Inanka Nani 1
1
Inanka pas ba
1¡Tawan tara yakan pali takan na,
blasi upla ailal pali kata ba!
¡Nanara piarka baku takan sa,
witin nisan nani tilara
tawan nani kiapitalka kata ba!
Tawan nani tilara witin
king luhpia mairin baku kan,
nanara alba mairin takan sa.
2Witin tihmia bani ini ban katwisa;
ai nakra laya, iswi ai mawan bâk laiwisa.
Ai latwankirka nani sut ba tilara,
kumi sin âpu sa witin ra ai maisa nihkaia.#Law 69.20; Jir 9.17-19; 13.17.
Ai uplika pali nani sut,
witin ra kunin muni lulki swin;
nanara baha nani sut
ai waihla baman takan.#Jir 30.13,14.
3Pât nani wahwi wark karna taki taibi ba purkara,
Juda ba priski brih wan nanara bahara pât wahwisa.
Kainara tawan tilara king aimaki kata ba,
nanara ai riska pliska sakras sa.
Ai nina bliki nani kan ba mita, aiska prak alki brin sa,
bara taiban lâka ra mangkan sa.
4¡Nahki sari pali sa, Saion ra waia yabalka nani ba!
¡Upla kumi sin âpu sa liliaka nani ra balaia!
Tawan getka nani sut ba bîla baman swin sa,
prîs nani ba inisa,
tiara nani ba sari takisa,
bara Jerusalem pât wahwanka ba tahpla pali sa.#Ais 3.26; Jir 14.2.
5Ai waihla nani bui taibi brisa,
ai lahmika nani lika pâwisa.
Kan Dawan bui yan witin ra pât wahwisa,
saurka nani uya daukan ba tâwan.
Ai luhpia nani sut upla iwras tasbaya ra brih wan ai waihla nani mita.
6Saion painkira ba wina,
prana nani ba sut taki wan sa;
ai wihtka tara nani ba,
sula wainhka nani twi piaia pliki baku sa;
ai karnika âpu kira,
ai nina bliki nani ba tâura ai mina raski plapisa.
7Jerusalem ai kupia kraukisa baha yua nani kata ba,
yakan bâra takaskan bara sari baman kan;
ai kupia ra lukisa nahki yuyaka ailal bri kata ba dukiara piua luan nani ra;
ai kupia kraukisa waihla nani mihta ra kauhan piua ra,
bara upla kumi sin waras kan hilp munaia,
ai waihla nani kaikan
bara lawaska kikan ai kauhanka ba dukiara.
8Jerusalem saura ailal pali daukan,
bamna aitani sa saura kulkaia.
Kainara witin ra yamni kulki nani kata ba bui
nanara misbara kaikisa,
kan baha nani bui witin ra kwala luha kaikan ba mita.
Baha mita witin ini ai swira pali,
bara ai mawan ai ninara lakisa.#Isi 16.35-37.
9Witin ai kwalka aiska ba
tâski ni banhwan sa;
baha wina pâtka tara aula ba dukiara lukras kan.
Sip kasak lukras nahki muni kauhan sapa;
upla kumi sin âpu sa witin ra ai maisa nihkaia.
¡Dawan, kaiks, yang umpirki na,
bara waihli nani prautka lâka ba sin!
10Waihla nani dawanka takan sa
Jerusalem yuyaka bara prana nani kata ba sin.#2 Ki 24.13; 25.13-17.
Upla nani ba kaikan idan uplika nani,
Dawan wal prawaia watla holikira ra
ai karnika wal diman ba,
¡Dawan, man baha nani uplika ra
adar yabatma man wal asla prawaia pliska ra
dimbia apia, baha uplika nani sika diman ba!
11Upla iwi nani ba sut inisa,
plun pliki wataukisa;
ai yuyaka nani sut yaban sa
plun mana, baku ai karnika brih raya kaia mata.
¡Dawan, kaiks, nahki kat yang aisawri ba!
¡Umpirki lâka tara brisna na,
kaiki luki pan kaiks!
12¡Man nani, yabalku auma ba,
wiria takaski luki kaiks,
sari lâka wala yang sairka na
baku bâra sa sapa,
ai munan pât wahwisna na!
¡Dawan bui naha pât wahwanka ai blikan,
ai kupia baiwanka lapta pali taki piua ra!
13Dawan mita pura wina pauta blikan,
yang dusi nani kat saura pali munan;
wan mina alkaia dukia nani wapaiki nani ra mangkan,
bara ai munan kli ninira tawri;
bara ban ai lulki swin sa,
pât wahwi kaia minit bani.
14Saura nani daukri ba, Dawan kaikan;
saurki nani ba mita ai priskan,
bara bîp lal ra dus wilkan baku,
yang purira wirha sa:
¡baha bui karniki sut tikisa!
Dawan bui upla nani mihta ra ai mangkan sa,
baha nani mapara yang buaia sip apia sni.
15Waitna karnakira nani tâiwan aiklabaia bri kapri ba sut,
Dawan mita munan, yang wina laihura plapi banhwan.
Witin aiklaklabra daknika kum
asla dauki, yang maipara aiklabaia blikan,
upliki karnakira nani brisna ba sut âpu daukaia mata.
¡Dawan bui Juda sunukira kan taibi tanhta daukan,
wain mâ nani ra taibi âpu laya saki baku!#Ais 63.3; Jl 3.13; Par M 14.20; 19.15.
16Naha diara nani taki ba bui sika yang ra aikan inisna;
naikra nani na, laya nani wal banhwi laiwisa,
kan upla âpu sa yang maisi nihkaia,
bara yang kupi tâ baikaia.
Luhpi nani sut sauhki tikanka tara ba tilara takaskan,
waihla nani ba mita puri luan bamna.
17Saion ba ai mihta nani sakbisa,
kuna upla kumi sin âpu sa witin ra ai maisa nihkaia.
Dawan mita Jekob mapara taibi muni win kan
ai lama kir nani ba, witin ai waihla nani baman kabia;
Jerusalem ba witin nani mapara
diara saura kulkan lâka kan.
18Dawan ba kasak ba daukan,
yang mita sika witin ai bîla mapara buri bamna.
¡Upla nani sut, yang ra ai wals;
pât wahwisna ba sin kaiks!
¡Wahmiki nani bara tiariki nani sut ba
alki priski silak ra brih wan sa!
19Laitwankira nani ra hilp makabri,
sakuna witin nani sut kunin baman ai munan.
Yang prîski nani, almukki nani sin sut,
tawan bilara prui tiwan sa:
¡witin nani plun pliki kan
ai karnika brih raya iwi kaia dukiara!
20¡Dawan, kaiks yang kupi wirhika na!
¡Laima dusa na baiwaia baku daihra walisni!
Kupi ra latwan pali ai taibisa,
kiamapara bara mapara babura kapri ba dukiara.
Latara lika aiklabaia sordka ba mita yang luhpi nani ra ikisa,
bara naha bilara sin prura nâra sa.#Jir 4.19; 9.21.
21Inanki nani ba upla nani walisa,
sakuna upla kumi sin âpu sa maisi nihkaia.
Waihli nani sut, yang pât wahwanki ba nu sa,
bara witin nani lilia takisa
man baha daukram ba.
¡Baha yua dukiara maisa pakram ba yas balbia,
bara yang ra takan ba baku
yas witin nani ra sin takbia!
22Witin nani saurka daukan ba sut
yas man mamwanra balbia;
bara witin nani ra muns
yang ra ai munram ba baku,
ai saurka ba tâwan,
kan yang inanki nani ba ailal sa;
¡kupi sin kriwan, siknis sni!
Currently Selected:
Inanka Nani 1: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua