1 Samuil 1
1
Dawan bui Ana ra luhpa waitna kum yabisa
1Efraín ilka nani tilara tawan kumi bâra kan nina Ramá; bahara waitna kumi iwi kan, witin Suf taika wina kan, ai nina Elcaná. Witin ai aisika ba Jeroham kan, ai damika Elihú, bara ai damika papika ba Tohu, Suf luhpia kata, Efraín kiamka tila wina. 2Elcaná lika mairin wâl bri kan. Kumi ba nina Ana, bara wala ba lika Peniná. Peniná ba luhpira kan, sakuna Ana lika luhpias kan. 3Mani bani Elcaná ai tawanka wina taki Siló ra wi kan ai pura suni sakripais dauki kaia, karnika sut bri ba Dawanka ra. Bahara prîs Elí luhpia nani wâl bâra kan, nina nani ba Hofní bara Finees, witin nani sin Dawan prîska nani kata.
4Elcaná ai daiwra iki sakripais dauki kan piua ra, Peniná ai luhpia waitna nani ra bara ai luhpia mairin nani ra sin dîa yabaia ba yabi kan. 5Ana ra witin latwan pali kaiki kan bamna, dîa witin ra yabaia kan bâk saki yan, Dawan bui witin ra luhpa yaras kan sakuna. 6Baha mita ai waihla Peniná bui ai kupia sauhki ai kupia wirha dingki kan, Dawan bui ai biarapara daukan bamna.
7Mani bani, witin nani Dawan watla ra auya ba ra, Peniná bui baku muni kan; baha mita Ana ba plun sin piras, inaia baman kan. 8Bamna ai maya Elcaná witin ra win: “Ana, ¿dîa kan sari man plun piras sma ba? ¿Man mampara luhpa nani matawalsip briaia ba wal, yang kau tara sna apia?”
9Piua kum ra, Siló ra kan ba ra, Ana ai mina ra buan plun pin ningkara. Prîs Elí ba sir tara kum ra iwi kan, Dawan tempelka dimaika durka ba lamara. 10Bara Ana ai kupia wirha tara wal uya ini, Dawan ra ai pura sunan, 11bara Dawan ra witin pramis daukan: “Dawan karnika sut pali brisma ba, albikam mairin kupia kriwan na maisa nihkaia yamni lukisma kaka, yang ra luks bara luhpa waitna kum aik, bara ai rayaka yua nani sut ra witin ba man warkkam ra maikamna, bara tukinka ba lika ai tâwa ba klakan kabia apia.”#Kul K 6.5.
12Ana ba baku yari pali Dawan ra ai pura suni kan ba ra, Elí lika ai bîla kat aman kaiki kan; 13sakuna Ana ai kupia ra ai pura suni kan. Ai bîla baikra lika sakras, un baman aiawi kan. Elí luki kan lika witin ba wain dih bla takan, 14bara witin ra win:
—¿Man ahkia kat bla lâka ba swima ki? ¡Diaia lâka ba mahka swis!
15Ana pana aisin:
—Baku apia, dawanki, wain karna bara tahpla sin diri tânka lika apia sa, kuna yang kupi kriwan wirha pali sa, bamna tâinka ba saki Dawan ra kahbisna. 16Yang na mairin saura pali baku ai kulkpara, sakuna yang sika kupi wirha ba mita kupi wal aisisna, baha mita yari pali puri sunisna.
17Elí pana aisi, win:
—Kupiam kumi was; man makabram ba sut Israel Gâdka mita maikbia.
18Witin pana win:
—Tingki pali.
Bara Ana kli tawi, witin balan ba yabalka bâk mahka wan. Bamna plun pin bara baha yua wina witin kli sari briras kan. 19Yapi lalawan titan ra, witin nani kli Dawan ra mayunan, baha ningkara ai watla Ramá ra kli tawi wan. Bara Elcaná ai maya Ana wal prawan, bara Dawan sin Ana makabanka ba kat wali daukan. 20Bara baku Ana kwihra tiwan, piua aimakan kat ai luhpia waitna kum brin, bara nina ba Samuil mâkata,#1.20 Hibru ra ulban sa Samuil, baha tânka ba, makabaia. kan witin mita Dawan ra makaban kata.
21Baha ningkara Elcaná ai watla uplika sut aikuki kli Siló ra wan, witin nani dîa daukaia win ba kat daukaia, bara mani bani Dawan ra sakripais dauki kan; 22sakuna Ana lika waras kata, kan witin ai maya ra win:
—Yang sip wamna apia, tukta na tiala dakbamna kat. Ba piua aimakbia kat brih wamna, bara Dawan ra yabamna ai yua nani sut ra ban bâra kaia.
23Ai maya Elcaná bui pana win:
—Man nahki daukrika kau yamni kaikma ba kat dauks; bamna nâra bas, tukta ba tiala dakma ba kat. Bara Dawan daukaia win ba yaka ban aimakbia.
Bara witin takaskan, ai luhpia waitna paki kan tiala dakban ba kat. 24Tiala dakban ba ra, tukta ba kau sirpi kan, sakuna Siló ra ban brih wan Dawan watla ra, bara bîp wainhka ba sin yumhpa bri wan, plawar mâ 22 litro wihki wain sumi kum sin brih wan. 25Bara bîp wainhka kum iki sakripais daukan, bara tukta ba Elí ra yan. 26Bara Ana bui win:
—Padin ai muns, dawanki, sakuna man kau ban raya sma ba baku, yang aisisna ba kasak pali sa, yang sika baha mairka nahara Dawan ra puri suni katna ba man lamamra. 27Dawan ra makabri luhpa waitna kum aikaia, bara witin bui yang ra naha aikan. 28Yang bîli aisari ba kat, luhpi na Dawan ra yabisna ai rayaka aiska witin Dawan dukia kabia.
Bara Elí ai mawan tasba kat bawan Dawan ra mayunaia dukiara.
Currently Selected:
1 Samuil 1: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua