Kulki Kaikanka 1
1
Moses bui Israel luhpia nani ba kulki kaikan Sainai ra
1Israel luhpia nani Idsip wina takan pat mani wâl aimakaia lamara kan, baha manka ra kati wâl aimakan yua pas ba, Dawan bui Moses ra aisin Sainai upla iwras tasbaya ra, Dawan wal aisaia tintka watla ra, bara Gâd bui witin ra win:
2“Israel luhpia nani ba sut, kumi bani masraka bara taika nani ba sut kulkan kabia. Upla kulki kaikan natka kat,#Kul K 26.1-51. bara baku nu takbia upla an bâra ba. Bara nina nani sin mangkbia, 3mani yawanaiska kumi alkan ba wina ai purara, baha nani sut war aiklabaia waia sip ba. Eran hilp mai munbia bara baha nani war aiklabaia sip ba, daknika nina ba uls, 4kiamka bani ba wina, waitna kum man nani wal kabia, baha ai aisa watla uplika nani lalka aimaki ba. 5Baha nani man nani ra hilp mai muni kabia nina nani ba naha sa:
“Ruben kiamka ba wina: Elisur, Sedeúr luhpia ba.
6“Simian kiamka ba wina: Selumiel, Surisadai luhpia ba.
7“Juda kiamka ba wina: Nahasón, Aminadab luhpia ba.
8“Isacar kiamka ba wina: Natanael, Suar luhpia ba.
9“Zabulón kiamka ba wina: Eliab, Helón luhpia ba.
10“Josep luhpia nani ba wina: Efraín kiamka wina, Amihud luhpia ba, Elisamá; Manasés kiamka ba wina: Pedasur luhpia Gamaliel.
11“Benjamín kiamka ba wina: Abidán, Guidoní luhpia ba.
12“Dan kiamka ba wina: Ahiézer, Amisadai luhpia ba.
13“Aser kiamka ba wina: Paguiel, Ocrán luhpia ba.
14“Gad kiamka ba wina: Eliasaf, Reuel luhpia ba.
15“Neftalí kiamka ba wina: Ahirá, Enán luhpia ba.”
16Naha nani sika Israel luhpia nani ba tila wina uplika sakan ba, ai aisika nani kiamka wihtka nani ba Israel luhpia nani sut tilara. 17Bamna baha waitnika nani sika Moses bara Eran wal mita wahbi sakan ba nina nani ba. 18Baha manka ra kati wâl aimakan yua pas Moses, Eran wal baha dakni aiska ba asla kukan, taika bani ba asla daukan, Gâd bui witin ra win ba baku, aisika bani kiamka kulkanka ba kat, upla kumi bani nina nani kat kulkan kata, mani yawanaiska kum bri ba wina ai purara, 19Dawan bui Moses ra baha nahki daukaia win ba baku. Sainai upla iwras tasbaya ra upla kulki kaikanka ba daukan kata.
20-21Israel luhpia 12 ba, kumi bani ba kiamka nani ba sut kulki kaikan. Kumi bani manka mani yawanaiska pura bri nani ba sut nina ulban, bara kulkanka ba naku kata:
Tawahkia Ruben kiamka nani ba kulkan, 46,500 waitna nani aiklabaia waia sip sa.
22-23Simian kiamka luhpia nani ba kulkan 59,300.
24-25Gad kiamka luhpia nani ba kulkan 45,650.
26-27Juda kiamka luhpia nani ba kulkan 74,600.
28-29Isacar kiamka luhpia nani ba kulkan 54,400.
30-31Zabulón kiamka luhpia nani ba kulkan 57,400.
32-35Josep Efraín kiamka luhpia nani ba kulkan 40,500. Manasés kiamka luhpia nani ba kulkan 32,200.
36-37Benjamín kiamka luhpia nani ba kulkan 35,400.
38-39Dan kiamka luhpia nani ba kulkan 62,700.
40-41Aser kiamka luhpia nani kulkan 41,500.
42-43Neftalí kiamka luhpia nani ba kulkan 53,400.
44Naha sika upla kulkanka ba numbika, baha nani Moses bara Eran wal kulkan ba, Israel luhpia nani 12 ba kiamka nani kumi bani ba wina waitna kum, witin nani ra hilp munan kulkan: 45Israel kiamka ba wina mani yawanaiska kum wina purara bri ba, baha nani sut war ra waia sip ba, 46kulkan asla sut lika 603,550 waitna nani kan.
Libait nani warkka ba
47Sakuna Libait nani ba lika, damika nani kiamka kulkan ba tilara kulkras kata, 48kan Dawan mita Moses ra win: 49“Israel luhpia nani ba kulki kaikma ba ra Libai kiamka nani ba lika kulkpara. 50Libait nani ba lika Dawan wal aisaia tintka watla ra wark nani daukaia swis, bara tint watla ra diara nani bâra ba sut main kaiki kabia. Witin nani mita tint watla ba twilki brih wabia, dîa dîa warkka wala nani daukaia bahara ba baha warkka nani ba daukbia, bara tint watla lamara takaski kabia. 51Bamna tint watla buki brih waia sa kaka, Libait nani mita slingbia, bara anira takaskaia sa kaka, witin nani mita kli tint watla ba mâkbia. Bamna ani uplika Libait apia ba, baha lamara wabia kaka, prubia. 52Israel luhpia wala nani ba ai watla ra takaski kabia, kumi bani ai plakinka lamara, aiklaklabra nani baku. 53Libait nani ba lika wal lâ daukan tintka watla latka tani ra takaski main kaiki kabia, baku mika Dawan lawanka Israel daknika nani purara âpu kabia.”
54Israel luhpia nani ba Dawan bui Moses ra dîa daukaia win ba baku daukan.
Currently Selected:
Kulki Kaikanka 1: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua