧ iëno̧ ta̧rëji̧ri̧rȩ na̧tachji̧jo̧ȩ Ütë boi̧chji̧ pio ju̧i̧ dadäräa̧rä yuro. Ado pio ju̧i̧ dadäräa̧rä, jabechji̧ ma̧ȩ yürera̧chji̧coe pio cüdëborë jäe dapea̧ oa, pio cüdëborë chjacjiamȩri̧ jo̧rȩtapea̧ oa Ütë boi̧chji̧ pio ju̧i̧ —yo̧mȩrȩ u̧i̧pe yo̧rëremȩdejȩrȩ, tjamo̧ri̧ goëde jädëri̧ cjiamȩrȩ.
9Ado büë oa ütararea̧ dabaji̧ri̧ pio judiro̧ Erode pio ju̧i̧ nö̧ta ni̧bä chjao ëte, jabechji̧ järëreji̧ri̧dirȩ. Ado judiro̧ pearä darërea̧ büë üdë jabechji̧ jibëa̧ yaboi̧ barami̧ dari̧ baärëremȩde. Tjamo̧ davä. Dorë cjitëmȩri pio judiri cjitëremȩ büë üdë jibëa̧ yaboräpȩmo̧ ëba baämi̧ dari̧ baradärärëremȩde üi̧ boi̧chji̧rȩ cjo̧ro̧mȩ bë uërä yuro. 10Ado büë pio ju̧i̧ daji̧ri̧rȩ a̧dë chjäte ma̧ chiadëri̧ cjia tjamo̧ji̧ri̧rȩ järëreji̧ri̧dirȩ, pio ju̧i̧ tjamo̧i̧ jäji̧ri̧rȩ. 11Ado judiro̧ pio jiro bëräpȩ go̧düdäräa̧rä, yu̧a̧rëreji̧ri̧dirȩ. Ado daea̧diro̧jo̧ȩ boi̧chji̧ pio ju̧i̧. Arayi̧ pio ji̧bo daea̧diro̧jȩ Maria pio ji̧. Ado boi̧chji̧ pio ju̧i̧ daea̧ oaiä, ‘Aja̧, Ütëdida’ quëna̧ jo̧rȩtaji̧ri̧rȩ chjaodëri̧ ju chatura̧ tjätjäpë china̧därärëreji̧ri̧dirȩ jibëa̧ daito oa daburäpȩ yuro, üi̧ boi̧ pio ju̧i̧mo̧i̧ chjacjiamȩri̧ jo̧rȩtaji̧ri̧rȩ. Ja̧dëa ji̧ go̧dü tänȩa̧diro̧jo̧ȩ jënȩro̧ goa jäa̧ pio ju̧i̧, a̧dë chjäte ba chiamȩ pio ju̧i̧. Ado ba chia oa chiamȩ joë pio ju̧i̧ areië ëte, yürüa̧diro̧jo̧ȩ a̧dë chjäte ba chia oa. Oro quȩmȩ chjiparari oa, goaeri̧ pjȩa̧mȩ cäarea̧ ba chia oa yürürëreji̧ri̧diro̧jo̧ȩ, goaeri̧ pjȩa̧mȩ joarea̧ ba chiabo, mira quȩmȩ joarea̧ ba chiabo. 12Ado judiro̧ ado chjereno̧ Erode pio ju̧i̧ dariä baätärea̧ ji̧, ado cja̧rȩmo̧ no̧ oa mitëji̧ri̧rȩ a̧dë baärëreji̧ri̧diro̧jo̧ȩ. Jabechji̧ Ütë tjamo̧ judi canȩjä tänȩa̧ oaiä, ‘Cjäri̧ madida, Erode pio ju̧i̧ dariä baärea̧mi̧dëdida’ quëna̧ jo̧rȩtaji̧ri̧rȩ ado cja̧rȩmo̧ no̧ oa mitëji̧ri̧rȩ baärëreji̧ri̧dirȩ jibëa̧ chiriräpȩmo̧.
Joche judi goadi ëba baärëremȩdejȩrȩ jibëa̧ pumȩ ji̧ri̧ Ejitoräpȩmo̧
13Ado büë oa ütararea̧ dabaji̧ri̧ pio judiro̧ baäa̧ duri oa, Ano̧mȩ judi a̧dëri pio judiri chjadüa̧ mu̧i̧tjoi̧ pio judi ni̧bärëremȩdejȩ Joche ju̧i̧iäpȩmo̧ canȩjäa̧ pio ju̧i̧iä.
Ado ja̧di ta̧rëri̧ yo̧mȩrȩ yo̧a̧dejȩ:
—Jo̧ȩra̧pe cjitëno̧vä —yo̧a̧dejȩ—. Ëba baäjo̧ȩ boi̧chji̧ pio ju̧i̧, arayi̧ pio ji̧bo. Ejito quȩmȩ chiriräpȩ baäeno̧tä earequededibe. Jabechji̧ Erode judi boi̧chji̧ pio ju̧i̧ na̧tapea̧ ji̧ chjadüpadejȩrȩ jibëa̧ guadia ji̧ri̧ pio yaba̧. Jabechji̧ boi̧chji̧ üdë ja̧bo tänȩa̧ oa cjiatä eadejȩ ütë üdë. Ado pio ju̧i̧iä jibëa̧ guadia pio ji̧ri̧ chjadüpadejȩrȩ boi̧chji̧ pio ju̧i̧ mitëpea̧ oa, pio ju̧i̧ ja̧bo tänȩpea̧ oa. Jo̧ȩra̧pe baächji̧vä. Ado jabechji̧, Ejitoräpȩ ju̧ri̧ cjiadiätä earequededibe. Jabechji̧ pio ju̧ri̧pȩ cjiadiächji̧vä cüdë dibë ado chjereno̧ ma̧na̧tä yo̧a̧rä yuro. Jo̧ȩra̧pe ëba baäjȩrȩ —yo̧mȩrȩ ni̧bärëremȩdejȩ mu̧i̧tjoi̧ üdë Joche pio ju̧i̧iäpȩmo̧.
14Ado Joche judi canȩjä ëte, cjitëno̧a̧de. Ado chjaodëri̧ goadi ëba baärëremȩdejȩ boi̧chji̧ ju̧i̧, arayi̧bo. Jabë gȩnȩrä go̧düji̧ri̧rȩ baärëreji̧ri̧dirȩ Ejito quȩmȩ chiriräpȩmo̧. 15Ado ju̧ri̧pȩ cjo̧ro̧rëreji̧ri̧dirȩ Erode quȩmȩ ütë pio judi ja̧boa̧rä yuro. Ado judiro̧ ju̧ri̧pȩ cjo̧ro̧ji̧ri̧pea̧ oaiä, jabechji̧ tjamo̧i̧padäräa̧ oa cjiarëremȩde ma̧ȩ üdë, Ano̧mȩ pio judi Ochea pio ju̧i̧iä ni̧bärërea̧ ma̧ȩ üdë. Tjamo̧ davä. Ano̧mȩ judi, Ütërë ea jana̧ chjadüa̧ oa ni̧bämȩ pio ju̧i̧iä ni̧bärërea̧ ma̧ȩ üdë tjamo̧i̧ cjiari̧ cjiadiärëremȩde. Ta̧rëchji̧vä judi jabërä yo̧rërea̧ ma̧ȩ oa:
"Ëna̧diäa̧reconȩ ca Ja oa, judi Ejito chiriri pio judiri go̧düpea̧ oa."
Aja̧, ja̧di ta̧rëri̧ ni̧bärëremȩde Ochea quȩmȩ judi, Ano̧mȩ judi jibëa̧ Ja oa ëna̧diäpea̧ pio ju̧i̧ chjiari.
Oari bori̧ pio ji̧ri̧ ja̧bo tänȩtä yo̧rëremȩde Erode quȩmȩ ütë judi
16Ado Erode quȩmȩ ütë pio judi jidatarëremȩdejȩrȩ büë oa ütararea̧ dabaji̧ri̧ pio ji̧ri̧. Jabo judiro̧ jȩa dariä baädëa̧ oaiä, pio jȩaiäpȩmo̧ ma̧ȩ yürüdëa̧ oaiä, jabechji̧ a̧dë chjäte ërecjiamȩpea̧de. ‘Jabechji̧ u̧i̧pea̧diro̧coada, coa dariä ma̧na̧dëa̧diro̧da’ quëna̧ jo̧rȩtamȩrȩ ma̧ cjüëtüri̧ jo̧rȩtamȩpea̧de. Ado pio ju̧i̧iämȩrȩ chjaodëri̧ chjadürëremȩdejȩrȩ jibëa̧ guadia ji̧ri̧, oari bori̧ pio ji̧ri̧ ja̧bo tänȩpea̧ oa. Tjamo̧ davä. Berȩräpȩ ju̧ri̧ cjo̧ro̧ji̧ri̧ bori̧ pio ji̧ri̧, ado Berȩ queri̧räpȩ cjo̧ro̧ji̧ri̧ oari bori̧ pio ji̧ri̧bo ja̧bo tänȩpea̧ oa chjadürëremȩdejȩrȩ. Jabechji̧ jabë tjarari̧ ui goadëji̧ri̧ oari bori̧ pio ji̧ri̧mo̧i̧ ja̧bo tänȩpea̧ ji̧ chjadürëremȩdejȩrȩ. Jabechji̧ büë oa ütararea̧ dabaji̧ri̧ judiro̧ pio jȩaiäpȩmo̧ pearä ütarë yo̧a̧ oaiä, “Aja̧, yo̧a̧ri̧ uiri ja̧de büë üdë pearäri ja̧ cjitërërea̧ ji̧” yo̧rërea̧ oaiä, ‘jabechji̧ ütë boi̧chji̧ üdë ja̧di ui goapamȩ jirodida’ quëna̧ ütararea̧ darëremȩde Erode judi. Ado pio ju̧i̧iä jabechji̧, jabë 3 ui goadëji̧ri̧ oari bori̧ pio ji̧ri̧ ütëbo oa ja̧bo tänȩpea̧ ji̧ chjadürëremȩdejȩrȩ jibëa̧ guadia ji̧ri̧. ‘Jabechji̧ ütëbea üdë jabë pio ju̧ri̧pȩ cjo̧ro̧ jirodida, jabo ja̧bo tänȩrea̧ daemȩcuni̧da, büë oa ütararea̧ dabaji̧ri̧ pio judiro̧ yo̧rërea̧ ütëbea pio ju̧i̧ ja̧bo tänȩrea̧ daemȩ jirocuni̧da’ quëna̧ jo̧rȩtamȩrȩ chjadürëremȩdejȩrȩ jibëa̧ guadia ji̧ri̧. 17Ado Erode judi ja̧di dari̧ japea̧ oaiä, tjamo̧i̧ cjiari̧ cjiadiärëremȩde ma̧ȩ üdë, Ütërë ea jana̧ chjadüa̧ oa ni̧bämȩ pio judi no̧mȩ tjamo̧ri ja̧ ni̧bärërea̧ ma̧ȩ üdë. Ja̧di ta̧rëri̧ ni̧bärëremȩde:
18"Jibëa̧ bori̧rea̧ pio ji̧ri̧ a̧dë chjäte gitori̧ jo̧rȩtayi̧ oa ta̧rërëreji̧ri̧diro̧jȩ Raque quȩyi̧ pio ji̧, Rama quȩmȩräpȩ cjo̧ro̧yi̧ pio ji̧, Berȩ queri̧räpȩ cjo̧ro̧yi̧ pio ji̧. Jabechji̧ cjatäcjie jo̧rȩtarea̧mi̧dëri̧ ejaro cjiayi̧rȩ jo̧rȩtanȩjȩrȩ jibëa̧ borirea̧ pio ji̧ri̧, ja̧bo tänȩa̧ pio ji̧ri̧. Jabechji̧ o judiro̧ chjichjipami̧ dari̧ japarea̧mi̧dëri̧ ji̧dë ma ejaro cjianȩ jibëa̧ bori̧rea̧ pio ji̧ri̧ chjiari, ja̧boa̧ji̧ri̧ pio ji̧ri̧ chjiari."
Aja̧, ja̧di ta̧rëri̧ jabërä ni̧bärëremȩde Jeremia judi, ejaro cjiapayi̧ pio ji̧ chjiari, jibëa̧ bori̧ ëbadëpayi̧ pio ji̧ chjiari.
Joche judi Ejitori pio judiri go̧dümȩrȩ baärëremȩde jibëa̧ pumȩ pio ji̧ri̧ nö̧ta
19Jabo japamitë chjätä ëte, Erode quȩmȩ ütë judi ja̧boa̧rä, Ano̧mȩ judi chjadüa̧ mu̧i̧tjoi̧ pio judi daba tänȩrëremȩdejȩ Joche ju̧i̧, Ejitoräpȩmȩ oa. Jabechji̧ canȩjämȩborë darëremȩdejȩ pio jiro mu̧i̧tjoi̧ pio ju̧i̧. Ado pio jȩaiäpȩmo̧ ni̧bämȩ oa, ta̧rërëremȩdejȩ ja̧di ta̧rëri̧ yo̧mȩ oa:
20—Jaevä. Cjitëno̧vä —yo̧a̧dejȩ—. Üi̧ boi̧ pio ju̧i̧ ëba baäjo̧ȩ, arayi̧ pio ji̧bo. Jabechji̧ boi̧chji̧ pio ju̧i̧ ja̧bo tänȩtämi̧ cjiarëreji̧ri̧ pio judiro̧ ja̧boa̧ maeadirȩ. Jiro decjiapea̧dirȩ. Pio ju̧i̧iä ado chjereno̧ baächji̧vä mȩnȩro̧ cjo̧ro̧rërea̧ chiriräpȩ, Icharai quȩmȩ chiriräpȩ —yo̧a̧dejȩ a̧dërimȩ mu̧i̧tjoi̧ üdë canȩjärea̧ oaiä.
21Ado pio ju̧i̧iä cjitëno̧a̧de Joche judi. Ado ëba baärëremȩdejȩrȩ jibëa̧ pumȩ ji̧ri̧ Icharai quȩmȩ chiriräpȩ. 22Ado Icharai quȩmȩ chiriräpȩ baämȩrȩ baärëremȩde jibëa̧ chiriräpȩmo̧, Judea quȩmȩ chiriräpȩmo̧. Jabechji̧ Icharai chirirä a̧rȩmȩrëremȩde Judea chiri üdë. Jabo Joche judi ta̧rëa̧ oaiä, Judea chiriräpȩ ano̧ mire cjo̧ro̧mȩ ütë pio ju̧i̧ chjiari ta̧rëa̧ oaiä, jabechji̧ uapamȩpea̧de. Jabechji̧ Erode pio ju̧i̧rea̧ ja̧ joja pio judirëremȩde ano̧ mire ütëpea̧mȩ judi. Aja̧, Araquedao quȩmȩ pio judirëremȩde. Ado pio ju̧i̧iä Joche judi uapapea̧de pio ju̧ri̧pȩ ado chjereno̧ cjo̧ro̧pea̧ ji̧. Ado pio ju̧i̧iä ano̧ mire baärëremȩde Garirea quȩmȩ chiriräpȩ. Jabechji̧ jënȩ canȩjäa̧ pio ju̧i̧iä, na̧e chiape bagamȩrȩ baärëremȩde ado cja̧rȩmo̧räpȩ cjo̧ro̧pea̧ oa. 23Ado pio ju̧i̧iä Nachare quȩmȩ bë ma̧ri̧räpȩ baärëreji̧ri̧dirȩ cjo̧ro̧pea̧ oa. Aja̧, Joche judi, Maria jini̧, ado Jechu judi ja̧dira̧ baärëreji̧ri̧dirȩ. Ado pio ju̧i̧iä tjamo̧i̧ cjiari̧ cjiadiärëremȩde ma̧ȩ üdë, Ütërë ea jana̧ chjadüa̧ oa ni̧bämȩ pio judi jabërä ni̧bärërea̧ ma̧ȩ üdë. Jabechji̧ ja̧di ta̧rëri̧ yo̧rëremȩde:
"'Aja̧, Nachareri pio judirimȩde’ yo̧eji̧ri̧dirȩ pumȩ judiro̧ pio ju̧i̧ chjiari.”
Aja̧, ja̧di ta̧rëri̧ go̧ȩpea̧ oa cjiarëremȩde ma̧ȩ üdë jabërä Jechu pio ju̧i̧ chjiari, judi Nachareri pio judirimȩ pio ju̧i̧ chjiari. Ado pio ju̧i̧iä pio ju̧ri̧pȩ baärëremȩde Joche judi jibëa̧ pumȩ pio ji̧ri̧ nö̧ta.
Currently Selected:
Mateo 2: Pume
Highlight
Share
Copy
Want to have your highlights saved across all your devices? Sign up or sign in
©2021 Global Partners, All Rights Reserved