Roman 10
10
1Muihki nani, yang pali kupi brinki ba, bara Gâd ra puri sunisna ba sika Israel luhpia nani dukiara witin nani sut ba swaki sakan lâka ba alkaia. 2Witin nani hilpka ra aisaia sip sna, witin nani Gâd warkka daukaia brinka ba tara pali brisa; ban sakuna, baha brinka ba sinska kasak ba kat ai tânka briras sa. 3Sakuna Gâd upla ra pâtka wina pri saki ba witin nani baha kaikras, baha mita witin nani ai natka bâk swak takaia plikisa, Gâd daukan ba ra bawras kira. 4Bamna Kraist ra sika Moses lâka aiska daukisa, bara ya witin ra kasak luki ba Gâd mita yamni kulkan sa.
5Moses lâka bâk Gâd mita pâtkas kulkisa kaka, Moses mita naku ulban: “Ani uplika lâ ba kat pain daukisa kaka, witin lâ ba mita raya kabia.”#Lib 18.5. 6Kasak lukan mita Gâd kasakkira wan kulki ba lika naku wisa: “Man kupiam ra wipara: ‘¿Ya kasbrika purara uli wabia?’ —Naha na lika, Kraist kli mâyara bri balaia tânka sa; 7bara sin: ‘¿Ya naha tasbaya mununhtara iwi wabia?’ ” —Naha na lika, Kraist ba yaka pruan nani tila wina uli balaia tânka sa. 8¿Bamna, dîa pali aisisa ki?: “Gâd bîla ba man lamam pali kat sa, bîlam ra bara man kupiam kat sin.”#Kli S 30.12-14. Naha bîla na sika kasak lukan lâka yang nani smalkisna ba. 9Bara man bîlam ni Jisas ba kasak Dawan sa aisisma kaka, bara kupiam ra sin kasak lukisma Gâd mita Jisas ba pruan nani tila wina bukan, man ba swaki mai sakan kabia. 10Bamna wan kupia ni kasak lukisa Gâd mita kasakkira wan kulkaia, bara wan bîla ni Jisas Kraist ba kakaira sa tânka ba param aisisa, swaki wan sakaia.
11Ulbanka ba wisa: “Witin ra kasak luki uplika ba kumi sin kunin munan kabia apia.”#Ais 28.16. 12Bamna Ju nani wihki Ju apia uplika nani ba wal lika sât aihka apia sa; kan Dawan ba lika upla sut Dawanka sa, bamna ani uplika nani witin ai nina mâki wini ba sut ra yabisa. 13Kan Ulbanka ba baku pali wisa: “Dawan nina mâki wini ba sut swaki sakan kabia.”#Jl 2.32. 14Sakuna ¿nahki Dawan nina mâki winbia, witin nani ba witinka ra kasak lukras kan ba? ¿Bara nahki kasak lukbia, witin nani Dawan aisin walras kan ba? ¿Bara nahki Dawan tânka smalkka walbia, witin nani ra smalkaia uplika ba âpu bamna? 15¿Bara nahki sturi yamni ba smalkbia, blîkka wih smalkaia ba âpu sa bamna? Ulbanka ra wi ba baku: “¡Kupia kumi lâka sturka bara sturi yamni smalkaia brih aula uplika mina nani ba painkira pali sa!”#Ais 52.7.
16Sakuna upla sut lika swaki sakan sturka smalkanka ba kat kasak walras. Baha lika Aiseya aisi ba baku: “Dawan, ¿ya mita wan smalkanka ra kasak lukan ki?”#Ais 53.1. 17Baku bamna, kasak lukan lâka aula walan ba tâka wina, bara wali yaba lika Kraist sturka sika.
18Kuna makabi walisni: ¿Smalkanka ba witin nani walras kan ki? ¡Latan witin nani ba walan! Ulbanka ba wisa:
“Witin nani bîla baikra ba tasba aiska ra wan,
bara witin nani bîla aisinka nani ba sin tasba paskan ba kat wan.”#Law 19.4.
19Sakuna kli aima wala yang makabi walisni: ¿Ju nani ba dîa naha na tânka briras kan ki? Tâura, Moses pali bila:
“Yang bui man nani ra tâwan lawan lâka kum mangkamni,
upla sâtka kumi nisan apia ba dukiara;
bara baha nisanka diara tânka briras ba dukiara
mai munrika kupiam baikma.”#Kli S 32.21.
20Ningkara Aiseya baha tila bâk dimi, naku wisa:
“Ai plikras nani kan ba mita ai sakan;
makabi walras kan nani ra,
yang param takri ai kaikan.”#Ais 65.1.
21Sakuna Israel luhpia nani dukiara Aiseya naku wisa: “Yu aiska mihti nani ba sakbri, kiama karna bara bîla kat sin wali daukras uplika nani ra.”#Ais 65.2.
Currently Selected:
Roman 10: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua