Kolosi 1
1
Lakula bîla
1Yang Pal, Gâd kupia lâka ba mita Jisas Kraist apastilka sna, wan muihni Timoti ba wal, 2naha wauhkataya ulbisna, Kolosi tawanka ra Gâd uplika nani bara Kraist ra kasak luki nani bahara iwi banhwi ba sut ra. Gâd wan Aisa mita ai kupia yamni lâka bara kupia kumi lâka sin man nani puramra blîkbia.
Pal lalukra nani pura sunisa
3Yang nani piua bani man nani dukiamra puri suni banhwisna ba ra, piua bani Gâd ra tingki wisna, wan Dawan Jisas Kraist Aisika ra. 4Man nani Kraist Jisas ra kasak lukisma ba, yang nani walri, bara Gâd uplika sut ra latwan kaikisma ba sin, 5latwan lâka kum, bîla kaikanka yamni man ra maikaia ridi dauki swin sa kasbrika purara ba baku. Man nani naha bîla kaikanka briram, smalkanka kasak pali ba walram bamna, swak sakan sturka yamni ba. 6Man nani ra mai smalkan sturka yamni na, tasba pîska bani ra pâwi ai mâ sin pain sakisa, sim man nani tilamra takan ba baku, Gâd latwan tânka aisin walram ba wina, bara tânka briram naha latwanka lâka na kasak pali sa. 7Naha na wan latwankira Epafras mai smalkan,#Kol 4.12; Plm 23. witinka ba yang nani aikuki wark takan, bara man nani sin witin ba Kraist dukia dadaukra painkira kulki banhwisma. 8Bamna witin bui yang nani ra man nani sturkam bri balan, bara sin latwan kaikaia lâka Spirit wina maiki ba.
9Baha mita yang nani baha walri yua ba wina, man nani mamta takaskras puri suni banhwisna, bara Gâd ra yang nani makabisna, man nani ra ai kupia lâka yamnika ba mamrikbia, bara sins lâka sât sât nani sin maikbia, bara diara tânka kaikaia spiritka ba sin. 10Makabi banhwisna man nani ba Dawan uplika nani baku tânkam pain brih dîa dîa daukaia sma ba dauki kama, piua bani witin pain kaiki dukia nani baman sin dauki kama, wark painkira nani wina mâ saki kama, bara baku mika sip kama Gâd tânka kau pain kaikaia. 11Yang nani Gâd ra makabisna, witin ai karnika pranakira ba ni man nani sut karnakira mai sâkbia, baku mika diara sut ra liliakira bapi bûi, wihka sin bîla kaiki kama. 12Bara liliakira Aisa ra tingki wis, kan Gâd king aimaki tasbaya ingnikira ra ai uplika nani mata diara nani ridi daukan ba tilara, man nani sut dukiam sin bahara sa bamna. 13Gâd mita tihmia karnika wina dakbi wan saki,#Epe 6.12. ai Luhpia latwankira king aimaki ba pliska ra wan mangkan, 14witin ai pruanka ba mita swaki wan saki, wan saurka nani sut ban swih tikan.#Epe 1.7.
Kraist pruanka mita, Gâd wal kupia kumi lâka ba
15Wan nakra ni sip kaikras Gâdka ba ai Luhpia bâk yawan ra param takan, kan Kraist lika paskanka nani sut ba tawahkia sa. 16Kraist bâk, Gâd mita diara nani kasbrika purara bara tasba ra ba sut paskan.#Epe 6.12. Diara nani wan nakra ni kaiki ba, bara diara nani wan nakra ni sip kaikras ba sin; king aimaki nani ba, tasba purara karnika bri banhwi ba, tasba wihtka nani, bara spirit lâka mapara karnika bri nani ba sut, Kraist bâk paskan sa, bara witin dukiara sin bâra sa. 17Kraist ba diara nani sut kau âpu kan ba wina pat bâra sa, bara diara nani sut witin mita aitani kat brisa.#Jn 1.1-3,18; Hib 1.2-3. 18Baha sut purkara, Kraist ba wîna tara ba lal sa, baha sika serts ba.#Epe 1.22-23; 4.15. Witin sika naha wîna tara ra raya kaia lâka yabi ba; witin ba tâ pali wina ban bâra ba, Kraist ba pas pruan nani wina buan ba, baha mita diara nani sut tâura witin sa.#Ap St 26.23; Par M 1.5. 19Gâd brin dauki kan Kraist ra aiska dimi iwi kaia. 20Bara Kraist ba mita, naha tasba aiska na, witin wal kupia kumi lâka daukaia, bamna Kraist dus prihni ra pruan ai tâlia laikan ba mita diara nani tasba ra ba, bara kasbrika purara ba sut kupia kumi daukan.#Epe 2.16.
21Kaina piua ra man nani ba upla tringsar nani kapram bara Gâd wal wailhka kupiam nani ra, diara saura nani dauki kapram ba mita. 22Kuna nanara, Gâd mita man nani ba witin wal kupia kumi mai daukan Kraist ai wîna tara pât wahwi pruan ba mita. Witin naha daukan, man nani sut witin ai mawanra holikira, tâski âpu bara pâtkas pali kama dukiara. 23Sakuna naha dukiara, man nani kasak lukan lâka ra ban bapi bûi kaia sma, playkam ba tihu bapi bri bara kainamra diara briaia dukiara, swaki sakan lâka smalkanka wina walram ba wina tnaya ra takaia apia. Kan naha smalkanka na lika tasba aiska ra smalkan sa, bara yang Pal pali mita sin smalkaia hilp munisni.
Pal serts ra wark daukaia mangkan ba
24Bamna nanara lilia sna, man nani tâmwan pât wahwisna ba, kan naha natka bâk, yang wîni tara ra kaikisna Kraist pât wahwanka nani kau âpu ba ai sertska dukiara, witin ai wîna tara ba. 25Yang lika nanara Gâd mita serts napakanka ai daukan sa, witin mita baha warkka daukamna wisi aikan bamna, man nani yamnikam dukiara,#Epe 3.2. Gâd ai dahra smalkanka ba aiska smalkamna dukiara ai mangkan, 26wibia sa kaka diara yukukan ra mani nani ailal, kiamka sâtka nani ailal pali luan ra Gâd yukuki bri kan ba, nanara baha ba ai uplika nani ra sut param marikan sa. 27Witin nani ra Gâd mita baha yuyaka pranakira ba marikaia want kan, naha yukukanka lâka na sika Ju apia nani ra praki brisa. Bara baha yukukanka ba sika Kraist, man nani ra takaski ba, bara naika briaia bîla kaiki ba tânka kum sa.
28Yang nani Kraist dukiara smalkisna, upla nani sut ra kupia krauki smalki banhwisna sins tânka manis ra baku dauki Kraist ra kasak wapni brih waia dukiara. 29Naha dukiara yang wark takisna, bara Kraist mita karnika aikan ba ni, aiska pali karna trai kaikisni.
Currently Selected:
Kolosi 1: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua