Roman 5
5
Pât wina pri takan ba
1Baku bamna, kasak lukan lâka ba mita Gâd mita kasakkira wan kulkisa, bara wan Dawan Jisas Kraist ba mita yawan na Gâd wal kupia kumi lâka ba brisa. 2Kasak lukan ba mita Kraist bâk yawan lika Gâd lamara balan, ai yamnika briaia dukiara. Bara naha yamnika sika yawan bapi na, bara lilia sa naika Gâd prana ba wan dukia briaia ba mita. 3Bara naha baman apia, sakuna pât wahwan tilara sin yawan ban lilia sa, kan yawan kaikisa pât wahwan ba mita bapi buaia wihka bîla kaikaia lâka wankisa. 4Bara wihka bîla kaikaia lâka ba mita hilp wan munisa aitani kat takaia, bamna aitani kat takan ba mita wihka bîla kaikaia lâka ba yawan brisa. 5Bara naha wihka bîla kaikaia lâka na mita, swira wan paskras sa, kan Gâd mita Spirit Holikira wankan ba bâk ai latwanka lâka ba wan kupia ra banhkan.
6Kan yawan sip swak takras kan ba ra, Gâd mita piua mangkan ba kat, Kraist lika saurakira nani ba tâwan pruan. 7Upla wala watlika ra aimaki pruaia wiaia ba karna sa, upla kasak kum watlika ra sin apia; sakuna ban kra upla kum kasak ba tâwan upla kum kra wilin takbia pruaia. 8Sakuna Gâd ai latwanka tara ba wan marikisa: yawan kau upla saurakira nani kan, sakuna Kraist lika wan tâwan pruan. 9Bara nanara, Kraist pruanka ba mita Gâd mita pri mai sakan sa, bara kau pali Gâd lawanka ba wina sin Kraist bâk pri mai sakan kabia. 10Bamna yawan na kau Gâd wal wan waihla kan, sakuna ai Luhpia pruanka ba mita witin wal kupia kumi wan daukan, bamna nanara kau aiska pali Kraist rayaka ba mita swaki wan sakan kabia, nanara witin wal yawan kupia kumi sa bamna. 11Bara naha baman lika apia, kuna wan Dawan Jisas Kraist ba mita yawan lika Gâd ra lilia pali sa, kan Kraist ba mita yawan na Gâd wal kupia kumi wan daukan sa bamna.
Adam bara Kraist ba wal
12Baku bamna, saurka ba upla kumi tâka ba mita upla sut ra luan, bamna saurka ba mita prura balan,#Bla St 3.6-19; Si L 2.24. bara prura ba upla sut ra alkan sa, kan upla sut saura daukan bamna. 13Lâ naha ba tasba ra kau âpu kan ba ra, saurka lâka lika pat bâra kan; sakuna lâ âpu kan bamna, wan saurka ba wan kulkras kan. 14Ban sakuna, Adam piua ba wina Moses piua kat, prura ba saura dauki uplika nani purara karnika bri kan, sakuna ai saurka ba Adam mita Gâd bîla lulkan ba sâtka lika apia;#Bla St 2.16-17; 3.11-12. bamna Adam lika baha uplika balaia kan ba lilka kata.
15Bamna Adam swakwanka ba sip apia sa, Gâd prisant wanki dukia ba wal prakaia. Upla kum swakwanka ba mita upla ailal pruan; sakuna swaki sakan lâka Gâd mita mana âpu wanki ba upla kumi bâk, naha sika Jisas Kraist, baha ba lika kau tara pali sa bara upla ailal mapa ra sin hilp kum. 16Bamna upla kumi saura daukan ba sip apia sa swaki sakan lâka Gâd prisant wanki ba wal prakaia; upla kumi saura daukan ba mita pât ra wan lakaia lâka ba balan; sakuna Gâd prisantka ba mita param sakan sa upla nani swakwanka manis pali daukan ba wina pri sakan sa. 17Bamna upla kumi saura daukan ba tâka karnika ba prura mita alki brin; bara nanara Gâd ai kupia yamni prisantka kau tara ba param marikisa baha nani dukia pât wina pri sakan ba, witin nani rayaka tânka raya ra iwi kaia upla kumi ba mita, baha sika Jisas Kraist.
18Adam baman swakwanka daukan ba tâka mita upla sut ba pâtkira takan ba baku, Jisas Kraist yakan diara kasak daukan ba tâka mita, upla sut ba pât wina pri saki raya ban kaia lâka ba yabisa. 19Baha tânka ba lika, upla kumi Gâd bîla lulkan tâka ba mita, upla manis ra saurakira kulkan kan; bara baha sim natka ra, upla kumi Gâd bîla wali daukan ba tâka mita, upla manis Gâd mawanra kasakkira kulkan kabia.
20Bamna Moses lâka balan saurka ba kau manis takaia dukiara, sakuna saurka ba kau manis takan ba ra, Gâd kupia yamnika ba kau tara pali takan. 21Naha na baku takan, saurka ba prura bri balaia karnika bri kan ba baku, Gâd kupia yamnika ba mita yawan na Gâd mawanra kasakkira wan kulkaia karnika bri kaia bara raya ban kaia lâka ba wankaia, wan Dawan Jisas Kraist bâk.
Currently Selected:
Roman 5: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua