1 Macabeo 1
1
Alejandro bara witin ningkara king nani aimakan ba#1.1-9 Dn 11.3-4.
1Alejandro Macedonia wina ba, Filipo luhpia waitna, ai kuntrika wina taki impakan bara Darío mapara war aiklabi pura luan, witinka na lika Persia bara Media uplika nani kingka, bara witin pliska ra king aimakan; pas tâura lika Grik tasbaya kingka kata. 2War nani ailal daukan, kan kahbanka bri tawanka nani dakbi brin, baha tasbaya pîska kingka nani manis ra ikan, 3tasba ra plis kau laihura nani ba kat wan bara nisan ailal dukia nani sin mihta dakbi brin. Baha ningkara, tasba aiska ba laman lâka ra takaskan witin ai kingka lâka munhtara, bara Alejandro ba praut lâka bara kwalhwan lâka ni aibanhwata. 4War daknika karnakira kum asla dauki, tasba pîska tara nani ra, nisan nani ra bara gabamint tâ brabrira nani ra sin ai karnika munhtara dingki brih, taiban natka ra yaban baha nani bui lal mana aibapi banhwata. 5Sakuna lâs kat siknis takan, bara Prusia baila kan ba ai dara wali, 6aiklaklabra wihtka nani kau sins tara bri kan ba paiwan balan, witin kau wahma kan piua wina aikuki skul dimi banhwan kata ba, bara Prusia kainara ai kingka tasbaika ba witin nani ra sir muni yaban. 7Mani 12 king aimakan ningkara, Alejandro ba pruata.#1.7 Alejandro Magno ba pruan mani 323 Kraist balaia kainara. 8Bamna aiklaklabra wihtka tara nani ba mahka king nani karnika ba alki bri banhwan, kumi bani silp ai tasbaika pîska nani ba kat, 9bara Alejandro pruan ningkara king baku kraun mangki banhwata, bara sim baku witin nani ningkara ai kiamka nani aula ba ra sin, mani ailal bilka ra, bara baku natka ra tasba ba trabil saura nani wal baman banhki dauki swi banhwata.
Antíoco IV Epífanes. Israel ra lukras uplikalâka nani dingki ba
(2 Mac 4.7-17)
10Baha wakia wina kiamka kum bal takan, king Antíoco luhpia waitna saurakira Antíoco Epífanes ba, witinka ba Rom ra alki priski bri kata, bara mani 137 Grik uplika nani tasba nani purara ai karnika tara bri kan piua ra witin ba mahka king aimakata.#1.10 Baha lika mani 175 Kraist balaia kainara.
11Baha piua ra Ju lâka lulki swin uplika nani Israel ra bal takan, bara upla nani ailal ra kunin muni, wi banhwi kata: “Kaisa wilkanka kum daukaia nisan nani wan tasbaya lamara ba aikuki, kan baha nani tila wina yawan dakwi takan piua ba wina trabil nani uya wan purara balan sa.’’ 12Tawan uplika nani kum kum lika naha aisanka na laik walan, 13bara ai spiritka buki king ra aidrubi banhwan, bara witin bui adar yaban lukras uplika iwanka natka nani ba nina bliki banhbia. 14Jerusalem ra pulanka daukaia watla tara kum paski banhwata, lukras uplika nani ai natka bri ba baku; 15aparit taki banhwan ai wîna ra Aisa sainka mangkan ba yukukaia dukiara, baku natka ra sunu iwaia ba bahki kulki; lukras uplika nani wal asla taki, witin nani ra ai kupia laki, saurka lâka dauki banhwata.
Antíoco bui Jerusalem tempelka dukia nani dakbi brisa
(2 Mac 5.11-20)
16Antíoco bui ai kingka lâka ba karnika pain bri ba kaiki, Idsip tasbaya ba dakbi briaia lukanka brin, kuntrika wâl ba purara king aimakaia dukiara. 17Baku bamna, war daknika karnakira kum wal Idsip ra aiklabi dimi wan, war trukka nani aikuki, daiwan elepant nani bara kabuk war slaupka ailal aikuki sin, 18bara king Tolomeo mapara aiklaban, bamna witinka na ai ninara kitwi plapan, tasba ra upla pruan nani ailal swih ki. 19Antíoco bui Idsip tawanka tara nani kan kahbanka bri kan ba dakbi brih, kuntri dukia nani ba sut ai mihta ra brin.#1.17-19 Dn 11.25.
20Idsip mapara aiklabi pura luan ba ningkara, mani 143 ra,#1.20 Baha lika lapta piua dimaia kainara mani 169 Kraist balaia kainara. Antíoco ba war daknika karnakira kum wal Israel mapara impaki diman, bara Jerusalem kat wan. 21Kwalhwan lâka wal plis holikira ra dimi muni gul altarka ba dakbi brin, baku sin kiandil mina ba ai pîska nani sut aikuki, 22brit holikira kahbaia tibilka ba, kâp nani, kâp tanhta nani, gul ispanka tara nani ba, kwala nani paman kan ba bara kraun nani ba, bara gul wal lalaubi tempel mawan pîska ra sakahkan kata ba sut dakbi brin. 23Baku sin silbar ba dakbi brin, gul ba, yus muni dukia pranakira nani ba bara diara manakira nani yukuki bri kan ba, baha nani ba sika pliki sakata. 24Baha dukia nani sut ba brih ki ai kuntrika ra wan. Baku sin upla ailal ra ikan bara rispik lâka luha pali wal sturi aisata.#1.20-24 Dn 11.28.
25Israel aiska ra sari lâka tara bâra kan;
26wihta nani bara upla almuk naniba sarikira ini banhwi kata,
tiara nani bara wahma nani ba ai karnika tiki banhwan,
mairin aukampura nani prana ba lap tiwan.
27Waira marit takan uplika nani baini baman tauki banhwi kata,
marit takaia mairka nani ba sarilâka tilara banhwi kan
ai barandika lupia nani ra iwi.
28Tasba aiska ba aihka pali ai dahra walan
ai uplika nani trabilka saura ba kaiki;
Jekob tawanka aiska ba kulkankaâpu lâka baman ai purara kauhan kata.
Jerusalem sauhki tikan ba
(2 Mac 5.21-26)
29Mani wâl luan ningkara, king bui lal mana kakulkra uplika kum blikan Judia tawanka nani ra,#1.29 2 Mac 5.24. bara war daknika karnakira kum wal Jerusalem ra dimi wan; 30upla nani ra kunin munaia lukanka wal kupia kumi lâka natka ra witin nani ra sturi aisan, bara baha nani bui witin ra kasak lukan. Sakuna ban wina tawan mapara aiklaban, baha ra saura pali sauhki, Israel luhpia nani ailal ikata, 31bara dukia nani sut dakbi brih ki angkan luan, bara utla nani bara tawan tnaya kir kutbanka nani paskan kata ba sauhki tikan. 32Ai waitnika nani bui mairin nani ra bara tuktan nani ra alki silak ra brih wan, bara daiwan nani ba sin dakbi bri banhwata. 33Debit Tawanka Tara tnaya kir kutbanka kum purara bara karna paski banhwan, aihwaki kaikaia pliska tara nani kan kahbanka bri kira, bara kaina kahbaika pliska ra laki banhwata.#1.33 Baha piua ra nina mâkan Debit Tawanka tawan pîska pura ba bara baha lika tempel muna tani ra kan. 34Baha pliska ra gâd wala kakulkra uplika saurakira nani bara Ju lâka lulki swin uplika nani mangki banhwata, bara baha ba aiklabaia pliska karnakira kum dauki banhwan. 35Aiklabaia dukia nani bara plun nani bri si auhbi banhwata, bara Jerusalem wina implikan dukia nani ba bahara kahbi swi banhwan. Bamna bahara mahka aihwaki banhwata.
36Holikira pliska ba mapara trabil kum kata
bara Israel mapara lika sringka tara kum.
37Pâtkas uplika nani tâlialaiki banhwata holikira pliska ba tnaya kir,
bara holikira pliska ba sunu apia dauki banhwan.
38Witin nani sîa Jerusalem uplika nani ba plapan;
tawan tara ba upla tringsar nani iwaika pliska takan,
ai luhpia nani pali ba baha tawankara tringsar baku takan
bara baha wina taki mahka aidrubi banhwaia kan.
39Tempel ba aisawi luan bara bîla baman takaskan,
lilia tara nani ba sari yua nani ra tawan,
ris yua nani ba tâka mita swira lâka dingkan
bara tawan tara ra kulkanka lâkaba kulkras lâka ra tawan.
40Tawan ba ai prana tara brin ba baku,
mâyara kauhanka brin ba sin tara kan.
Ai kwalhwanka lâka ba sari lâka ra brih wan kata.
Lukras uplika lâka nani bri balan ba
(2 Mac 6.1-11)
41Bamna king bui witin ai karnika bri tasbaika aiska ra lâ kum ulbi saki adar yaban upla sut ba tawan kumi baku asla takaia sa, 42kumi bani ba ai iwanka natka nani bri ba lulki swih. Kuntri wala nani sut ba king adarka ba bîla walan, 43bara Israel luhpia nani tila wina sin manis king kasak lukanka ba alki banhwan,#1.43 Cf 2 Mac 6.2. aidul nani ra sakripais nani dauki yaban bara sin ris yua ba sunu apia dauki banhwata. 44Sturi twatwilkra nani bâk, king bui Jerusalem ra bara Judia tawanka wala nani ra lâ adarka nani blikata bara baha wal taibi muni kan kuntrika ra iwanka natka tringsar nani alki briaia, 45bara adar yabras kata holikira pliska ra daiwan wîna angkan prisantka nani, sakripais nani bara prisant nani yabaia, baha wal sika ris yua ba sunu apia dauki kata, baku sin lilia yua nani, 46holikira pliska ba bara dîa dîa holikira kulki ba ra; 47altar nani, tempel nani bara prias watla kau sirpi nani yaban paski banhwi kata aidul warkka daukaia wisi, baku sin kwirku nani bara daiwan wala tâskikira nani ba sakripais daukaia, 48tuktan nani ra Aisa sainka mangkaia apia bara sunu apia dukia nani bara holi apia dukia nani sât sât wal tâski takaia, 49lâ nani ba ai âuya tiki bara lâ adarka nani ba sut sât wala dauki. 50Ani uplika king adarka ba bîla walras kabia sa kaka, prura pâtka ra dingkan kabia.
51Naha adarka na witin king aimaki tasbaika aiska ra ulbi blikata; baha purkara, king bui tawan sut ra pura kakaira uplika nani mangkan, bara adar yaban Judia tawanka kumi bani ra sakripais nani dauki yaban kabia. 52Ju nani ailal, Dawan lâka ba bahki kulki, naha adarka nani mahka kulki banhwan ai daukanka watawikira wal. 53Israel uplika kasakkira nani ra yaban plis sât sât ra plapi wih yukuwi banhwata.
54Mani 145 ra Quisleu katka yua 15 ra,#1.54 Baha lika trisu kati mani 167 Kraist balaia kainara. king bui saurka lâka kum tara pali daukata,#1.54 Dn 9.27; 11.31; 12.11. kan daiwan wîna nani angki yabi sakripaiska nani altarka pura pali kat lukras uplika altarka kum paskata. 55Utla nani dimaika nani ra bara tawan yabalka bîla nani ra awas mâka kîa yamni angki kata. 56Lâ bukka nani wal prawan ba sut sauhki angkan lui banhwata, 57bara Gâd wal pramis lâka daukan ba bukka kum upla bri kan sâkbia kaka, o upla kum lâ ba ra kasak kulki kan sa kaka, prura pâtka ra lulki kan, king adarka ba kat. 58Bara baku, karnika ba yus muni, baha uplika nani ba kati bani ra tawan sât sât ra Israel luhpia nani wal prawi ba rausauhki banhwi kata.
59Kati bani yua 25 ra daiwan wîna angki sakripaiska yabi altarka purara, lukras uplika altarka paskan kata ba purara sakripais nani dauki banhwi kan. 60Lâ adarka ba natka kat, ani yaptika nani ai luhpia waitna nani ra Aisa sainka mangkan sa kaka, iki banhwi kata 61ai luhpia nani aikuki nana wina pami, bara ai taika nani ra bara Aisa sainka mamangkra nani ra sin iki banhwata. 62Ban sakuna, Israel luhpia nani ailal ai sringka âpu bara ai kupia karna brih ki, plun tâskikira nani ba piaia apia wi banhwan. 63Witin nani ba pruaia kau yamni lukan, baha pata saura nani pih sunu apia takaia bara pramis lâka holikira krikaia ba wal; bamna, rait pali, prui banhwata. 64Baha yua nani ba Israel mapa ra trabil saurakira nani yua nani kan.
Currently Selected:
1 Macabeo 1: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua