Roman 7
7
Marit lâka wal praki smalki ba tânka
1Bamna muihki nani, man nani Moses lâka tânka kakaira nani sma ba, pain kaikisma Moses lâka ba lika karnika brisa upla ba kau raya piua baman. 2Naha tânka na wal sip sa prakaia: mairin kum waitna kum wal marit takan ba, witin ai maya waitna ba raya piua baman lâ ba mita asla kaia wal prakan sa; sakuna maya waitna ba prubia kaka, mairin ba lâ ba mita ai maya waitna wal asla prakan kata ba wina pri takan sa. 3Bara baha mairka ai maya raya ba piua ra waitna wala wal bribia kaka, witin lika marit lâka sauhkisa; kuna maya waitna ba prubia kaka lika, witin baha lâka ba wina pri sa bara sip sa waitna wala wal marit takaia, bara witin lika marit lâka sauhkras kabia.
4Baha baku natka ra, yang muihki laitwankira nani, Kraist pruanka ba mita man nani sin witin wal pruram lâ ba mapara, waitna wala maya takaia dukiara. Nanara man nani Kraist dukia atia sma witin pruan wina buan ba, baku natka ra wan rayaka na Gâd mawanra diara pain kaia. 5Bamna yawan upla saurakira nani baku kan ba piua ra, lâ ba wan wîna brinka saura nani buki kan, bara baha mita prura ra wan brih wan. 6Sakuna nanara lika lâ mita ai karnika mununhtara wan bri kan ba mapara yawan pruan taki banhwan, bara baku mika rayaka raya tânka ba ni Gâd dukia daukaia yawan pri sika Spirit mita yabal raya wankan bâk, lâ almuk ulban ba karnika mununhta wina lika apia.
Baha saurka yang ra ba
7¿Bamna yawan dîa sip sa ki wiaia? ¿Lâ ba saurka sa ki? ¡Apia pali! Lâ ba apia kata, yang kaikras kaia kapri saurka ba dîa sapa. Kau klir dauki aisaia kaka, yang kaikras kaia kapri upla dukia tumaia, lâ ba naku wiras kan kaka: “Upla wala dukia tumpara.”#Imp St 20.17; Kli S 5.21. 8Saurka ba naha tânka bâk sans brin, bara lâ ba mita yang wîni ra saurka sât sât bal takan, kan lâ âpu kira saurka ba lika diara kum pruan sa. 9Piua kum bâra kan, lâ âpu kan ba mita yang raya kapri. Sakuna lâ balan ba ra, saurka ba kli raya takan, 10bara yang katna ba pruri. Baku bamna, lâ mita raya kaia lâka aikaia kan ba, prura ra ni ai brih wan. 11Bamna saurka ba sans brin lâ bâk kunin ai munaia,#Bla St 3.13. bara baha sin lâka bâk prura sin aikan.
12Baku bamna, lâ ba lika holi sa, bara lâ bîla ba sin holi sa, bara kasak pain sa. 13Ban sakuna, ¿naha Moses lâka pain na mita ban prura ra ai brih wata ki? ¡Sip apia pali! Saurka ba mita sika yang ra prura balan, bara baku ni marikan sa baha ba saurka sa; diara yamni ba bâk baku daukan, bara lâ bîla mita latan marikan sa saurka ba lika saura sa.
14Bamna yawan kaikisa lâ ba lika spirit tani dukia, sakuna yang na upla wîna tara pali brisna ba mita, saurka lâka albika kaia wisi ai atkan sa. 15Bara dîa yang ra taki ba dukiara sip tânka briras pali sna, kan yang pali want sna dukia ba lika daukras, kuna yang mita misbara kaikisna dukia ba sika daukisna.#Gal 5.17. 16Sakuna want apia sna ba, baha sika yang daukisna kaka, baku ni lika kaikisna lâ ba pain sa. 17Baku bamna, yang apia sika daukisna ba, sakuna saurka yang wîni ra ba mita sika dauki ba. 18Bamna kaikisni yang pali ra, tânka ba kasak pali wibia kaka, yang pali wîni ra diara pain ba âpu sa; yang lika diara pain daukan ai daukisa, sakuna sip daukras sna. 19Diara pain daukaia want sna ba lika sip daukras sna, sakuna saura daukaia want apia sna ba lika dauki taukisna. 20Bamna daukaia want apia sna dukia ni daukisna bamna, ban kaka baha ba lika yang pali apia sika, sakuna saurka yang wîni ra ba mita sika dauki ba.
21Baku ba mita, naha yang ra takisa: ani piua ra diara pain daukan ai dauki ba ra, diara saura baman yang wîni ra kaikisni. 22Kupi munhtara lika, Gâd lâka ba yamni kaikisna, 23kuna yang wîni tara ra diara aihka kum kupi brinka ba mapara aiklabi kan kaikisna; baha sika saurka lâka yang wîni ra bâra ba mita silak ra ai mangki ai bri ba.
24¡Uba umpira pali sna na! ¿Bamna ya pali sip kabia ki, naha wîni tara na mita prura pâtka tara ra ai brih auya ba wina dakbi ai sakaia? 25Baha ba lika Gâd baman sip sa, wan Dawan Jisas Kraist bâk. ¡Gâd ra tingki kabia! Baha mita, kupi aiska ni Gâd lâka ba ra dimi auna, kuna wîni tara ba tani lika saurka lâka albika sna.
Currently Selected:
Roman 7: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua